ورال قالاسىندا تۇراتىن كوللەدج ستۋدەنتى نۇراي تەمىرعالي ءوزىنىڭ 17 جاسقا تولعان تۋعان كۇنىن ەرەكشە وتكىزدى: دوس-قۇربىلارىن جيناپ, تۋعان كۇنىن اتاپ وتۋگە جيناپ جۇرگەن قارجىسىنا قۇستارعا ارنالعان 17 ۇياشىق جاساتىپ, ورال قالاسىنىڭ ورتالىق ساياباعىنا ورناتتى.
– تۇڭعىش قىزىمنىڭ تۋعان كۇنىن وتباسىمىزبەن اسىعا كۇتىپ جۇرگەنبىز. نۇرايدىڭ ءتۇرلى جوسپارى بولدى. قۇربىلارىن ۇيگە شاقىرىپ, داستارقان جايماق نيەتىن دە بىلدىرگەن. بىراق ەكى اپتا بۇرىن: «اكە, مەن تۋعان كۇنىمدى اتاپ وتپەيتىن بولدىم» دەگەندە, «بىرەۋ رەنجىتتى مە؟» دەپ شوشىپ كەتتىم, – دەيدى نۇرايدىڭ اكەسى ابزال تەمىرعالي ۇلى.
بىراق نۇرايدىڭ جوسپارىن وزگەرتكەن وزگە ەمەس, ءوز جۇرەگى ەكەن.
– وسىدان بىرەر جىل بۇرىن اكەم «قۇستار – ءبىزدىڭ دوسىمىز» دەگەن كەرەمەت كىتاپ الىپ بەرگەن ەدى. اۆتورى – اقىن ەسەنعالي راۋشانوۆ. وسى كىتاپتان قۇستار تۋرالى نەبىر قىزىقتى مالىمەتتەر وقىدىم. وسىلايشا قاناتتى دوستارىمىزدى ەرەكشە جاقسى كورىپ كەتتىم. ولارعا كومەكتەسۋ تۋرالى ءاردايىم ويلاپ جۇرەتىنمىن. تۋعان كۇنىم جاقىنداعان سايىن «جىل سايىن جۇرتپەن بىردەي اتاپ وتە بەرگەنشە, ەشكىمگە ۇقسامايتىنداي ەتىپ اتاپ وتسەم» دەگەن وي كەلدى, – دەيدى نۇراي.
كۇندەلىكتى ومىردە بايقاي بەرمەيمىز, قىس كەزىندە قۇستار, اسىرەسە كىشكەنە بوزتورعاي, شىمشىقتار اشتىق پەن سۋىقتان قاتتى قينالادى ەكەن. نۇراي عالامتور اقتارىپ, قۇستارعا قالاي كومەكتەسۋ كەرەك دەگەن اقپاراتتى ءسۇزىپ شىققان. ءسويتىپ كىشكەنتاي تورعايلاردى قىستا جەلدىڭ ىزعارىنان قورعاپ پانا بولاتىن ءارى ادامدار جەم سالۋعا ىڭعايلى ۇياشىقتار جاساتۋ كەرەك دەگەن شەشىمگە كەلگەن.
– قىزىمنىڭ بۇل ويىن بىردەن قولدادىق. ىشىمنەن قاتتى قۋاندىم. قالا بازارىندا بەسىك, ۇلتتىق ۇستەل, ت.ب. جاسايتىن شەبەرگە جولىعىپ, بىردەن 17 ۇياشىققا تاپسىرىس بەردىك, – دەيدى ابزال.
– قولونەرمەن كوپتەن اينالىسىپ ءجۇرمىن عوي. بۇعان دەيىن قاراتورعايدىڭ ۇياسىن جاساپ بەرۋدى سۇراپ, ءبىرلى-جارىم ورىس قارتتارى كەلەتىن. ولار ۇيانى كوبىنە ءوز ساياجايىنا ورناتادى. بىراق جاستاردىڭ بىردەن ءدال مۇنشا كوپ ۇيا جاساتقانىنا ءبىرىنشى رەت كەزدەسىپ وتىرمىن, – دەپ تاڭعالادى شەبەر ءنۇردىلدا السەۋوۆ.
ءنۇردىلدا شەبەر قىس كەزىندە قۇستارعا جەم سالاتىن 10 ساۋىت پەن سۋىقتان پانالايتىن 7 ۇيانى جاساۋعا بار ونەرىن سالىپتى. قازاقى ويۋ-ورنەكپەن جاسالعان بۇل ۇيادا ءبارى ەسكەرىلگەن.
– شاتىر ەرنەۋى تومەن بولعاندىقتان بۇعان قارعا, كەپتەر سياقتى ۇلكەن قۇس كىرە المايدى. قىس كەزىندە ەڭ ءالسىز, پاناسىز قالاتىن بوزتورعاي مەن شىمشىق قوي. سوندىقتان جەمساۋىتتاردى وسى كىشكەنە قۇستارعا ارناپ جاسادىق, – دەيدى ءنۇردىلدا ءايدىلدا ۇلى. شەبەر ءتىپتى بۇل ىسكە ىنتى-شىنتىسىمەن كىرىسىپ كەتىپتى. تاپسىرىس يەلەرى تەك ۇيا جاساۋدى وتىنسە, ونى ورال قالالىق ساياباعىنا ورنالاستىرۋعا ءنۇردىلدا ءوزى سۇرانىپ كەلىپتى.
– قازاق جاستارىنىڭ وسىنداي الەۋمەتتىك باستاما كوتەرىپ, كوپكە ۇلگى بولىپ جاتقانىنا قاتتى قۋاندىم, – دەيدى ول.
تۋعان كۇنىندە قاناتتى دوستارىنا مەيرام جاساپ, جۇرەك مەيىرىمىن شاشقان نۇراي بويجەتكەننىڭ وسى ۇلگىسى وزگە قۇربىلارىنا دا جۇعىستى بولسىن دەپ تىلەدىك.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى