ەلباسىنىڭ وتكەن جىلى جاريالانعان بەس الەۋمەتتىك باستاماسىندا حالىقتىڭ ناعىز كوكەيكەستى ماسەلەلەرى قوزعالعانى بەلگىلى. وسى باستاما بويىنشا اقمولا وبلىسىندا دا اتقارىلعان جانە جاڭا جىلدا اتقارىلۋعا ءتيىستى ءبىراز يگى ىستەر بار. سونىڭ ىشىندە مەملەكەت باسشىسىنىڭ باستاماسىندا ءبىرىنشى باستاما بولىپ بەلگىلەنگەن ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» باعىتى بويىنشا وڭدى شارۋالاردى الدىمەن اۋىزعا الۋعا بولادى.
باستامادا العا قويىلعان مىندەتتەردى ىسكە اسىرۋ تۇرعىسىندا بۇگىنگى كۇنگە دەيىن ەكى جۇزگە جۋىق ادامعا پاتەر ساتىپ الۋعا نەسيە بەرىلدى. بانكتەردەن وسى ماقساتقا بولىنگەن قارجى كولەمى ءبىر جارىم ميلليارد تەڭگەدەن اسىپ تۇسەدى. «7-20-25» مەملەكەتتىك باعدارلاماسىن ورىنداۋ جونىندە اقمولا وبلىسى قازىر رەسپۋبليكامىزدىڭ وزگە ايماقتارى اراسىندا العاشقى بەستىكتە تۇر.
بۇگىنگە دەيىن ەكىنشى دەڭگەيلى بانكتەرگە كەلىپ تۇسكەن 230-عا تارتا ءوتىنىشتىڭ ورىندالۋ دەڭگەيى تۇرعىسىنان الىپ قاراساق تا, وبلىس قول جەتىپ وتىرعان كورسەتكىشتەر قۇپتارلىق. شىلدەنىڭ باسىندا قولعا الىنعان «7-20-25» مەملەكەتتىك باعدارلاماسى بارعان سايىن باسپاناسى جوق اقمولالىقتاردى قىزىقتىرا تۇسۋدە. بۇل باستاما ەرەسەك تۇرعىندار, سونىمەن بىرگە, وسى الەۋمەتتىك مۇقتاجدىقتى باسىنان كەشىپ وتىرعان جاستار اراسىندا دا بىردەي قولداۋ تاپقان. بۇل ءساتتى باستالعان ءىس جاڭا 2019 جىلدا دا ورىستەي ءتۇسىپ, ەلباسىنىڭ بەس الەۋمەتتىك باستاماسىنىڭ وسى باعىتى بويىنشا باسپانالى بولاتىندار سانى ارتا تۇسەتىندىگى ايقىن.
ارينە, وسى ءبىر قولايلى مۇمكىندىكتى پايدالانعان نەسيە الۋشىلار قاتارى كوپ بولۋى ءۇشىن وبلىستا ءۇي سالۋ قارقىنى دا جىلما-جىل ارتا ءتۇسۋى قاجەت. بۇل ورايدا, وتكەن جىلى تۇرعىن ءۇي قۇرىلىسىن جۇرگىزۋدە وبلىس ءۇشىن وتە جەمىستى بولدى. 11 كوپ قاباتتى تۇرعىن ءۇي سالىنىپ, تاعى 12-ءسىنىڭ ىرگەتاسى قالاندى. بۇعان قوسا, جەكە قۇرىلىس كومپانيالارى دا مىڭعا تارتا پاتەردى پايدالانۋعا بەردى. وسىنىڭ ءبارى «7-20-25» مەملەكەتتىك باعدارلاماسىنىڭ ورىندالۋىنا دا يگى ىقپال ەتپەكشى.
بايقال ءبايادىل,
«ەگەمەن قازاقستان»
اقمولا وبلىسى