«The Points Guy» باسىلىمى جاقىندا «قازاقستاندا قۇرمەتتى قوناقتارعا قوي ميى تارتىلادى نەمەسە باسقا دا تاجىريبەلەر» دەگەن تاقىرىپپەن كولەمدى ماقالا جاريالادى. نازارلارىڭىزعا ماقالانىڭ قىسقاشا مازمۇنىن ۇسىنىپ وتىرمىز.
نەگە قازاقستان؟
جەر كولەمى بويىنشا الەمدە توعىزىنشى ورىن الاتىن مەملەكەت بولعاندىقتان, قازاقستاننىڭ تاۋلارى مەن جازىقتارى ساياحاتشىنىڭ ءار ءتۇرلى سۇرانىسىن قاناعاتتاندىرادى. مۇندا ساياحاتشىلار كوپتەگەن توسىن سىيلاردى كەزدەستىرە الادى.
بىراق قازاقستانعا كەلۋدىڭ ەڭ جاقسى سەبەپتەرىنىڭ ءبىرى قازاقتىڭ كەرەمەت قوناقجايلىعى بولسا كەرەك. قازاق حالقىنىڭ وتە شىرايلى جانە شىنايى, ءارى قوناقجاي حالىق ەكەنىن كەز كەلگەن جەردەن كورۋگە بولادى. شىن مانىندە, قازاق حالقى قوناقتارىنىڭ كوڭىلىنەن شىعۋ ءۇشىن بارىن سالادى. داستارحاننان ءتۇرلى ءدامدى كەزدەستىرۋگە بولادى, ءتىپتى قويدىڭ ميىن دا (بۇل تۋرالى كەيىنىرەك).
قازاقستاننىڭ تۋريستىك ورىندارى
قايىڭدى كولىنىڭ اعاشتارى قايران قالدىرادى
ءمولدىر سۋ جانە تاۋلى جەردىڭ كەرەمەت تابيعاتى قايىڭدى كولىنە ءۇشىن بارۋ ءۇشىن جەتكىلىكتى بولار ەدى, الايدا سۋ ىشىندە وسكەن اعاشتار كولدىڭ ءسانىن ودان ءارى اسقاقتاتا تۇسكەندەي. 1911 جىلعى جەر سىلكىنىسى تابيعي بوگەتتەردى قۇلاتىپ جانە قاردىڭ ەرۋى وسىنداي ادەمى كولدىڭ پايدا بولۋىنا اكەلدى. كولدىڭ سۋىق سۋى اعاشتاردى عاسىردان استام ۋاقىت بويى ساقتاۋعا كومەكتەستى.
التىن ادام
1969 جىلى ەسىك قورعانىنان 2000 جىلدان استام تاريحى بار التىنمەن كومكەرىلگەن مۋميا تابىلدى. بۇل «ەر ادام» (جىنىسى ناقتى بەلگىسىز) وتە قۇندى مۇرا, بىراق كسرو مۇنى ەلەۋسىز قالدىردى. الايدا ول قازاق تاريحىنىڭ, ماقتانىش پەن تاۋەلسىزدىكتىڭ سيمۆولىنا اينالدى.
قوجا احمەت ياساۋي
ياساۋي ولىمىنەن كەيىن 200 جىلدان سوڭ, ياعني 14-عاسىردا سالىنعان قوجا احمەت ياساۋي كەسەنەسى الەمدەگى تەڭدەسسىز تۋىندىلاردىڭ ءبىرى. تۇركىستان قالاسىندا ورنالاسقان عيمارات – ورتا عاسىرلىق ساۋلەت ونەرىنىڭ كورنەكتى ەسكەرتكىشى. ول XII عاسىردا ءومىر سۇرگەن, بۇكىل شىعىسقا اتى ايگىلى كونە تۇركى اقىنى, ءسۋفيزمدى ۋاعىزداۋشى احمەت ءياساۋيدىڭ قۇرمەتىنە سالىنعان.
الماتى قالاسى
قازاقستاننىڭ ەڭ كوسموپوليتيكالىق قالاسى - نيۋ-يوركتىڭ نۇسقاسى. الماتى حالقى تىعىز ورنالاسقان. مۇندا مەيرامحانالار مەن تۇنگى ءومىردىڭ كەرەمەتىن تاماشالاي الاسىز. اپورت المانىڭ وتانى سانالاتىن بۇل ايماقتىڭ اتاۋى دا المامەن تىكەلەي بايلانىستى.
قازاق اسحاناسى
ادەمى, تابيعي كورىكتى جەرلەر مەن تاريحي ەسكەرتكىشتەردەن باسقا, قازاق اسحاناسى دا ءتۇرلى تاعامعا باي. مۇندا ءسىز مەيرامحانا مازىرىنەن ەت تاعامىن دا تابا الاسىز. ەت - قازاقستاننىڭ ۇلتتىق تاعامى, ادەتتە جىلقى ەتىنەن دايىندالادى جانە كەسپە قوسىلادى. قازاقستاندا جىلقى ەتى مەن ءسۇتىن پايدالانۋ سيىر ەتى مەن ءسۇتىن پايدالانۋ سياقتى كەڭ تاراعان.
ال ۇيلەنۋ تويى مەن تۋعان كۇن سياقتى سالتاناتتى ءىس-شارالاردا قۇرمەتتى قوناقتارعا كوبىنە پىسىرىلگەن, قايناتىلعان قوي باسىنىڭ ءتۇرلى بولىكتەرىن, ونىڭ ىشىندە مي, كوز جانە ءتىل ۇسىنادى.
اتىشۋلى بورات
مەن بۇل كەيىپكەر تۋرالى ايتقىم كەلمەدى, بىراق ول تۋرالى مەنەن كوپ ادام سۇرادى. قازاقستان تۋرالى وقىعان كەزدە ادامداردىڭ كوبىسى بورات تۋرالى ويلاعان دەپ سەنىممەن ايتا الامىن. وزدەرىڭىز بىلەتىندەي, بورات - تولىق ويدان شىعارىلعان كەيىپكەر, قازاقستانعا مۇلدەم قاتىسى جوق. ال بۇل فيلمىندەگى كورىنىستەر رۋمىن اۋىلىندا تۇسىرىلگەن.
ساياحاتتاۋعا قاي كەز قولايلى؟
جاز مەزگىلى ادەتتە قازاقستانعا بارۋ ءۇشىن ەڭ قولايلى ۋاقىت. ءسىز تازا اۋادا راحاتتانىپ دەمالا الاسىز. الايدا ەلدىڭ وڭتۇستىك ايماقتارىندا بۇل ۋاقىتتا تەمپەراتۋرا وتە جوعارعى دەڭگەيگە دەيىن كوتەرىلەدى.
ەلدىڭ شىعىس پەن سولتۇستىك وڭىرلەرىندە قىس قاراشادان ساۋىرگە دەيىن سوزىلادى, ال قىستا ەڭ سۋىق كۇندەر مينۋس 40 گرادۋستان تومەن ءتۇسۋى مۇمكىن. شىمبۇلاق دەمالىس ورنى تۋريستەر ءۇشىن تاپتىرماس ورىن. كۋرورت الماتىدان وڭتۇستىككە قاراي 20 مينۋتتىق جەردە ورنالاسقان, جانە اسپالى جول بيلەتتەرىنىڭ قۇنى $10-دان $ 22-گە دەيىن وزگەرەدى. سونداي-اق مەدەۋ مۇز ايدىنى دا ءوزىنىڭ ادەمىلىگىمەن تۋريستەردى تاڭ قالدىرادى.
ءمادينا جالەلقىزى,
«ەگەمەن قازاقستان»