استاناداعى ورتاشا ايلىق نومينالدى جالاقى – 230 مىڭ تەڭگە. استانا قالاسى ستاتيستيكا دەپارتامەنتىنىڭ جەتەكشىسى مىندەتىن اتقارۋشى جانار سەرىكباەۆا بۇل دەرەككە قاتىستى تۇسىنىكتەمە بەردى.
ونىڭ ايتۋىنشا, بۇل ساندار قالادا رەسمي تىركەلگەن مەكەمە, ۇلتتىق كومپانيالار مەن مينيسترلىكتەر جانە ۇلكەن كاسىپورىندار توقسان سايىن تاپسىراتىن ستاتيستيكالىق تالداۋ ناتيجەلەرى بويىنشا (ەڭبەك بويىنشا ەسەپ) انىقتالادى.
ستاتيستيكا دەپارتامەنتىنىڭ مالىمەتىنشە, استانادا 2019 جىلدىڭ 1 قاڭتارىنا دەيىن 73 مىڭنان اسا زاڭدى تۇلعا, فيليالدار مەن وكىلدىكتەر جانە 98 مىڭعا جۋىق جەكە كاسىپكەر تىركەلگەن.
«2018 جىلدىڭ قاڭتار-قىركۇيەك ايلارىندا استانادا ءبىر قىزمەتكەردىڭ ورتاشا ايلىق نومينالدى جالاقىسى 233163 تەڭگەنى قۇرادى. بۇل دەرەكتەر توقسان سايىن قالادا تىركەلگەن كاسىپورىندار مەن زاڭدى تۇلعالاردان جينالاتىن ستاتيستيكالىق ەسەپكە نەگىزدەلگەن. ول ەسەپ 1-ت دەپ اتالاتىن فورما نەگىزىندە ەسەپتەلەدى. ءارى قاراي ءبىر قىزمەتكەردىڭ ورتاشا ەڭبەكاقىسىن ەسەپتەيمىز. ول ەسەپتەلگەن جالاقى قورىنىڭ سوماسىن (لاۋازىمدىق جالاقىلار, قوسىمشا اقىلار, ۇستەمە اقىلار, سىياقىلار جانە ىنتالاندىرۋشى جانە وتەماقى سيپاتتاعى وزگە دە تولەمدەر) سالىقتاردى ەسكەرە وتىرىپ, قىزمەتكەرلەردىڭ ناقتى سانىنا جانە ەسەپتى كەزەڭدەگى ايلاردىڭ سانىنا ءبولۋ جولىمەن انىقتالادى», دەدى جانار سەرىكباەۆا.
سونداي-اق, ول قازاقستاننىڭ ەلورداسىندا بارلىق ءىرى كاسىپورىنداردىڭ, ۇلتتىق كومپانيالاردىڭ, مينيسترلىكتەردىڭ, شاعىن جانە ورتا بيزنەس سۋبەكتىلەرىنىڭ باس كەڭسەلەرى بار ەكەنىن ەسكەرۋ قاجەت ەكەنىن اتاپ ءوتتى.
ورتاشا ايلىق جالاقى تۋرالى رەسمي ستاتيستيكالىق مالىمەتتەردى stat.gov.kz سايتىنان كورۋگە بولادى.