كەلەر جىلى قاراعاندى وبلىسىندا 25 الەۋمەتتىك پاۆيلون سالىنادى. قازىرگى ۋاقىتتا قاراعاندى, ساران, شاحتينسك جانە اباي قالالارىندا بولاشاق دۇكەندەرگە ارنالعان جەر تەلىمدەرى راسىمدەلۋ ۇستىندە.
جالپى, الەۋمەتتىك پاۆيلوندار وزدەرىن تەك جاقسى قىرىنان تانىتۋدا. بۇگىنگى كۇندە ولار باعانىڭ نەگىزسىز كوتەرىلۋىمەن جانە بەلگىلى ءبىر ماۋسىمدىق تاۋارلاردىڭ تاپشىلىعىمەن كۇرەسۋدىڭ ءتيىمدى قۇرالى بولىپ وتىر.
– جاڭا پاۆيلوندار اشۋ – ساتىپ الۋشىلاردى كەڭ كولەمدە قامتۋعا مۇمكىندىك بەرەدى. سونداي-اق, جەرگىلىكتى تاۋار وندىرۋشىلەرگە ءوز ونىمدەرىن دەلدالسىز, تومەن جانە قولجەتىمدى باعامەن ساتۋعا جول اشادى, دەيدى قاراعاندى وبلىستىق كاسىپكەرلىك باسقارماسىنىڭ جەتەكشىسى تاتيانا ابلاەۆا.
سونىمەن قاتار ول وبلىستا 2019 جىلعا ارنالىپ تۇراقتاندىرۋ قورى قۇرىلعانىن, وعان 68 توننا كۇرىش, 68 توننا قاراقۇمىق, 204 توننا قانت جانە 48 مىڭ ليتر كۇنباعىس مايى جەتكىزىلگەنىن ءمالىم ەتتى. بۇل ونىمدەر الەۋمەتتىك ماڭىزى بار تاۋارلاردىڭ باعاسىن ءبىر دەڭگەيدە ۇستاپ تۇرۋ ءۇشىن جوعارىدا ايتىلعان پاۆيلونداردا تۇراقتى باعامەن ساتىلاتىن بولادى.
قايرات ءابىلدا,
«ەگەمەن قازاقستان»
قاراعاندى