قاراعاندى وبلىستىق تاريحي-ولكەتانۋ مۇراجايىندا «ۋاقىتقا ساياحات» اتتى ينتەراكتيۆتى كورمە كەلۋشىلەرگە ەسىك اشتى. بۇل جەردە قالا تۇرعىندارى مەن قوناقتارى, وقۋشىلار سوۆەت زامانى كەزىندەگى ساعات جاساۋشى ايگىلى زاۋىتتاردىڭ ونىمدەرىن تاماشالاي الادى.
اتالعان ءىس-شارا وسكەلەڭ ۇرپاقتى ۋاقىت ولشەگىش قۇرالداردىڭ پايدا بولۋى جانە دامۋى تۋرالى تەرەڭ تاريحىمەن تانىستىرۋدى, ولاردىڭ ادام ومىرىندەگى الار ورنىن كەڭىنەن بايانداۋدى ماقسات ەتكەن.
– مۇندا سەردوبسكىدەگى «ماياك», ورلوۆتاعى «يانتار» ساعات زاۋىتتارىنىڭ جانە باسقا دا كاسىپورىنداردىڭ قابىرعاعا ىلىنەتىن, قولعا تاعاتىن ساعاتتارىن كورۋگە بولادى, – دەيدى مۇراجاي ديرەكتورىنىڭ ورىنباسارى داۋرەن ءجۇسىپوۆ.
كورمەدەگى ەڭ باعالى دەگەن جادىگەردىڭ ءبىرى – پەتەربورلىق نيكولاي ليندەننىڭ ءحىح عاسىردا جاسالعان قابىرعاعا ىلىنەتىن ساعاتى. اتاقتى كوپەس 1888 جىلى نەۆسك داڭعىلىندا زەرگەرلىك بۇيىمدار جانە ساعاتتاردى جوندەيتىن «نيكولاي ليندەن» دەپ اتالعان شەبەرحانا اشقان.
وقۋشىلار ءۇشىن مۇراجايداعى ينتەراكتيۆتى كورمەنىڭ قىزىعى مول بولماق. بالالار مۇندا كۇن, قۇم, سۋ جانە وت ساعاتتارىنىڭ الەمدەگى ەڭ العاشقى ماكەتتەرىمەن تانىسا الادى.
سونىمەن قاتار, كورمەدە ساعات شەبەرىنىڭ جۇمىس بولمەسى, عاشىقتاردىڭ كەزدەسەتىن جەرى, ساعات مەحانيزمىنىڭ قۇرىلىمى سياقتى فوتوايماق- ينستاللياتسيا ۇيىمداستىرىلعان.
قايرات ءابىلدا,
«ەگەمەن قازاقستان»
قاراعاندى