بيىل قاراعاندى سپورتىنىڭ قاراشاڭىراعى – نۇركەن ءابدىروۆ اتىنداعى سپورت سارايى ىرگەتاسىنىڭ قالانعانىنا 60 جىل تولدى. بۇگىنگى كۇندە ءىشى-سىرتى تۇگەل جوندەۋدەن وتكەن بۇل عيماراتتىڭ ەكىنشى تىنىسى اشىلىپ, ارقا سپورتىنىڭ دامۋىنا بۇرىنعىدان دا زور ۇلەس قوسىپ كەلەدى.
تاياۋدا وسى سپورت سارايىندا قاراعاندى وبلىستىق دەنە شىنىقتىرۋ جانە سپورت باسقارماسىنىڭ سپورتتىق جەتىستىكتەر مۇراجايى اشىلدى. عيماراتتىڭ ەكىنشى قاباتىنداعى جاڭا مۋزەيگە وليمپيالىق بەس شىعىرشىقتىڭ تۇسىنە سايكەس كەلەتىن بەس ستەند ورنالاستىرىلعان. ال ستەند سورەلەرىنە قاراعاندى سپورتىنىڭ داڭقىن شىعارعان چەمپيونداردىڭ, ايگىلى سپورتشىلاردىڭ مەدالدارى مەن كۋبوكتارى جانە باسقا دا جۇلدەلەرى, جەكە زاتتارى قويىلعان. ولاردىڭ اراسىنان, ءتىپتى 1956 جىلعى ماراپاتتار دا ورىن الىپتى.
– قاراعاندى سپورتىنىڭ تاريحى مەن ءداستۇرى وتە باي. سوندىقتان, بۇل مۇراجايدىڭ اشىلۋىن وتكەنگە دەگەن زور قۇرمەت رەتىندە قابىلدادىم. جاستار اعا بۋىن وكىلدەرىنىڭ سپورتتاعى جەڭىستەرى مەن جەتىستىكتەرىن وسى مۋزەي ارقىلى تانىپ وسسە, مۇنىڭ ءوزى ۇرپاق تاربيەسىن دامىتۋعا قوسىلعان ماڭىزدى شارۋانىڭ ءبىرى دەپ سانايمىن, – دەيدى سپورت ارداگەرى, ايگىلى باپكەر ديحانباي بيتكوزوۆ.
قازىرگى تاڭدا قاراعاندى وبلىسىندا سپورتتىڭ 96 ءتۇرىن دامىتۋ جولعا قويىلعان. مۇراجايعا ەكسپونات تاڭداعاندا كوميسسيا مۇشەلەرى وسى سپورت تۇرلەرىنىڭ بارلىعىن دا نازاردان تىس قالدىرماۋعا تىرىسقان ەكەن. مىسالى, بۇل جەردە وليمپيادا چەمپيونى ۆاسيلي جيروۆتىڭ بىلعارى قولعابى, اتاقتى بوكسشى سەرىك ەلەۋوۆتىڭ, جەڭىل اتلەت سەرگەي ءزاسيموۆيچتىڭ مۇسىنشەلەرى, فۋتبولشى اندرەي فينونچەنكونىڭ سپورتتىق جەيدەسى جانە باسقا دا سپورت ساڭلاقتارىنا تيەسىلى ەكسپوناتتىق زاتتار بار.
قايرات ءابىلدا,
«ەگەمەن قازاقستان»
قاراعاندى