ەلباسىنىڭ الەۋمەتتىك سالانى جاڭعىرتۋعا باعىتتالعان 5 باستاماسى حالىقتىڭ تۇرمىس ساپاسىن جاقسارتىپ, ءال-اۋقاتىن ارتتىرۋدى كوزدەيدى. اۋقىمدى باعدارلامادا جۇكتەلگەن ماقسات-مىندەتتەر جۇيەلى تۇردە جۇزەگە اسۋ ۇستىندە. اسىرەسە, شاعىن نەسيە كولەمىن ۇلعايتۋ ماسەلەسى ءوزىن-ءوزى جۇمىسپەن قامتىعان ازاماتتارعا مول مۇمكىندىك اشىپ وتىر.
وبلىس ورتالىعىنداعى جۇمىسسىزدىق دەڭگەيى 3,9 پروتسەنت. وتكەن جىلدىڭ وزىندە 2060 كوكشەتاۋلىق تۇراقتى جۇمىسقا ورنالاستى. 139 ادام كاسىبي دايىندىققا جىبەرىلسە, 40 ازامات جەڭىلدەتىلگەن نەسيە راسىمدەپ, ءوز ىستەرىن باستاپ كەتتى. بۇل ماقساتقا رەسپۋبليكالىق بيۋدجەتتەن 307 ميلليون تەڭگە كولەمىندە قارجى باعىتتالىپ وتىر.
– بيۋدجەتتەن 211 ميلليون تەڭگە 900641 ادامعا تولەمدەر تولەندى, تابيعي اپاتتار كەزىندە زارداپ شەككەن 216 وتباسىنا 17,7 ميلليون تەڭگە كومەك كورسەتىلدى. 281 مۇگەدەك ادامدارعا جەكە باعدارلاما بويىنشا قولداۋ كورسەتىلدى. بۇل باعىتتا جەرگىلىكتى بيۋدجەتتەن 211 ميلليون 290 مىڭ تەڭگە مولشەرىندە قاراجات ءبولىندى,–دەيدى قالالىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ ءبولىمىنىڭ جەتەكشىسى قالي احمەتوۆ.
ەلباسى نۇرسۇلتان نازارباەۆ حالىقتىڭ تابىسى مەن تۇرمىس ساپاسىن ارتتىرۋ ءۇشىن اۋەلى بيزنەسكە قولايلى جاعداي جاساۋ تۋرالى تاپسىرعان بولاتىن. وسى ماقساتتا «بيزنەستىڭ جول كارتاسى - 2020» مەملەكەتتىك باعدارلاماسىنىڭ قولدانۋ مەرزىمى 2025 جىلعا دەيىن ۇزارتىلادى. اتالعان باعدارلامانى جۇيەلى جۇزەگە اسىرۋعا جىل سايىن رەسپۋبليكالىق بيۋدجەتتەن قوسىمشا 30 ميلليارد تەڭگە بولىنبەكشى. بۇل 22 مىڭنان استام جۇمىس ورنىن اشىپ, سالىق تۇسىمدەرىن كوبەيتۋگە جانە ءونىم ءوندىرۋ كولەمىن مەيلىنشە ۇلعايتۋعا مۇمكىندىك بەرەدى.
ايماقتا جۇمىسسىز جانە جۇمىسپەن ءىشىنارا قامتىلماعان حالىقتى ەڭبەكپەن بەلسەندى قامتۋدىڭ كەشەندى جوسپارى قولعا الىنعان. وبلىس كولەمىندە جۇمىسسىز جۇرگەندەردى جانە ءوزىن-ءوزى جۇمىسپەن قامتىعانداردى قىسقا مەرزىمدى وقۋ كۋرسىنان وتكىزۋگە بايلانىستى 25 كوللەدج بەن 6 وقۋ ورتالىعى جۇمىس ىستەيدى. تۇتاستاي العاندا, الەۋمەتتىك باستامادا اتاپ كورسەتىلگەن اۋقىمدى جوبالار جۇيەلى تۇردە جۇزەگە اسۋ ۇستىندە.
بايقال ءبايادىل,
«ەگەمەن قازاقستان»
اقمولا وبلىسى