ماڭعىستاۋ وبلىسىنىڭ كاسىپكەرلەر پالاتاسى جانىنان قۇرىلعان كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى كۇرەس كەڭەسى 2018 جىلى اتقارعان جۇمىسى تۋرالى ەسەپ بەردى.
كەڭەس وبلىس كاسىپكەرلەرىنىڭ زاڭدى مۇددەلەرىن قورعاۋ, تۋىنداعان كۇردەلى ماسەلەلەردىڭ ءتۇيىنىن ءتيىمدى, جۇيەلى جانە شۇعىل شەشۋ, سونىمەن قاتار ەلدەگى بيزنەستىڭ دامۋىندا قيىنشىلىق تۋىنداتاتىن ماسەلەلەردى قالىڭ بۇقاراعا جاريالاۋ ماقساتىندا قۇرىلعان بولاتىن.
ونىڭ نەگىزگى مىندەتى - كاسىپكەرلەردىڭ قۇقىقتارىن قورعاۋ مەن كاسىپكەرلىك سالانىڭ ەركىندىگى, زاڭنامالار مەن قۇقىق قولدانۋ تاجىريبەسىن جەتىلدىرۋ بويىنشا ۇسىنىستار ەنگىزۋ, كاسىپكەرلىككە نەگىزسىز ارالاسۋ فاكتىلەرىن بولدىرماۋ. كەڭەس ماڭعىستاۋ وبلىسىنىڭ كاسىپكەرلەرىنە ءادىل شەشىمدەر ىزدەپ جانە ونىڭ جۇيەلى شەشىلۋىنە ات سالىسىپ كەلەدى.
قازىر كەڭەس قۇرامىندا وبلىستىق پروكۋراتۋرا, مەملەكەتتىك قىزمەت ىستەرى, تابيعي مونوپوليالاردى رەتتەۋ دەپارتامەنتتەرى وكىلدەرى, زاڭگەرلەر, كاسىپكەرلەر مەن قوعام قايراتكەرلەرىنەن قۇرالعان 13 مۇشە بار.
كەڭەس توراعاسى شىمباي سۇلتانوۆتىڭ ايتۋىنشا, 2018 جىلى كەڭەستىڭ 11 وتىرىسى ءوتىپ, 22 تۇيىتكىلدى ماسەلە تالقىلاندى. وندا قارالعان ماسەلەلەر قيىندىق تۋىنداعان ىسكەردىڭ عانا ەمەس, سول سالادا جۇمىس ىستەيتىن كاسىپكەرلەردىڭ بارلىعىنا وڭ ىقپال ەتتى.
ماسەلەنىڭ ماڭىزدىلىعىنا قاراي وبلىستىڭ اتقارۋشى ورگاندارى باسشىلارى مەن مۇددەلى مەملەكەتتىك مەكەمەلەر جەتەكشىلەرىنىڭ قاتىسۋىمەن كوشپەلى وتىرىستار ءوتتى. جينالىس قورىتىندىسىندا ءتيىستى شەشىمدەر قابىلدانىپ, كاسىپكەرلەردىڭ قۇقىقتارىن بۇزعانى ءۇشىن جاۋاپتى لاۋازىمدى تۇلعالاردى جاۋاپكەرشىلىككە تارتۋ تۋرالى ۇسىنىستار جاسالدى. مىسالى, كەڭەستىڭ كوشپەلى وتىرىستارىنىڭ بىرىندە «تسەنتركرەديتبانكى» اق ديرەكتورىنىڭ جەر تىركەۋ كەزىندە اقتاۋ قالاسى اكىمدىگىنىڭ لاۋازىمدى تۇلعالارىنىڭ زاڭسىز ءىس-ارەكەتتەرىنە قاتىستى ءوتىنىشى قارالعان. ونىڭ ناتيجەسىندە ماڭعىستاۋ وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنە ۇسىنىس جىبەرىلدى. ادەپ جونىندەگى كەڭەس «اقتاۋ جەر قاتىناستار ءبولىمى» مم باسشىسىنا «ەسكەرتۋ» تۇرىندە تارتىپتىك شارا قولداندى.
«سىبايلاس جەمقورلىققا قارسى كۇرەس تۋرالى» زاڭ حالىققا كەڭىنەن ءتۇسىندىرىلىپ, ونى ورىنداۋ باعىتىندا وڭىرلىك كاسىپكەرلەر پالاتاسى ەلەۋلى جۇمىستار اتقاردى.
وتكەن جىلى ينۆەستيتسيالىق جانە بيزنەس ورتادا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا كاسىپكەرلەردى سۇيەمەلدەۋگە باعىتتالعان كەزدەسۋ ءوتىپ, 4 شەتەلدىك جانە وتاندىق ينۆەستورلار مەن كاسىپكەرلەر مەموراندۋمعا قول قويدى.
«TS Construction» جشس مەن «وبلىستىق ءبىلىم باسقارماسى» مم اراسىندا بالاباقشاعا كۇردەلى جوندەۋ جۇرگىزۋ شارتىمەن سەنىمگەرلىك باسقارۋعا بەرۋ تۋرالى كەلىسىم جاسالادى. بۇل ماسەلەنى قاراستىرعاندا, ەكەۋارا شارتتا ولقىلىقتار مەن كەمشىلىكتەر انىقتالىپ, زاڭ بۇزۋشىلىقتارعا جول بەرىلگەنى بەلگىلى بولدى. وسىلايشا, كەلىسىمشارت تالاپتارىنا سايكەس, جەكە سەرىكتەس مەملەكەتتىك ەمەس مەكەمە ساراپتاماسىنىڭ قورىتىندىسىن الىپ, نىساندى پايدالانۋعا بەرۋى ءتيىس بولعان. قۇزىرلى مەكەمەلەر جوبالاۋ-سمەتالىق قۇجاتتاماعا قورىتىندى بەرۋدەن باس تارتقان. ءسويتىپ جوبانى ىسكە اسىرۋ ءۇشىن كەدەرگىلەر كوبەيگەن. كەڭەستىڭ ارالاسۋىمەن ماسەلە وڭ شەشىمىن تاپتى. مۇنداي يگىلىكپەن اياقتالعان جايتتار جەتەرلىك.
كاسىپكەرلەرگە زاڭعا سايكەس ءوز قۇقىقتارىن قورعاۋعا كومەكتەسۋ ارقىلى قوعامنىڭ, جەرگىلىكتى بيلىكتىڭ جانە بيزنەستىڭ اراسىنداعى ىنتىماقتاستىقتى نىعايتۋ مەحانيزمدەرىنىڭ ءبىرى بولىپ تابىلادى.
ەلباسى جولداۋىندا قۇزىرلى ورگاندارعا اكىمشىلىك زاڭنامالاردى ىزگىلەندىرىپ, اكىمشىلىك ايىپپۇلدار ادىلەتتى جانە قۇقىق بۇزۋ دەڭگەيىنە سايكەس بولۋىن زاڭدىق تۇرعىدا رەتتەۋدى تاپسىرعان بولاتىن. سونداي-اق, اكىمشىلىك قۇقىقبۇزۋشىلىقتىڭ قۇراماسى بويىنشا ايىپپۇل سانكتسياسىنىڭ مولشەرىن ازايتۋ, ەسكەرتۋ اكىمشىلىك جازانى كوزدەيتىن باپتى ىزگىلەندىرۋ كوزدەلگەن. كەڭەس وتىرىسىندا كاسىپكەرلەر لاڭكەستىككە قارسى كۇرەس زاڭىنىڭ نورمالارىن بۇزعانى ءۇشىن سالىناتىن اكىمشىلىك ايىپپۇلدار مولشەرى جوعارى ەكەنىن, ونى كوپشىلىكتىڭ قالتاسى كوتەرە بەرمەيتىنىن مالىمدەگەن بولاتىن. سوندىقتان دا اقبك-ءنىڭ كاسىپكەرلىككە قاتىستى 149-بابىنىڭ 1-بولىگىندە كوزدەلگەن اكىمشىلىك جازانى ايىپپۇلدان ەسكەرتۋ تۇرىنە اۋىستىرۋ, پوليتسيا دەپارتامەنتىنە اتالعان ماسەلەنى تەكسەرۋدە بەينە تىركەگىش قولدانۋ جانە قر «لاڭكەستىككە قارسى كۇرەس» زاڭىنا سايكەس, پوليتسيا تاراپىنان تەكسەرۋدى ازايتۋ جونىندە قر «اتامەكەن» ۇكپ-نا جازباشا ۇسىنىس جىبەرىلدى.
كەڭەس تاراپىنان ۇيىمداستىرىلعان باسقوسۋلار كاسىپكەر, مەملەكەت جانە بيزنەس اراسىنداعى ءۇش جاقتى ديالوگتىڭ قۇرىلۋىنا ۇلەس قوسا الدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى