«سيريادان ەلىمىزگە قايتارىلعان ازاماتتاردان قانداي دا ءبىر قاۋىپ بار ما؟» - دەگەن سۇراققا قر سىرتقى ىستەر مينيسترلىگىندە وتكەن ءباسپاسوز ءماسليحاتىندا قر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەرديەۆ جاۋاپ بەردى.
«بۇل وپەراتسيا بىرنەشە ايعا سوزىلدى. وتە كوپ قيىنشىلىق بولدى. ارينە, جان-جاقتى ماسەلەلەر تولىققاندى تەكسەرىلدى. كوپشىلىكتى لاڭكەستىك تۇرعىدان «قايتارىلعان ازاماتتار جاعىنان قانداي دا ءبىر قاۋىپ بار ما؟» دەگەن سۇراق مازالايدى. تاعى دا ايتايىن, ول جاعىنان ءبارى دە تەكسەرىلدى. قازىرگى تاڭدا قايتارىلعان ازاماتتاردىڭ ىشىندەگى 6 ەر كىسى جانە 1 ايەلدىڭ ۇستىنەن قىلمىستىق ىستەر قوزعالدى. وسىلار جانە قايتارىلعان باسقا ازاماتتار تەرروريستىك ارەكەتتەر تۇرعىسىنان تولىعىمەن تەكسەرىلەدى. ەگەر ونداي جاعداي دالەلدەنسە, ارينە, قىلمىستىق جاۋاپكەرشىلىككە تارتىلادى», - دەدى باقىتبەك راحىمبەرديەۆ.
ونىڭ ايتۋىنشا, يراك پەن اۋعانستاننان دا قازاقستاندىقتار ەلگە قايتارىلعان.
«ول جاقتاردان دا قازاقستاننىڭ بىرنەشە ازاماتى قايتارىلعان بولاتىن. ولاردىڭ ىشىندە تەك 40 پايىزى عانا قىلمىستىق جاۋاپكەرشىلىككە تارتىلعان. قالعاندارىنا الدىن الۋ, وڭالتۋ شارالارى جۇرگىزىلگەن. سول ءۇشىن كوپشىلىك ول تۋرالى بىلە بەرمەيدى. بىراق, ءبىزدىڭ ويىمىزشا, قايتارىلعان ازاماتتاردان ازىرشە ەشقانداي تەرروريستىك قاۋىپ جوق. بۇل رەتتە, ەڭ باستى ماسەلە - كىشكەنتاي بالالاردى قايتارۋ بولدى. ويتكەنى, قايتارىلعانداردىڭ باسىم كوپشىلىگى - 1-5 جاس ارالىعىنداعى بالالار», - دەدى ول.