ەنەرگەتيكادا ايتارلىقتاي تابىس بار

مۇناي ءوندىرۋ كولەمى 2017 جىلمەن سالىستىرعاندا 4,7% ءوسىپ, بيىل رەكوردتىق 90,3 ملن تونناعا جەتكەن ەكەن. سونىڭ ىشىندە, ءۇش ءىرى جوبا بو­يىنشا مۇناي ءوندىرۋ كولەمى 53,9 ملن توننانى قۇرايدى. اتاپ ايتار بولساق, قاشاعانداعى ءوندىرىس بىلتىرعىدان 20 پايىزعا ارتىپ, 3,2 ملن تونناعا, تەڭىزدە 3,3 پايىزعا ارتىپ 28,6 ملن تونناعا, ال قاراشىعاناقتا 0,8 پايىزعا ارتىپ 12,1  ملن تونناعا جەتتى. مۇنىڭ ءبارى قارا التىن ەكسپورتىنىڭ بىلتىرعىدان 2,4 پايىزعا ارتىپ 71,5 ملن تونناعا جەتۋىنە سەپتىگىن تيگىزدى. ال مۇناي وڭدەۋ كولەمى بىلتىرعىدان 8 پايىزعا ۇلعايىپ بيىل 16,1 ملن توننانى قۇرادى.

«گاز ءوندىرۋ كولەمى جوسپارلانعان كورسەتكىشتەن جوعارى, 54,8 ملرد تەكشە مەترگە جەتتى. تاۋارلىق گاز ءوندىرىسى بىلتىرعىدان 4,4 پايىز ءوسىپ, 33 ملرد تەكشە مەترگە, سۇيىتىلعان گاز ءوندىرىسى 3,4% ءوسىپ 3 ملن تونناعا جەتتى», دەپ مالىمدەدى ەلدىڭ باس ەنەرگەتيگى. وسى ورايدا گازدىڭ ەكسپورت كولەمىنىڭ دە 2017 جىلمەن سالىستىرعاندا 10,4%  ارتىپ, 19  ملرد تەكشە مەتردى قۇراعانى دا ايتىلدى. 

جىلدىڭ باستى جەتىستىكتەرىنىڭ ءبىرى رەتىندە ەكو­نوميكالىق ىنتىماقتاستىق اياسىندا قى­تايعا جىل سايىنعى 10 ملرد تەكشە مەتر كوگىل­دىر وتىن ەكسپورتتاۋ تۋرالى كەلىسىمگە قول جەت­كى­زىلگەنىن اتاۋعا بولادى. 2017 جىلى قىتايعا 1,1 ملرد تەكشە مەتر گاز ەكسپورتتالسا, 2018 جى­لى بۇل كورسەتكىش 5,8 ملرد تەكشە مەترگە جەتتى. 

ەلەكتر ەنەرگياسىن ءوندىرۋ كولەمى بيىل 106 ملرد كۆت/ساعاتتى قۇرادى, بۇل 2017 جىلعا قاراعاندا 3,6% ارتىق. كەلەسى جىلى بۇل كورسەتكىش ءالى دە ۇلعايا ءتۇسۋى ءتيىس. ويتكەنى ق.بوزىمباەۆتىڭ ايتۋىنشا, «نۇرلى جول» باعدارلاماسى شەڭبەرىندە وڭىرارالىق «سولتۇستىك-شىعىس-وڭتۇستىك» 500 كۆت جەلى قۇرى­لىسى» جوباسى اياقتالدى. وسى جوبا ارقى­لى ەلدىڭ وڭتۇستىك باعىتىنداعى ترانزيت قورى 1350-دەن  2100 مۆت-عا دەيىن ارتتى, بۇل وڭتۇستىك ءوڭىردىڭ ەنەرگيا تاپشىلىق ماسەلەسىن شەشۋگە مۇمكىندىك بەرەدى.

ء«داستۇرلى ستانسالاردان ەلەكتر ەنەر­گياسىنا تاريفتەردىڭ تومەندەۋىنە قاتىستى بيىلعى 14 جەلتوقسانداعى بۇي­رىقپەن ەلدىڭ 43 ەنەرگيا ءوندىرۋشى بار­لىق ستانسالارى بويىنشا تاريفتەردىڭ تومەن­دەتىلگەنى سىزدەرگە ءمالىم. بۇل 2019 جىلدىڭ 1 قاڭتارىنان باستاپ ەلەكتر ەنەرگيا­سىن تۇتىنۋشىلارىندا شەكتى باعانى تومەندەتۋگە مۇمكىندىك بەرەدى. وسىلايشا ەلباسىنىڭ تاپسىرماسى ورىندالدى», دەدى مينيستر.

بوزىمباەۆتىڭ ايتۋىنشا, جاڭار­تىل­مالى قۋات كوزدەرىنەن ەنەرگيا الۋ كورسەتكىشى جوسپارلى تۇردە ءوسىپ جاتىر. ەلەكتر ەنەرگياسىنىڭ جالپى كولەمىندە جاڭارتىلاتىن ەنەرگيانىڭ ۇلەسى بيىل 1,3%-دى قۇرادى.

«2018 جىلى جاڭارتىلاتىن ەنەرگەتيكا سالاسىندا ماڭعىستاۋ, جامبىل, الماتى جانە قاراعاندى وبلىستارىندا 5 نىسان پايدالانۋعا بەرىلدى. ال 2019 جىلى جالپى قۋاتى 629 مۆت بولاتىن 16 نىساندى ەنگىزۋ جوسپارلانسا, 2020 جىلى جەك نىساندارىنىڭ سانىن 2 ەسەگە ارتتىرامىز. جيىنتىق قۋاتى 2353 مۆت-تى قۇرايتىن 124 نىسان جۇمىس اتقاراتىن بولادى», دەدى ەنەرگەتيكا ءمينيسترى. 

باۋىرجان مۇقان,

«ەگەمەن قازاقستان»