قۇرلىقتىق حوككەي ليگاسىنىڭ (قحل) كەزەكتى تۋر ويىنىن ءوز مۇز ايدىنىندا وتكىزگەن «بارىس» ۆلاديۆوستوكتىڭ «ادميرال» كلۋبىنان ايلاسىن اسىردى.
ءبىرىنشى كەزەڭدە «بارىس ارەناعا» جينالعان 4 022 كورەرمەن قاقپا تورىنان تابىلعان التى بىردەي شايبانىڭ كۋاسى بولدى. العاشقى ەكى گولدى استانالىقتار سوقتى. 4-مينۋتتا رومان ستارچەنكو مەرگەندىك تانىتسا, 9-مينۋتتا داستين بويد ەسەپتى ەسەلەدى. الايدا قيىر شىعىستان كەلگەن حوككەيشىلەر دە وڭايلىقپەن بەرىلمەيتىندەرىن اڭعارتىپ, كوزدى اشىپ-جۇمعانشا قاتارىنان ءۇش مارتە نىسانانى ءدال كوزدەدى. بۇل گولداردىڭ اۆتورلارى – ەگور ياكوۆلەۆ, دەنيس ۆيحارەۆ جانە كارەل كۋبات. العاشقى كەزەڭنىڭ اياقتالۋىنا ءبىر مينۋتتاي ۋاقىت قالعاندا اندرە پەتەرسسون تارازى باسىن تەڭەستىردى. ۇزىلىستەن كەيىن قوس كوماندانىڭ دا قارقىنى باياۋلاپ, تابلوداعى ەسەپ سول كۇيىندە قالدى. ال ءۇشىنشى كەزەڭدە مەتتيۋ فرەتتين سوققان شايبا «بارىسقا» جەڭىس اپەردى. ەسەپ – 4:3.
قازىرگى كەزدە استانالىق حوككەيشىلەر قحل-دىڭ تۇراقتى بىرىنشىلىگىنىڭ جارىس كەستەسىندە 8-ورىندى يەلەنۋدە. 40 كەزدەسۋدەن كەيىن ولار 56 ۇپاي جيىپ وتىر. ءوزىنىڭ كەلەسى باسەكەسىن «بارىس» 28-جەلتوقساندا چەليابىدە جەرگىلىكتى «تراكتورعا» قارسى وتكىزەدى.
عالىم سۇلەيمەن,
«ەگەمەن قازاقستان»