بۇگىندە ەلىمىزدەگى ءبىلىم بەرۋ جۇيەسىن جاڭا مازمۇندا قۇرۋ, مۇعالىمدەردىڭ بىلىكتىلىگىن ارتتىرۋ باستى ماسەلە بولىپ وتىر. وسى ورايدا, اسىرەسە, وڭىرلەردەگى ۇستازداردىڭ بىلىكتىلىگىنە ءمان بەرۋ, سول ارقىلى ولاردى مەملەكەت تاراپىنان قولداۋ جوعارى دەڭگەيدە جۇزەگە اسىپ وتىرعانىن دا ايتىپ ءوتۋ كەرەك.
مۇنىڭ ءبىر دالەلى, 2005 جىلدان بەرى ەلىمىزدىڭ ءبىلىم جانە عىلىم مينيسترلىگىنىڭ ۇيىمداستىرۋىمەن ۇستازدار اراسىندا «جوعارى وقۋ ورنىنىڭ ۇزدىك وقىتۋشىسى» رەسپۋبليكالىق كونكۋرسى ءوتىپ كەلەدى. بۇل بايقاۋدىڭ وتكەن جىلعى قورىتىندىسى بويىنشا م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ 8 وقىتۋشىسى «جوعارى وقۋ ورنىنىڭ ۇزدىك وقىتۋشىسى» اتاعىنا يە بولعان ەدى.
رەسپۋبليكالىق كونكۋرس جەڭىمپازدارى قاتىسقان جيىن بارىسىندا ۋنيۆەرسيتەت رەكتورى ماحمەتعالي سارىبەكوۆ بۇل كونكۋرسقا رەسپۋبليكامىزدىڭ 80 جوعارى وقۋ ورنىنان 481 ۇمىتكەر قاتىسقانىن, ناتيجەسىندە ەلىمىزدىڭ 43 جوعارى وقۋ ورنىنان 200 ادام «جوعارى وقۋ ورنىنىڭ ۇزدىك وقىتۋشىسى» اتاعىنىڭ يەگەرى اتانعانىن ايتىپ ءوتتى. رەكتوردىڭ ايتۋىنشا, كونكۋرس باستالعالى بەرى ۋنيۆەرسيتەتتەن بۇل قۇرمەتتى اتاقتى 56 ادام يەلەنگەن ەكەن. ال وسى كۇنگە دەيىن ۋنيۆەرسيتەت تاريحىندا بىردەن 8 ادام بۇل اتاققا تۇڭعىش رەت يە بولعان.
«بۇل ءۇشىن تەك جاقسى مۇعالىم بولۋ جەتكىلىكسىز. اۋەلى مۇعالىم جاقسى ادىسكەر بولۋ كەرەك. ولاردىڭ جازبا وقۋلىقتار دايىنداۋعا قابىلەتى بولۋى جانە مىندەتتى تۇردە عىلىمي مەكتەبى قالىپتاسقان عالىم بولۋى كەرەك. شەتەلدىڭ جوعارى وقۋ ورىندارىمەن بايلانىسى بولۋ كەرەك. بۇگىنگى تاڭدا ءبىزدىڭ ۋنيۆەرسيتەتتە 15 ماماندىق بويىنشا 3 تىلدە ءبىلىم بەرىلەدى. ياعني, 47 مۇعالىم ستۋدەنتتەرگە 3 تىلدە ءدارىس بەرەدى» دەدى ماحمەتعالي نۇرعالي ۇلى.
بۇگىندە م.ح.دۋلاتي اتىنداعى تاراز مەملەكەتتىك ۋنيۆەرسيتەتى 64 شەتەلدىك جوعارى وقۋ ورنىمەن كەلىسىمشارتقا قول قويىپتى. سونىمەن قاتار, پورتۋگاليا مەملەكەتىنىڭ جوعارى وقۋ ورىندارىمەن قوسديپلومدى جوباسىن دا قولعا الىپتى. بۇدان كەيىن ۋنيۆەرسيتەتتىڭ مۇناي, گاز جانە مەحانيكا فاكۋلتەتى, «مەحانيكا جانە ماشينا جاساۋ» كافەدراسىنىڭ پروفەسسورى, تەحنيكا عىلىمدارىنىڭ دوكتورى ساعات جۇنىسبەكوۆ, «مۇناي-گاز ءىسى» كافەدراسىنىڭ پروفەسسورى, تەحنيكا عىلىمدارىنىڭ دوكتورى يسان تىلەگەنوۆ, «تۋريزم جانە سەرۆيس» كافەدراسىنىڭ دوتسەنتى, ەكونوميكا عىلىمدارىنىڭ كانديداتى التىناي مولداشەۆا, «جەڭىل ونەركاسىپ بۇيىمدارىنىڭ تەحنولوگياسى مەن كونسترۋكتسيالاۋ جانە ديزاين» كافەدراسى دوتسەنتىنىڭ مىندەتىن اتقارۋشى, PhD دوكتورى بەكجان ابزالبەك ۇلى جانە وزگە دە جەڭىمپاز وقىتۋشىلار ءوز ويلارىمەن ءبولىسىپ, جۋرناليستەردىڭ سۇراقتارىنا جاۋاپ بەردى. سونىمەن قاتار, ولار پروفەسسور-وقىتۋشىلار قۇرامىن قولداۋ ماقساتىندا وتكەن كونكۋرستا ۇمىتكەرلەردىڭ عىلىمي-پەداگوگيكالىق قىزمەتى ساپالىق جانە ساندىق كورسەتكىشتەرى بويىنشا باعالانعانىن, سەرتيفيكات پەن توسبەلگىدەن بولەك, «ۇزدىك جوعارى وقۋ ورىندارىنىڭ وقىتۋشىلارىنا» ارنايى گرانت بەرىلگەندىگىن, بۇل گرانت جەڭىمپازدارعا الەمنىڭ جەتەكشى ۋنيۆەرسيتەتتەرىندە عىلىمي-زەرتتەۋ جۇمىستارىن جۇرگىزۋ مەن بىلىكتىلىگىن ارتتىرۋ ماقساتىندا تاعىلىمدامادان وتۋگە مۇمكىندىك بەرەتىندىگىن ايتىپ ءوتتى.
حاميت ەسامان,
«ەگەمەن قازاقستان»
جامبىل وبلىسى