بيكەن ريموۆا اتىنداعى تالدىقورعان تەاترىندا دراماتۋرگ تۇرلىبەك مامەسەيىتتىڭ «قۇلقىننىڭ ق ۇلى» اتتى دراماسى ساحنالاندى. بۇگىنگى قوعامنىڭ وزەكتى ماسەلەسىن كوتەرگەن ۋىتتى شىعارما اكتەرلەر قۇرامىنىڭ شەبەرلىگىمەن ادىپتەلىپ, كورەرمەندەر تاراپىنان ىلتيپاتقا يە بولدى.
«قۇلقىننىڭ ق ۇلى» – سىبايلاس جەمقورلىق جايلاعان ورتانىڭ شىندىعىن اشقان شىعارما ەكەن. اۆتور پەسانىڭ نەگىزگى كىلتى رەتىندە اۋىلداعى الەۋمەتتىك جاعداي مەن جەڭ ۇشىنان جالعاسقان جەمقورلاردىڭ ءىس-ارەكەتىن شەنەيدى. بۇل شىعارمانىڭ تاعى ءبىر ەرەكشەلىگى بار. وسى كەزەڭگە دەيىن ساحنالىق قويىلىمداردا جەرگىلىكتى بيلىك وكىلىنىڭ جاعىمسىز بەينەسىن كورسەتەتىن وبراز جوققا ءتان ەدى. مىسالعا, اۋىل اكىمىنىڭ جەر ساتىپ, پارا الىپ, ودان قالدى قورعانسىز قىزدى قورلاۋى جايلى اششى سيۋجەت ادەبي جازبالاردا كەزدەسپەگەنى انىق. بۇل تۇرعىدا تۇرلىبەك مامەسەيىتتىڭ دراماسى زامان ادامىنىڭ بەينەسىن اشىپ, قوعامنىڭ كەسەلىن ءدوپ باسىپ كورسەتە الۋىمەن قۇندى.
...اۋىل اكىمى قايىربەك سىبايلاس دەلدالدىڭ دەم بەرۋىمەن مەملەكەت مەنشىگىندە القاپتاردى ءبولىپ, قىمبات باعاعا جەر ساتۋدى ادەتكە اينالدىرادى. وڭاي ولجا مەن قامپايعان قالتانىڭ بۋى اكىم ءۇشىن تۋعان جەر, ادام قۇندىلىعى سياقتى قاسيەتتى شەكتەۋلەردىڭ تۇككە تۇرمايتىنىن, ءومىر تەك بايلىق پەن بيلىككە عانا نەگىزدەلگەنىن ۇقتىرعانداي. تيىننان تيىن ساۋىپ, ەبىن تاپسا ادامنىڭ ار-ۇياتىن ساتىپ الۋعا بولاتىنىن ىسىمەن دالەلدەپ جۇرگەن احمەتتىڭ الدىنان ۇنەمى قاراۋ نيەتتى اكىم, پايدا ىزدەگەن كاسىپكەر, اقشاعا قۇنىققان شەنەۋنىك شىعىپ وتىرادى. ول وسى جولدا استانادان ارنايى كەلگەن قالتالى ادامعا اۋىلدىڭ قاراپايىم قىزى, سۇلۋ دا اقىلدى ءمادينانىڭ ارىن اياققا تاپتاتىپ, قورلىققا بەرۋدەن دە تايىنبايدى...
درامانىڭ شارىقتاۋ شەگىندەگى وقيعالار وسىلاي ءوربىپ كەلىپ, ادىلەت سوتىنىڭ ۇكىمى شىققانشا تۇتاس ءبىر ۇرپاقتىڭ تاعدىرى تالقان بولىپ, كەزدەيسوق ادامداردىڭ قۇرباندىققا شالىنىپ كەتۋىنەن ساقتاندىرۋعا تىرىسادى. جالپى, درامانىڭ ومىرشەڭدىگى وسىنداي تاۋەكەلدى شەشىممەن اياقتالۋى بولسا كەرەك. وسىلايشا, رەجيسسەر, حالىق ءارتىسى ەرسايىن تولەۋباي ساحنالاعان «قۇلقىننىڭ ق ۇلى» تالدىقورعاندىق كورەرمەننىڭ كوڭىل تورىنەن ورىن العانى انىق.
قالماحانبەت مۇقامەتقالي,
«ەگەمەن قازاقستان»
الماتى وبلىسى