شقو تارباعاتاي اۋدانىندا ءۇش جىگىت اۋىلدى ينتەرنەتپەن قامتىپ وتىر

جاقىندا جۇمىس ساپارىمەن وسى ەلدى مەكەنگە جول ءتۇسىپ, ءۇش جىگىتتىڭ وزگە جاستارعا ۇلگى بولارلىق يگىلىكتى ءىسىن كوزبەن كورۋدىڭ ورايى كەلدى. قىزىلكەسىك اۋىلىنىڭ اكىمى سايلاۋ قاليەۆ سىرتى قوراش عيماراتقا قاراي جول باستاعاندا «جىگىتتەردىڭ اشقان ورتالىعى راسىمەن وسىندا ما, الدە باسقا جەردە مە؟» دەگەن ساۋالدىڭ ىشتەي مازالاعانى راس. وسى جەردە ەكەن. عيماراتتىڭ سىرتى كوزگە سۇرىقسىزداۋ كورىنگەنىمەن جىگىتتەر وزدەرى وتىرعان بولمە ءىشىن جارقىراتىپ قويىپتى. ءسوزدى «تسيفرلى اۋىل» جوباسىن قولعا العان ءۇش جىگىتتىڭ ءبىرى ءومىرجان مۇقىشەۆ باستاپ كەتتى. «بۇل جوباعا كەم دەگەندە ءۇش ادام قاتىسۋى كەرەك. الەۋمەتتىك جوبانىڭ ماقساتى - جۇمىسسىز جاستاردى جۇمىسپەن قامتۋ. جوبانىڭ شارتىنا سايكەس التى اي تەگىن قىزمەت كورسەتەمىز. مەكتەپ پەن اكىمدىككە اۋىل تۇرعىندارىنىڭ بارلىعى بىردەي كىرە المايدى. ولاردىڭ وزدەرىنىڭ دە جۇمىسى بار عوي. ءبىز مۇمكىندىگىمىزشە اۋىل تۇرعىندارىنىڭ بارلىعىن كىرگىزۋگە تىرىسامىز» دەگەن ول جوبا اياسىندا 1 ميلليون تەڭگەنىڭ گرانتىن ۇتىپ, قازىر ءۇش جىگىت اي سايىن 40 پەن 60 مىڭ تەڭگەنىڭ ارالىعىندا ستيپەنديا الىپ وتىرعانىن جەتكىزدى. جوبانىڭ ءبىرىنشى ترانشىنا, ياعني 470 مىڭ تەڭگەگە ينتەرنەت قوستىرسا, ەكىنشى ترانشىنا 2 كومپيۋتەر مەن پرينتەر سەكىلدى قۇرىلعىلاردى ساتىپ الىپتى.

ينتەرنەت ورتالىعىنىڭ جۇمىس ىستەگەنىنە 3 ايدان اسىپتى. ءۇش جىگىتتىڭ ء(ومىرجان مۇقىشەۆ, ماقسات اقانوۆ, ماقسات زامانبەكوۆ) سوزدەرىنەن اڭعارعانىمىز, قىزىلكەسىك تۇرعىندارى «تسيفرلى اۋىل» جوباسىنا ءدان ريزا سەكىلدى. ريزا بولماعاندا قايتسىن, اۋرەسى كوپ قۇجات جۇمىستارىن اۋدان ورتالىعىنا سالپاقتاماي, وسى جەردە ءاپ ساتتە بىتىرسە. حات دەيسىز بە, فوتو دەيسىز بە, ۆيدەو دەيسىز بە, كومپيۋتەرگە كىرەدى دە, لەزدە جىبەرە قويادى. «كەيدە تسون-نىڭ (حالىققا قىزمەت كورسەتۋ ورتالىعى) دا مىندەتىن اتقارىپ كەتەمىز. ەلەكتروندى كىلتتەرى بولسا, قالاعان قۇجاتتارىن شىعارىپ بەرەمىز», - دەيدى ىسكەر جىگىتتەر. ىسكەر دەمەكشى, ۇشەۋىنىڭ ەندىگى ويى – بۇل جوبانى توقتاتپاي ارى قاراي جالعاستىرۋ. «وسى جەردەن كىشىگىرىم ينتەرنەت كلۋب اشىپ قويساق پا دەگەن ويىمىز بار. ويتكەنى, اۋىلدا جاستار كوپ قوي. قازىر ءبىز وسىندا جۇمىسسىز جۇرگەن 10 زامانداسىمىزدى كومپيۋتەرلىك ساۋاتتىلىققا ۇيرەتىپ جاتىرمىز. سونىمەن قاتار اۋىلداعى مەكتەپتىڭ 8 سىنىپتا وقيتىن 12 وقۋشىسىنا اپتاسىنا ءۇش رەت تەگىن قوسىمشا ساباقتار جۇرگىزدىك. ولاردىڭ اراسىندا «مايكروسوفت» باعدارلاماسى بويىنشا ءماتىن تەرۋ سايىسىن ۇيىمداستىردىق. ەندى بىلگەنىمىزدى 9 سىنىپ وقۋشىلارىنا ۇيرەتسەك پە دەيمىز», - دەيدى ماقسات زامانبەكوۆ.

جىگىتتەر ەلدى مەكەندەگى مۇمكىندىگى شەكتەۋلى (توپتاعى) 8 ازاماتقا دا جاردەم قولىن سوزىپ, الەۋمەتتىك ءبولىم قىزمەتكەرلەرىمەن بىرلەسىپ قۇجاتتارىن راسىمدەۋگە, جىبەرۋگە, الۋعا كومەكتەسىپ تۇرادى ەكەن. ء«بىزدىڭ اۋىل شالعايدا ورىن تەپكەننەن كەيىن بە, ينتەرنەت ءالى جەتپەي جاتىر. قازىر ينتەرنەتسىز جۇمىس بىتپەيتىن بولدى عوي. مىنا جاستار قولىمىزدى ۇزارتىپ وتىر. ۇشەۋىنە راحمەت. ەندى ولار وتىرعان عيماراتتى جاقسىلاپ جوندەۋدەن وتكىزىپ بەرسە, كەرىم بولار ەدى», - دەيدى ءومىرجان مۇقىشەۆتىڭ اكەسى سەرىك اعامىز. بوس تۇرعان بۇرىنعى اتس عيماراتىن ءۇش جىگىتتىڭ پايدالانۋىنا بەرىپ, قامقورلىق تانىتقان كەزىندە بايلانىس سالاسىندا قىزمەت ىستەگەن وسى كىسى ەكەن.

تارباعاتاي اۋداندىق جاستار رەسۋرستىق ورتالىعىنىڭ ديرەكتورى ميرات مۇقىشەۆ حالىقارالىق قايتا قۇرۋ جانە دامۋ بانكى مەن ءبىلىم جانە عىلىم مينيسترلىگىنىڭ بىرلەسكەن «Zhas project» جوباسىنا اۋداننان 12 جوبا ۇسىنىلىپ, سونىڭ التاۋى ءوتىپ (ەكى جاس ءوز ەرىكتەرىمەن باس تارتىپتى), قازىر تورتەۋى جۇزەگە اسىرىلىپ جاتقانىن ايتادى. جىگىتتەرمەن از-كەم اڭگىمەلەسىپ, ءمان-جايدى بىلگەن سوڭ ولار اشقان ينتەرنەت ورتالىعىنىڭ قۋاتىن, جىلدامدىعىن تەكسەرىپ كورەيىن دەپ پارول سۇراپ, عالامتورعا ەنگەنىم سول ەدى, لەزدە جاپ-جاسىل بولىپ ۋاتساپقا حابارلامالار تۇسە باستادى. «كوپ ادام كىرسە, ينتەرنەتتىڭ جىلدامدىعى ازايادى. ايتپەسە جاقسى ۇستايدى. اۋىلدىڭ تەڭ جارتىسى ءپارولىمىزدى بىلەتىن شىعار. سىرتتا وتىرىپ-اق ينتەرنەتكە كىرە بەرەدى. اسىرەسە, جاستارعا جاقسى بولدى. قازىر, كەشكە جاقىن قاپتايدى», - دەيدى ءومىرجان.

راسىندا, كۇن دە كەشكىرىپ, اياز دا كۇشەيىپ, جاستار قاپتاسا قاپتايتىنداي ۋاقىت بولعان ەكەن. بۇل دا دۇرىس شىعار. اۋىل جاستارىندا كەشكە باسقا قانداي جۇمىس بار؟! ال ءبىز اقسۋاتقا قاراي جول تارتتىق.

ازامات قاسىم,

«ەگەمەن قازاقستان»

شىعىس قازاقستان وبلىسى,

تارباعاتاي اۋدانى,

قىزىلكەسىك اۋىلى