كوممۋنالدىق قىزمەتكە قاتىستى اقپاراتتار, تۇرعىن ءۇيدى جوندەۋ, اۋماقتى تازارتۋ, جارىقتاندىرۋ جۇمىستارىنا جينالعان قاراجاتتىڭ قايدا, قالاي جۇمسالعانى تۋرالى اتىراۋلىقتار ەندى ينتەرنەتتەن بىلە الادى. قالادا «ە-پيك» پورتالى ىسكە قوسىلدى.
پيلوتتىق جوبا پاتەر يەلەرى كووپەراتيۆتەرىنىڭ دە جۇمىستارىن جەڭىلدەتەدى. بۇرىنعىداي بەلگىلى ءبىر شەشىمدى قابىلداۋ ءۇشىن جۇرتتى جيناپ جينالىس وتكىزىپ نەمەسە ءار پاتەردى ارالاپ, جوندەۋ جۇمىستارىنىڭ باستالاتىن ۋاقىتىن ايتىپ ۋاقىت شىعىندامايدى. اقپارات الماسۋدىڭ بىرىڭعاي پلاتفورماسى ارقىلى ءبارىن ينتەرنەتتىڭ كومەگىمەن جۇزەگە اسىرۋعا بولادى.
اتىراۋ قالاسى اكىمدىگى ءباسپاسوز قىزمەتىنىڭ مالىمەتىنە سۇيەنسەك, وبلىس ورتالىعىنداعى 71 پيك جانە باسقارۋشى كومپانيالار «اتىراۋ-اشىق قالا» پورتالى ارقىلى «ە-پيك» باعدارلاماسىمەن جۇمىس ىستەيدى.
-بۇل جوبا تۇرعىندار مەن پيك, باسقارۋشى كومپانيالار, كوممۋنالدىق قىزمەتتەر مەن بيلىك ورگاندارى اراسىنداعى بايلانىستى نىعايتادى. «تسيفرلى قازاقستان» باعدارلاماسى اياسىندا بىرىڭعاي بايلانىس جۇيەسى جاسالدى, - دەيدى اقپاراتتىق تەحنولوگيالار جانە مەملەكەتتىك قىزمەتتەردى باقىلاۋ ءبولىمىنىڭ باسشىسى سامات ەمبەرگەن. – پورتال كومەگىمەن اتىراۋ قالاسىنىڭ ءار تۇرعىنى جەكە شوت اشىپ, پايدالانۋشىعا تيەسىلى ءۇي تۋرالى, كوممۋنالدىق قىزمەتتەر تۋرالى تولىق اقپارات الادى.
قازىردىڭ وزىندە «ە-پيك» باعدارلاماسى بويىنشا تۇرعىنداردان 34 ءوتىنىم ءتۇسىپ, ءبارى دە وڭدەلگەن. پورتالدا جوسپارلانعان جۇمىستارمەن تانىسىپ, تۇرعىنداردىڭ پىكىر بىلدىرۋلەرى ءۇشىن دە مۇمكىندىك قاراستىرىلعان.
باقىتگۇل باباش,
«ەگەمەن قازاقستان»
اتىراۋ