اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەدى. بۇل تۋرالى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ وڭىرگە جۇمىس ساپارىمەن كەلگەن كەزىندە مالىمدەدى.
21 جەلتوقسان, جۇما كۇنى اليك شپەكباەۆتىڭ قاتىسۋىمەن وبلىس اكتيۆىنىڭ وتىرىسى ءوتتى.شارانى اشقان وبلىس اكىمى بەردىبەك ساپارباەۆ سوڭعى جىلدارى ەلباسى نۇرسۇلتان نازارباەۆتىڭ تاپسىرماسىمەن وڭىردەگى سىبايلاس جەمقورلىقپەن كۇرەس ايتارلىقتاي جانداندىرىلعانىن اتاپ ءوتتى.
«سىبايلاس جەمقورلىقتى ءتۇپ تامىرىمەن جويۋ – پرەزيدەنتتىڭ نەگىزگى تاپسىرمالارىنىڭ ءبىرى. ەلباسى وسى جاعىمسىز قۇبىلىسقا «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا دا نازار اۋداردى.ءبىز سىبايلاس جەمقورلىققا قارسى كۇرەستە تۇرعىندار ءۇشىن ەلەكتروندى قىزمەتتەردىڭ اۋقىمىن كەڭەيتۋگە جانە قولجەتىمدىلىگىن ارتتىرۋعا دايىنبىز», - دەدى وبلىس اكىمى.
ءوز كەزەگىندە اليك شپەكباەۆ اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەتىنىن اتاپ ءوتتى.
ا. شپەكباەۆ: «ەلەكتروندى مەملەكەتتىك قىزمەتتەردى دامىتۋ تۇرمىستىق سىبايلىس جەمقورلىقتى تامىرىمەن جويۋعا ايتارلىقتاي اسەر ەتەدى. بىلتىر اقتوبە وبلىسىندا مەملەكەتتىك قىزمەتتەردىڭ نەبارى 22%-ى ەلەكتروندى فورماتتا كورسەتىلسە, بۇگىندە جەرگىلىكتى اتقارۋشى ورگاندار بۇل كورسەتكىشتى 82%-عا دەيىن, ياعني نەبارى ءبىر جىلدىڭ ىشىندە ءتورت ەسەگە كوتەردى. جاقىندا اقتوبەدەگى «حالىقتىق كەڭسەدە» بولدىم. بارلىق قىزمەتتى ءبىر جەرگە جيناعان, ازاماتتار ەشقايدا شىقپاي-اق, بارلىق قىجەتتى ءبىر ورىندا الا الادى. ءسىزدىڭ وبلىستاعى ەلەكتروندى مەملەكەتتىك قىزمەتتەردى دامىتۋعا جاۋاپتى ادامدار قۇرمەت پەن ماقتاۋعا لايىق»,- دەپ اتاپ ءوتتى.
جالپى, اگەنتتىك توراعاسىنىڭ ايتۋىنشا, ەلەكتروندىق ۇكىمەتتى دامىتۋ رەيتينگىندە بۇۇ دەڭگەيى جوعارى قىرىق ەلدىڭ قاتارىنا ەنگەن. رەيتينگكە بارلىعى 193 مەملەكەت كىردى.
ول سونداي-اق, اقتوبەدەگى بىرنەشە الەۋمەتتىك جانە وندىرىستىك نىسانداردى ارالاعاننان العان اسەرىمەن ءبولىستى.
«سوڭعى ءۇش جىلدىڭ ىشىندە اقتوبەدە تالدىقورعانداي شاعىن وبلىس ورتالىعى سالىندى دەۋگە بولادى. وسىنىڭ ءوزى كوپ نارسەنى ايتادى. كەيبىرەۋلەر بايقاماۋى دا مۇمكىن, بىراق مەن سالىنعان الەۋمەتتىك نىسانداردى كورىپ سانىنان جاڭىلدىم... »,-دەدى اليك شپەكباەۆ.
وبلىس اكتيۆىنىڭ كەزدەسۋى بەردىبەك ساپارباەۆ پەن اليك شپەكباەۆتىڭ "استانا - ادالدىق الاڭى" جوباسىنىڭ بالاماسى - «اقتوبە – ادالدىق الاڭى» جوبالىق كەڭسەسىنىڭ جارعىسىنا قول قويۋىمەن اياقتالدى.
جوبالىق كەڭسە وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس دەپارتامەنتى قىزمەتكەرلەرىنەن قۇرالعان. باستى ماقساتى – تۇرمىستىق سىبايلاس جەمقورلىقتى قىسقارتۋ, سىبايلاس جەمقورلىق قاتەرىن ازايتۋ, مەملەكەتتىك قىزمەت ساپاسى مەن حالىقتىڭ مەملەكەتتىك اپپاراتقا دەگەن سەنىمىن ارتتىرۋ.
ايتا كەتەيىك, كەڭسە ماماندارى ءبىرىنشى باسشىلاردىڭ دەربەس جاۋاپكەرشىلىكتەرىن كۇشەيتەتىن قۇجات ازىرلەگەن. وعان قالا مەن اۋدانداردىڭ اكىمدەرى, جەرگىلىكتى اتقارۋشى ورگاندار مەن ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى سىندى 259 مەملەكەتتىك قىزمەتكەر قول قويعان.
جوبالىق كەڭسەنىڭ تاعى ءبىر جەتىستىگى – ء«بىر تەرەزە» قاعيداسىمەن ميگراتسيالىق قىزمەتتەر كورسەتۋ بولىپ تابىلادى. بۇل بەلگىلى ءبىر قىزمەتتەردى كورسەتۋ مەرزىمىن بەس جۇمىس كۇنىنەن ەكى ساعاتقا دەيىن قىسقارتۋعا مۇمكىندىك بەردى.