يران قارۋلى كۇشتەرىنىڭ «حاتام ءال-انبيا» ورتالىق شتابى ورمۇز بۇعازى ارقىلى بارلىق كەمەلەردىڭ, سونىڭ ىشىندە مۇناي تانكەرلەرى مەن ساۋدا كەمەلەرىنىڭ قوزعالىسىنا تىيىم سالىنعانىن مالىمدەدى, دەپ حابارلايدى Egemen.kz.
تەگەران بۇل شەشىم اقش-تىڭ يران اۋماعىنا جاساعان قايتالاما سوققىلارىنان كەيىن قابىلدانعانىن اتاپ ءوتتى.
«وسى ساتتەن باستاپ ايماقتاعى قاۋىپسىزدىك جاعدايىنا بايلانىستى ورمۇز بۇعازى بارلىق كەمە تۇرلەرى ءۇشىن جابىق دەپ جاريالانادى. مۇناي تانكەرلەرى مەن ساۋدا كەمەلەرىن قوسا العاندا كەز كەلگەن كەمەنىڭ بۇعاز ارقىلى ءوتۋ ارەكەتىنە سوققى بەرىلەدى», دەلىنگەن شتاب مالىمدەمەسىندە.
سونىمەن قاتار يراننىڭ يسلام رەۆوليۋتسياسى ساقشىلارى كورپۋسىنىڭ اسكەري-تەڭىز كۇشتەرى بۇعازدان وتۋگە تالپىنعان ەكى كەمەگە سوققى جاساعانىن مالىمدەدى.
ەسكە سالا كەتەيىك, بۇعان دەيىن اقش اسكەري كۇشتەرى يران اۋماعىنا سوققى جاسادى. پەنتاگون بۇل وپەراتسيانى امەريكالىق Apache تىكۇشاعى اتىپ تۇسىرىلگەن سوڭ جۇزەگە اسىرعانىن حابارلادى.
كەيىن يراننىڭ يسلام رەۆوليۋتسياسى ساقشىلارى كورپۋسى اق ءۇيدىڭ اسكەري سوققىلارىنا جاۋاپ رەتىندە باحرەيندەگى اقش-تىڭ 5-فلوتى كۇشتەرىنە دروندارمەن شابۋىل جاسادى.