مەملەكەت باسشىسى جىل قورىتىندىسى بويىنشا ەلىمىزدىڭ بۇقارالىق اقپارات قۇرالدارى وكىلدەرىمەن كەزدەستى. كەزدەسۋ بارىسىندا جىل بويى بولعان باستى وقيعالارعا توقتالىپ, قورىتىندىلادى. سونداي اق استانانىڭ جيىرما جىلدىعى جوعارى دەڭگەيدە تويلانعانىن ايتا كەلە, استانانى اقمولاعا كوشىرۋ سەبەبىنە توقتالدى.
«ەڭ تەرەڭ ساياسي استارىن تۇسىنەتىن ۋاقىت كەلدى. ەڭ باسىندا ءبىز ونى ايتا المادىق. جاعداي ءارتۇرلى بولدى. ەلدىڭ ىشىندە جۇرتىمىزدىڭ ءوزى بىرىڭعاي ەمەس, ءار تاراپتان بولدى. سونىڭ ءبارىن ەسكەرە وتىرىپ, ەكىنشى جاعىنان قيىن-قىستاۋ جاعدايدا ەلگە جاڭا جول سىلتەۋ ءۇشىن ءبىر وسىنداي جاڭالىق كەرەك بولدى. ارينە مەن باستاعان كەز وتە قيىن ەدى. ءبىر قالانى سالىپ, استانانى ءبىر جەردەن ەكىنشى جەرگە كوشىرۋ دەگەن وتە قيىن. سونىڭ بارلىعىن ويلاپ كەلىپ, بۇرىنعى استانالاردىڭ كوشۋ تاريحىن قاراپ, قالاي جاسايتىنىن ءبىلىپ, عىلىمي تۇرعىدان كەلگەندە استانا ەلدىڭ قاي جەرىندە بولۋى كەرەك دەگەن ماسەلەمەن كەلدىك. ءدال كىندىك ورتاسى – جەزقازعان. جەزقازعانعا دا, ۇلىتاۋعا دا باردىم. جول دا, تەمىرجول دا جوق. ەنەرگەتيكا دا جوق. 20 جىل تەمىرتاۋدا جۇمىس ىستەدىم. قاراعاندىنى جاقسى بىلەمىن. كومىردىڭ ورتاسىنا, ەكولوگياسى قيىن جەرگە اپارۋ....كوكشەتاۋعا بارساق شەتكە شىعىپ كەتەمىز, اقتوبەگە بارساق باتىسقا جاقىندايمىز. سوندىقتان, ويلانىپ-تولعانىپ ءتورت جولدىڭ تورابى رەتىندە اقمولانى تاڭدادىق», دەدى نۇرسۇلتان نازارباەۆ.
پرەزيدەنت دالاداعى ايازعا قاراماستان ەشقانداي جاماندىق جوق ەكەنىن ايتتى.
ء«بىر جەردە ىستىق, ءبىر جەردە سۋىق. ءوزىمىزدىڭ ەلىمىز, جەرىمىز. سارىارقانىڭ ورتاسى, اتا-بابالارىمىزدىڭ تۇياقتارى تيگەن جەر. مالىن جايعان جەر. سوندىقتان مۇنىڭ كوپ پايداسى بولدى. بىرىنشىدەن, حالىق كوپ شوعىرلانعان وڭتۇستىكتەن سولتۇستىككە قاراي ميگراتسيانى كۇشەيتتىك. قازىر تۇركىستاندى وبلىستىڭ ورتالىعى دەگەننەن كەيىن استانانىڭ تۇرعىندارى قالجىڭدايتىن كورىنەدى. شىمكەنتتىكتەر بىزگە كەلمەي, تۇركىستانعا باراتىن بولدى عوي دەپ. ءار نارسەنىڭ اياعىنا قاراۋ كەرەك قوي. ساياساتتىڭ ادامىنا ويلاعان ويىڭ ىسكە اسىرىپ, اياعىندا جەمىسىن كورگەننەن ارتىق باقىت جوق», دەدى ەلباسى.
سونداي اق ن. نازارباەۆ بۇگىنگى تاڭدا استانانىڭ دۇنيەجۇزىنە تانىمال قالا بولعانىن ايتا كەلە, استانالىقتارعا بارلىق جاعداي جاسالعانىن تىلگە تيەك ەتتى.
«1 ملن 200 مىڭ حالقى بار. 30 جىلدارعا قاراي 2 ملن بولاتىن شىعار. باسىندا 5-8 قاباتتان تۇراتىن قالا سالسام با دەپ ويلاپ ەدىم. مىنا كەڭ دالادا بيىگىرەك بولماسا كورىنبەي قالادى دەپ ساۋلەتشىلەر بوي بەرمەي سالدى. 230 مەترلىك «ابۋ دابي پلازا» سالىنىپ جاتىر. بۇل پوستكەڭەستىك ەلدەردەگى ەڭ بيىك عيمارات بولادى. مادەنيەت وشاقتار بار, ءبىلىم وشاقتارى بار, دەنساۋلىق ساقتاۋ مەكەمەلەرى بار. قازىر استانالىق تۇرعىن ءۇشىن بارلىعى بار. ەشقانداي پاريج, بەرلينگە بارۋدىڭ قاجەتى جوق. بارلىق كەرەكتى نارسە وسىندا بار. تەك اقشا تاۋىپ, ءومىر ءسۇرۋ كەرەك. استانامىزدى كوركەيتە بەرۋ كەرەك», دەدى پرەزيدەنت.