«2019 جىل باستالعالى بەرى باتىس قازاقستان وبلىستىق توتەنشە جاعدايلار دەپارتامەنتى قىزمەتكەرلەرى جەرگىلىكتى اتقارۋشى ورگاندارمەن بىرلەسە جولدا قالعان 84 ماشينانى ەۆاكۋاتسيالاپ, 137 ادامدى قۇتقاردى» دەپ حابارلايدى تجد ءباسپاسوز قىزمەتى.
اق جايىق وڭىرىندە جاڭا جىل كەلگەلى اۋا رايى ءجيى بۇزىلىپ, بورانداتىپ تۇر. وسىعان بايلانىستى باتىس قازاقستان وبلىسى توتەنشە جاعدايلار دەپارتامەنتى جەرگىلىكتى تۇرعىندارعا اۋا رايىنىڭ كۇرت بۇزىلاتىنى, كولىك جولدارىنىڭ جابىلاتىنى تۋرالى الدىن الا ەسكەرتىپ, جولعا شىعۋدان ساقتاندىرۋمەن بولدى.
جىل باسىنان باتىس قازاقستان وبلىسى توتەنشە جاعدايلار دەپارتامەنتى بىرىڭعاي جەدەل-قۇتقارۋ قىزمەتى باسقارماسى حالىققا 21 سمس حابارلاما جىبەرگەن ەكەن. بۇل حابارلامانىڭ باسم كوپشىلىگى, ياعني 20-سى ءتۇرلى باعىتتاعى جولداردىڭ جابىلعاندىعى تۋرالى بولعان.
ماسەلەن, 5 قاڭتاردا وبلىستا بۇرقاسىن جەل تۋرالى ەسكەرتۋ جاريالاندى جانە سول كۇنى ساعات 11.00-دەن باستاپ اۋا رايى جاعدايىنىڭ ناشارلاۋىنا وراي «قازاۆتودور» جشس باتىس قازاقستان وبلىستىق فيليالى اۆتوكولىكتىڭ بارلىق ءتۇرى بويىنشا وبلىستىڭ بارلىق باعىتىنداعى رەسپۋبليكالىق جانە وبلىستىق ماڭىزى بار جولداردا قوزعالىستى جابۋ تۋرالى حابارلاعان ەدى.
«وكىنىشكە قاراي, اۆتوكولىك جۇرگىزۋشىلەرىنىڭ ءبارى بىردەي قۇتقارۋشىلاردىڭ ۇندەۋىنە قۇلاق اسا بەرمەيدى, ناتيجەسىندە ءتۇرلى جاعداي ورىن الدى» دەيدى توتەنشەلىىكتەر. ابىروي بولعاندا كولىكتەر مەن ادامدار دەر كەزىندە قۇتقارىلعان. جوعارىدا ايتىلعان قۇتقارىلعان 137 ادامنىڭ 14-ءى – كامەلەتكە تولماعان بالالار ەكەن.
بۇگىندە جەرگىلىكتى اتقارۋشى ورگاندار مەن ءتيىستى مەكەمەلەر توتەنشە جاعدايلاردى بولدىرماۋ ماقساتىندا باتىس قازاقستان وبلىسىنىڭ رەسپۋبليكالىق, وبلىستىق جانە اۋداندىق ماڭىزى بار اۆتوموبيل جولدارىندا قاردان تازالاۋ جۇمىستارى جۇرگىزىلدى. قازىرگى تاڭدا اۆتوموبيل جولدارىن قىسقى كۇتىپ ۇستاۋ بويىنشا جۇمىستار جالعاسۋدا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان