باتىس قازاقستان وبلىسىنان 2018 جىلى مەديتسينالىق ساقتاندىرۋ قورىنا تۇسكەن جارنا كولەمى 4,2 ملرد تەڭگەنى قۇرادى. بۇل جونىندە «الەۋمەتتىك مەديتسينالىق ساقتاندىرۋ قورى» كەاق بقو بويىنشا فيليالى ءباسپاسوز قىزمەتى حابارلادى.
جالپى ەلىمىز بويىنشا جۇيە ىسكە قوسىلعان 2017 جىلدىڭ 1 شىلدەسىنەن 2018 جىلدىڭ 31 جەلتوقسانىنا دەيىن جيناقتالعان جارنانىڭ جالپى سوماسى 133 ملرد تەڭگە بولعان. باتىس قازاقستان وبلىسىنىڭ ۇلەسى ورتاق قوردىڭ 3,16%-ىن قۇرايدى.
مەديتسينالىق ساقتاندىرۋ قورىنا تۇسكەن قارجىنىڭ 93,5%-ى, ياعني 124,3 ملرد تەڭگەسى جۇمىس بەرۋشىلەردىڭ اۋدارىمدارى بولسا, قالعان 8,7 ملرد تەڭگە (6,5% جۋىعى) – جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى.
«جيناقتالعان قارجى ۇلتتىق بانكتە ساقتالادى. بولاشاقتا ءمامس پاكەتى شەڭبەرىندەگى قىزمەتتەر اقىسىن تولەۋگە جۇمسالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن» دەلىنگەن «الەۋمەتتىك مەديتسينالىق ساقتاندىرۋ قورى» كەاق بقو بويىنشا فيليالى تاراتقان ءباسپاسوز پاراعىندا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان