جاڭا باستاعان جىلدا دا قىزىلوردالىق بايىرعى ءفوتوتىلشى بولات وماراليەۆپەن شىعارماشىلىق بايلانىسىمىز باياندى بولسىن دەي وتىرىپ, سەلت ەتكىزەر ساتتەر, سيرەك سۋرەتتەردى سويلەتە بەرمەكپىز.
سونىمەن جارتى عاسىر بويى فوتواپپاراتىن قولىنان تاستاماعان جاننىڭ ءوزى ءۇشىن دە قۇندى سانالاتىن سۋرەتتەرىنىڭ ءبىرى مۇستافا شوقايدىڭ اۋىلىنا بارعاندا تۇسىرىلگەن – ء«بيشى» اعاش بولسا, ءبىز وسى ايدارىمىزدىڭ العاشقى بەتتەرىن سول «ورتەنگەن اعاش» فوتوسىمەن اشقانىمىز ەستە. بولات وماراليەۆ ءوزىنىڭ جانىنا ەڭ جاقىن سۋرەتتەردى 1975-1985 جىلدارى تۇسىرگەن بولسا, سونىڭ ىشىندە ەكى جىل ۋاقىتىن جەگەن «سوعىس جەسىرلەرى» دەگەن سەرياسى دا شيرەك عاسىردان اسقاندا بۇرناعى جىلى «ەگەمەن قازاقستان» وقىرماندارىمەن قايتا قاۋىشتى.
– ول كەزدە سوعىس جەسىرلەرىنىڭ كوبى ءتىرى ەدى. ولاردىڭ كول بولعان كوز جاسىن كورگەندە مەن دە فوتوكامەرامدى قۇشاقتاپ, ەرىكسىز جىلاپ جىبەرگەنمىن. مەن ءۇشىن «سوعىس جەسىرلەرى» ەرەكشە ىستىق, – دەيدى ءفوتوتىلشى.
سونىمەن بۇگىنگى سۋرەت تومەندەگىدەي سىر شەرتەدى.
– 1982 جىلدارى ىسساپارمەن جولعا شىعىپ, قارت قاراتاۋدىڭ ەتەگىن جايلاعان ءبىر جىلقىشىنىڭ ۇيىندە سۋسىن ءىشىپ وتىرسام, اشىق تۇرعان كيىز ءۇيدىڭ ەسىگىنەن الىستا ءبىر اتتىڭ جالىنا جابىسىپ, مىنە الماي جاتقان بالا كوزىمە ءتۇستى. بار بولعانى ءتورت جاستاعى جىلقىشىنىڭ بالاسى قايتپاي اتقا مىنۋگە ارەكەت جاساپ جاتىر. مەن دە سومكەمنەن جالما-جان فوتوكامەرامدى الىپ, بالاعا قاراي جۇگىردىم. جەتەمىن دەگەنىمشە اتتىڭ الدىڭعى اياعىنا ءوز اياعىن سالىپ, جالىنا جابىسقان كۇيدە تۇرعان بالا جەرگە قۇلاپ ءتۇستى. اياعىن جىرىپ العان سىڭايلى. جىلامسىراپ وتىرعان جەرىندە سۋرەتكە ءتۇسىرىپ ۇلگىردىم. بىراق ول مەنىڭ سۋرەتكە تۇسىرگەنىمدى ۇناتپاي, قايقاڭداپ ورىننان اتىپ تۇرىپ جىلاپ الا جونەلدى.
ەگەر بۇل بالا ءومىرلى بولسا, قازىر قىرىقتىڭ قىرقاسىنا قۇلاش ۇرعان, اساۋعا باس بىلدىرەتىن ناعىز ەر ازامات بولعان شىعار؟! – دەيدى بولات وماراليەۆ.
ايناش ەسالي,
«ەگەمەن قازاقستان»
الماتى