تالدىقورعان قالاسىنداعى «اينالايىن» بالالار ءۇيىنىڭ تاربيەلەنۋشىسى, 5 سىنىپ وقۋشىسى يرينا ۆەسنينا مەن № 1 بالالار ۇيىندە تۇراتىن 7 سىنىپ وقۋشىسى ۇلىقپان قابىلبەكوۆ جەتىسۋلىق جاس وركەندەرگە قۋانىش سىيلاعان مەرەكە ءۇشىن ەلباسىنا شىنايى العىس ايتتى.
ال «جارقىرا, قازاقستان! جارقىرا, تۋعان جەر!» اتتى تاقىرىپپەن وتكەن پرەزيدەنت شىرشاسىنا ايماقتاعى اتا-اناسىنىڭ قامقورلىعىنسىز قالعان, مۇمكىندىگى شەكتەۋلى جانە جەتىم بالالار از قامتىلعان وتباسىلارىنان شىققان, بالالار ۇيىندە تاربيەلەنگەن وقۋشىلار, وقۋ ۇزدىكتەرى شاقىرىلىپ, جالپى سانى 200 بالا شات-شادىمان بولدى.
«جاستار» سارايىندا وتكەن پرەزيدەنت شىرشاسىنىڭ كىشكەنتاي قوناقتارىن تانىمال ەرتەگىلەر مەن مۋلتفيلمدەردىڭ كەيىپكەرلەرى, انيماتورلارى, بيشىلەر, انشىلەر مەن تسيرك ارتىستەرى قارسى الدى. بالالار كوگىلدىر ەكران ارقىلى ءوز قۇتتىقتاۋى مەن اتالىق اق باتاسىن جولداعان ەلباسى نۇرسۇلتان نازارباەۆتىڭ سوزىنە ۇزاق قول سوعىپ, ريزاشىلىق ءبىلدىردى.
ءوز كەزەگىندە سوڭ جەتىسۋلىق جاس ورەندەردى وبلىس اكىمى اماندىق باتالوۆ قۇتتىقتاپ, ىزگى تىلەگىن ايتتى.
- قىمباتتى بالالار! سەندەر جاڭا عانا ەل پرەزيدەنتىنىڭ وزدەرىڭىزگە ارناعان جۇرەكجاردى لەبىزىن تىڭدادىڭىزدار. ەلباسى ءوز تىلەگىندە سەندەردىڭ تاۋەلسىز, بەيبىت ەلدە ءومىر ءسۇرىپ جاتقان باقىتتى بالالار ەكەندەرىڭدى اتاپ ءوتتى. وسى قۇندىلىقتى ساقتاپ, باعالاي بىلىڭدەر. ءبىز ءوز تاراپىمىزدان سەندەرگە جانە بارلىق ىزگى باستامالارعا ارقاشان قولداۋ كورسەتەتىن بولامىز. ەڭ باستىسى, جاقسى وقىپ, زەيىندى بولىپ, ۇلكەندى قۇرمەتتەي بىلىڭدەر. بۇل مەرەكە سەندەر ءۇشىن ۇيىمداستىرىلىپ وتىر. جاڭا جىلدا اياۋلى ارماندارىڭ ورىندالسىن, سەندەرگە مىقتى دەنساۋلىق, كوتەرىڭكى كوڭىل كۇي تىلەيمىن! كەلە جاتقان جاڭا جىل قۇتتى بولسىن! 2019 جىل سەندەرگە مول قۋانىش, جاقسى جاڭالىقتار الىپ كەلسىن! – دەدى پرەزيدەنت شىراسىنا قاتىسۋشىلارعا ايماق باسشىسى.
مەرەكە بارىسىندا بالالارعا قىس مەزگىلىنىڭ ەرەكشەلىكتەرى مەن جاڭا جىلدىق تاڭعاجايىپتار تۋرالى تەاترلاندىرىلعان شوۋ كورسەتىلىپ, ەستەلىكتەر سىيلىق تابىستالدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى