اقمولا وبلىسىنداعى ساندىقتاۋ اۋدانىنىڭ ماكسيموۆكا سەلوسىندا حوككەي كورتى اشىلدى. حوككەي كورتىنىڭ اۋماعىندا اۋىل تۇرعىندارىنا ارنالعان, ساياباق, شاعىن فۋتبول جانە بالالار ويىن الاڭدارى دا بار. نىسان جەكە كاسىپكەردىڭ قارجىسىنا سالىنىپ, جەرگىلىكتى مەكتەپتىڭ مەنشىگىنە وتكىزىلدى.
اياداي اۋىلدىڭ اجارىن كىرگىزگەن كاسىپكەرلەر اكەلى-بالالى زاكۋسيلوۆتار بۇل حوككەي كورتى جاستاردىڭ سالاۋاتتى ءومىر سالتىن ۇستانىپ, جاس مامانداردىڭ تۇراقتانۋىنا سەپتىگىن تيگىزبەك. جوعارى تالاپتارعا ساي مۇز ايدىنى اۋداننىڭ 90 جىلدىق مەرەيتويى اياسىندا اشىلعان 25 نىساننىڭ سوڭعىسى.
ساندىقتاۋ اۋدانىندا قىسقى سپورت تۇرلەرى كەڭ قانات جايعان. وڭىردە شاڭعى سپورتى مەن بياتلوننان جيىرماعا تارتا رەسپۋبليكالىق, حالىقارالىق سايىستاردىڭ چەمپيوندارى بار. ال, جاڭا مۇز ايدىنى ولاردىڭ قاتارىن حوككەيشىلەر مەن كونكي سپورتى شەبەرلەرىمەن تولىقتىرۋعا جول اشادى. نىسان قۇرىلىسىنا اۋىل بالالارىنىڭ وسى قىسقى سپورت تۇرلەرىنە قىزىعۋشىلىعى سەبەپكەر بولدى دەيدى جومارت كاسىپكەر.
اۋىل بالالارى وزەن ۇستىندە كونكي تەبەتىن ەدى. قاۋىپتى بولعاندىقتان بىلتىر شاعىن قورشاۋمەن مۇز ايدىنىن جاساقتادىق. مەنى اۋىل بالالارىنىڭ قىزىعۋشىلىعى تاڭ قالدىردى. ولار ءتىپتى اتا-انالارىمەن كەلىپ كونكي تەپكەنىن كوردىم. سوندىقتان, وسىنداي جابىق كورد سالۋعا بەل بۋدىم,–دەيدى الەكساندر زاكۋسيلوۆ.
نىساننىڭ اشىلۋ سالتاناتىنا ساندىقتاۋ مەن تسەلينوگراد اۋداندارىنىڭ حوككەي كوماندالارى جانە كوكشەتاۋلىق «ارلان» كومانداسىنىڭ جەتەكشىلەرى دە قۇتتى بولسىن ايتا كەلىپتى. سالتاناتتى شارا سوڭىندا ماكسيموۆكا سەلوسىنىڭ حوككەي كومانداسى ءوز الاڭىندا جولداستىق كەزدەسۋ وتكىزدى.
بايقال ءبايادىل,
«ەگەمەن قازاقستان»
اقمولا وبلىسى,
ساندىقتاۋ اۋدانى.