قازاقستاننىڭ تاۋەلسىزدىك كۇنىنە وراي الماتىداعى وقۋشىلار سارايىندا قازاق كۇرەسىنەن كادەتتەر اراسىندا قالا بىرىنشىلىگى اياقتالدى. جارىسقا قاتىسقان 150 جاس ورەن 15 سالماق دارەجەسىنىڭ جۇلدەلەرىن ساراپقا سالدى.
ايتۋلى جارىستى ءبىز الماتىدا ۇلتتىق ونەرىمىزدى كەڭىنەن ناسيحاتتاۋ جانە جەرگىلىكتى تۇرعىنداردى سالاۋاتتى ءومىر سالتىنا ىنتالاندىرۋ ماقساتىندا وتكىزىپ وتىرمىز. قازىرگى كەزدە قازاق كۇرەسى كۇللى قازاقستاندا قارىشتاپ دامىپ كەلە جاتقانى بارشاعا ءمالىم. الەمدىك جانە قۇرلىقتىق دودالاردا ۇزدىكسىز ۇيىمداستىرىلۋدا. قازاق كۇرەسىندە تورتتاعان نەمەسە اۋىرتۋ جانە قىلقىندىرۋ تاسىلدەرى جوق. بۇل – تىك تۇرىپ كۇرەسەتىن ناعىز بەكزادا ونەر, – دەيدى رەسپۋبليكالىق دارەجەدەگى تورەشى تالعات قوناەۆ.
قالا بىرىنشىلىگىنىڭ قورىتىندىسى بويىنشا ديماش پەن ايدار قالمۇراتوۆتار, ارلان قۋانىش ۇلى, ءالي راليت, ءاليحان ءىلياس, قۋانىش كەمەكباي, ميراس كاليەكباروۆ, دايىر ماقۇلبەك, نۇرجول مىرزاحمەتوۆ جانە تاعى باسقا بالعىن بالۋاندار قارسىلىلاس شاق كەلتىرمەي, جەڭىس تۇعىرىنىڭ ەڭ بيىك ساتىسىنا كوتەرىلدى.
الماتى قالاسىنىڭ بىرىنشىلىگى اياقتالعان بەتتى 2018 جىلدىڭ قورىتىندىسى شىعارىلدى. كادەتتەر اراسىنداعى ەڭ ۇزدىك بالۋان ميراس شاكەروۆ, جاسوسپىرىمدەر اراسىنداعى ەڭ ۇزدىك بالۋان نۇرسۇلتان نۇرسەيىتوۆ, جاستار اراسىنداعى ەڭ ۇزدىك بالۋان ەراسىل جاناتاەۆ, ەڭ ۇزدىك باپكەرلەر عاني كەلدىقۇلوۆ پەن عازيز تۇرىسكۇلوۆ, ەڭ ۇزدىك تورەشى بولاتبەك يبراگيموۆ جانە دە قازاق كۇرەسىن وركەندەتۋگە اتسالىسىپ جۇرگەن باسقا دا ماماندار مەن ازاماتتار ديپلومدار جانە ءتۇرلى سىيلىقتارمەن ماراپاتتالدى.
عالىم سۇلەيمەن,
«ەگەمەن قازاقستان»
الماتى