اتا-انادان ءجابىر كورگەن مۇعالىمنىڭ ءىسى سوتتا قارالىپ جاتىر

وسى مەكتەپ ديرەكتورىنىڭ وقۋ-تاربيە ءىسى جونىندەگى ورىنباسارى, ادىسكەر ۇستاز, بيولوگيا ءپانىنىڭ وقىتۋشىسى گۇلزيرا بايدىلداەۆا اتا-انا تاراپىنان جابىرلەنىپ, اۋىر دەنە جاراقاتىن العان بولاتىن. ءبىز بۇل جايلى «ەگەمەن قازاقستان» گازەتىنە «ۇستازعا نەگە قول جۇمسايدى؟» دەگەن تاقىرىپپەن ماقالا جاريالاعانبىز (قاراڭىز: https://egemen.kz/article/164155-ustazgha-nege-qol-zhumsaydy). وقيعانىڭ بۇدان كەيىنگى ءوربۋ بارىسى رەداكتسيا نازارىندا بولىپ, جابىرلەنۋشىنىڭ تالاپ ارىزى بويىنشا قوزعالعان تەرگەۋ ءىسى  مەن سوت وتىرىسىن ۇنەمى باقىلاۋدا ۇستاپ كەلدىك. بىراق, جىلعا جۋىق ۋاقىت وتسە دە قىلمىستىق ءىس ءالى كۇنگە دەيىن سوزىلىپ, ىلە اۋداندىق سوتىندا قارالىپ جاتىر.

«ەگەمەن قازاقستاننىڭ» مەنشىكتى تىلشىسىنە حابارلاسقان جابىرلەنۋشىنىڭ قورعاۋشىسى مارجان اسپاندياروۆا تەرگەۋ ءىسىنىڭ 11 ايعا سوزىلعانىنا قاراماستان, سوت وسى قىلمىستىق ىسكە سوڭعى نۇكتە قويۋعا اسىقپاي وتىرعانىن ايتتى. وسى مەرزىم ىشىندە ايىپتالۋشى جاقتىڭ سوت وتىرىسىنا سەبەپسىز كەلمەي قالۋ فاكتىسى بولعانىن جانە تەرگەۋ بارىسىنا كوڭىلى تولمايتىنىن دا جەتكىزدى قورعاۋشى. ءبىز 9 قاڭتار كۇنىنە بەلگىلەنگەن سوت وتىرىسىنا قاتىسىپ, ءىستىڭ ءمان-جايىمەن تانىستىق.

جالپى, بۇل ءىس الماتى وبلىسىنىڭ ىلە اۋداندىق سوتىنا كەلىپ تۇسكەنگە دەيىن اۋداندىق ىشكى ىستەر بولىمىندە 11 اي بويى تەرگەلگەن ەكەن. جابىرلەنۋشىنىڭ ادۆوكاتى تەرگەۋشى ءىستى سەبەپسىز سوزىپ, وقيعانىڭ بەينەتاسپاعا جازىلعان ءساتىن ەسەپكە الماۋعا تىرىسقانىن جانە كۋاگەرلەردىڭ تۇسىنىكتەمەسىنە نەمقۇرايلى قاراعاندىعىن ايتادى. تەك وبلىس پروكۋرورىنا بىرنەشە رەت شاعىمدانعاننان كەيىن عانا, تەرگەۋ اياقتالىپتى. ال وتكەن جىلدىڭ 20 جەلتوقسانى كۇنىنە تاعايىندالعان الدىن-الا سوت تىڭداۋىنا ايىپتالۋشى تاراپ كەلمەي قويعان. ءىستى قاراۋ  كەيىنگى شەگەرىلگەن. قىلمىستىق ءىس بويىنشا كۇدىكتى دەپ تانىلعان اتا-انا بۇدان كەيىن وتكەن 2 سوت وتىرىسىنا دا قاتىسپاعان كورىنەدى. سونىڭ سالدارىنان سوت قايتا-قايتا كەيىنگە جىلجىپ كەلەدى.

