قاراعاندىداعى وبلىستىق تاريحي-ولكەتانۋ مۇراجايىندا «بولعان انا» مازارىنان تابىلعان كونە جادىگەرلەر تانىستىرىلدى. اتالعان مازار ۇلىتاۋ كەنتىنەن وڭتۇستىك-شىعىسقا قاراي 60 شاقىرىم جەردە ورنالاسقان.
مامانداردىڭ بولجامى بويىنشا, قۇندى جادىگەرلەر ءحىىى عاسىردا سالتانات قۇرعان التىن وردا داۋىرىنە تيەسىلى بولۋى مۇمكىن. مۇنىڭ انىق-قانىعىن ءبىلۋ ماقساتىندا ماتەريالدار اقش جانە جاپونيانىڭ عىلىمي ورتالىقتارىنا زەرتحانالىق ساراپتاماعا جىبەرىلگەن. ونىڭ قورىتىندىسى جىلدىڭ سوڭىنا تامان بەلگىلى بولادى.
– قازان ايىندا جۇرگىزىلگەن قازبا جۇمىستارى كەزىندە 2 مەتر 35 سانتيمەتر تەرەڭدىكتەن ايەل ادامنىڭ سۇيەكتەرى شىقتى. تاس تابىت, وكىنىشكە قاراي, ۋاقىت وتە كەلە قيراپ قالعان. قابىر ىشىنەن التىنعا ۇقساس سارى مەتالدان جاسالعان توستاعان, اشەكەيلەر – سىرعا مەن شاشقا ارنالعان تۇيرەۋىش تابىلدى. سونداي-اق, توزعان ماتا بولشەكتەرى – التىن جىپتەرى بار جىبەك جانە بىلعارى ەتىك تابىلدى, – دەدى ارحەولوگ, «حالىك كازىناسى» عىلىمي-زەرتتەۋ ينستيتۋتىنىڭ جەتەكشى عىلىمي قىزمەتكەرى ايبار قاسەنالين.
التىننان جاسالعان دەپ توپشىلانعان توستاعاننىڭ تۇبىندە قىزعالداق پىشىنىندە بەدەرلەنگەن ورنەك بار. مامانداردىڭ بولجاۋىنشا, قابىردە اسىل تۇقىمدى اۋلەتتەن شىققان ايەل جەرلەنگەن, ال تابىلعان جادىگەرلەر مەن بۇيىمداردىڭ تۇرلەرى يسلامعا دەيىنگى كەزەڭگە جاتۋى ابدەن مۇمكىن.
– جوبا ماقساتى – ورتاعاسىرلىق مازاردى انتروپولوگيالىق تۇرعىدان زەرتتەپ, جەرلەۋ قاي كەزەڭدە جاسالعانى جانە جەرلەنگەن ايەلدىڭ دارەجەسى قانداي ەكەنىن انىقتاۋ. ءبىز تابىلعان باس سۇيەك بويىنشا بەتتىڭ ءپىشىنىن قالىپقا كەلتىرۋدى جوسپارلاپ وتىرمىز, – دەپ مالىمدەدى تاريحي-مادەني مۇرانى ساقتاپ قالۋ ورتالىعىنىڭ ديرەكتورى تۇلكىباي تولەۋوۆ.
قايرات ءابىلدا,
«ەگەمەن قازاقستان»
قاراعاندى