ءبىز جابىرلەنگەن ۇستاز ىسىنە مەملەكەتتىك ايىپتاۋشى رەتىندە قاتىسىپ وتىرعان پروكۋروردان تەرگەۋ مەن سوت بارىسىنداعى زاڭدىلىق ساقتالۋى جايىندا سۇراعان ەدىك.

- ازاماتشا گۇلزيرا بايدىلداەۆانىڭ تالابى بويىنشا قىلمىستىق ءىستى قاراۋ بىرنەشە رەت كەيىنگە قالدىرىلعانى راس. بۇل جەردە ايىپ تاعىلىپ وتىرعان تاراپتىڭ دەنساۋلىعىنا بايلانىستى انىقتاماسى بولعاندىقتان ءىس شەگەرىلدى. قازىر سوت جابىرلەنۋشى تاراپ پەن كۋاگەرلەردەن جاۋاپ الۋدى باستادى. ءىس ازاماتشا ميتروشەنكو نادەجدا پاۆلوۆناعا قاتىستى «قىلمىستىق كودەكستىڭ» 107-بابى, 1-تارماعىمەن «قاساقانا دەنە جاراقاتىن سالۋ» بويىنشا قارالىپ جاتىر, - دەدى ىلە اۋداندىق پروكۋراتۋراسىنىڭ اعا پروكۋرورى مۇحتار مىڭجاسار.

ال سوتتىڭ 9 قاڭتار كۇنگى وتىرىسى قورعاۋشىنىڭ قوسىمشا كۋالاردان جاۋاپ الۋدى سۇراعان وتىنىشىنە وراي 15 قاڭتارعا شەگەرىلدى.

جالپى,  گۇلزيرا بايدىلداەۆانىڭ تالاپ ارىزى نەگىزىندە قوزعالعان قىلمىستىق ءىس – ەلىمىزدىڭ سوت جانە ءبىلىم سالاسى تاريحىندا اتا-انا تاراپىنان ءجابىر كورگەن مۇعالىمنىڭ سوتقا جۇگىنۋ بويىنشا العاشقى ءىس. جابىرلەنۋشى ۇستاز ءىستىڭ تەزىرەك اياقتالىپ, ادىلەت سالتانات قۇراتىنىنا سەنىمدى.

- اۋىر سوققىدان كەيىن ۇزاق ەمدەلدىم. دەنساۋلىعىما كەلگەن نۇقسان ءالى وڭالمادى. قۇلاقتىڭ ەستۋ جۇيەسىندە سوققىدان كەيىن بولعان كەمىستىكتىڭ ەمى جوق دەدى دارىگەر. ءارى مەن وسى وقيعادان كەيىن ول مەكتەپتەن كەتىپ, باسقا جەرگە جۇمىس اۋىستىرۋىما تۋرا كەلدى. جانە 1 جىل بويىنا وقۋشىنىڭ اتا-اناسى تاراپىنان تاتۋلاسۋ, كەشىرىم سۇراۋ نيەتى بولعان جوق. كەرىسىنشە, سوت وتىرىسىنان كەيىن دورەكى سويلەپ, دوق كورسەتىپ كەتتى...- دەيدى ۇستاز.

ارينە, ۇزاق ۋاقىت بويى قوعامدىق تالقىلاۋعا ۇلاسقان بۇل وقيعانىڭ سوڭعى نۇكتەسىن ەندى سوت قويادى. ءبىز ءوز تاراپىمىزدان ءىس بارىسى «ەگەمەن قازاقستاننىڭ» نازارىندا بولاتىنىن ەسكەرتەمىز.

قالماحانبەت مۇقامەتقالي,

«ەگەمەن قازاقستان»

الماتى وبلىسى,

ىلە اۋدانى

سۋرەت «الماتى» ارناسىنان الىندى