كۇنى كەشە تۇركىستان قالاسىن دامىتۋ ماسەلەلەرى جونىندە وتكەن كەڭەستە مەملەكەت باسشىسى جاڭعىرتىلاتىن ەنەرگيا كوزدەرىن پايدالانۋدىڭ ماڭىزدىلىعىنا نازار اۋدارىپ, وبلىس ورتالىعىن ەنەرگيامەن جانە سۋمەن قامتاماسىز ەتۋ سالالارىن جاقسارتۋعا قاتىستى بىرقاتار ناقتى تاپسىرما بەردى.
وسى ورايدا وبلىستا بالامالى ەنەرگيا كوزدەرىن كوپتەپ اشۋ ماقساتىندا ينۆەستيتسيا تارتۋ ارقىلى جاڭا جوبالاردى جۇزەگە اسىرۋ جوسپارلانۋدا.مىسالى, تۇركيا رەسپۋبليكاسىنىڭ «Biotrend energy» كومپانياسى ماقتا قالدىقتارىنان ەلەكتر قۋاتىن وندىرەتىن زاۋىت سالۋ تۋرالى ۇسىنىس جاساپ وتىر. ىرگەتاسى 2012 جىلى قۇرىلعان كومپانيا حالىقارالىق ستاندارتتارعا سايكەس تازا قۋات ءوندىرۋدى ماقسات تۇتقان, ەنەرگەتيكالىق كاسىپورىن. كومپانيانىڭ باسقارما توراعاسى مۋرات اسلان باستاپ كەلگەن دەلەگاتسيا تۇركىستان وبلىسى اكىمىنىڭ ءبىرىنشى ورىنباسارى قايرات نۇكەنوۆپەن كەزدەسىپ, ءوز ۇسىنىس-پىكىرلەرىن جەتكىزدى.
كومپانيانىڭ اۋىل شارۋاشىلىعى ونىمدەرىن قايتا وڭدەۋدە وزىق كاسىپورىن ەكەنىن ايتىپ, وسى سالادا تۇركىستان وبلىسىنا ينۆەستيتسيا سالۋعا نيەتتى ەكەنىن بىلدىرگەن مۋرات اسلاننىڭ ايتۋىنشا, 1 گەكتار ماقتا القابىنان 3 توننا ماقتا قالدىعى شىقسا, ودان 30-40 مۆت ەلەكتر قۋاتىن وندىرۋگە بولادى ەكەن. ماقتا قالدىقتارى مەن قوقىستان پوليەتيلەن ونىمدەرىن جانە تابيعي گاز شىعارۋعا دا بولادى.
وسىنى ەسكەرگەن ماماندار "اق التىندى" شاردارا, جەتىساي جانە ماقتاارال اۋداندارىندا ماقتا قالدىعىن قابىلداپ, ونى وڭدەيتىن ەكى زاۋىت سالۋدى جوسپارلاپ وتىر. بۇل رەتتە, دەلەگاتسيا جەتەكشىسى اكىمدىك تاراپىنان جەر تەلىمىن ءبولىپ بەرۋ مەن قۇجاتتاردى راسىمدەۋ جاعىنان قاجەتتى قولداۋ كورسەتۋدى سۇرادى. وبلىس اكىمىنىڭ ءبىرىنشى ورىنباسارى ينۆەستورلارعا اكىمدىك تاراپىنان ءتيىستى قولداۋلاردىڭ كورسەتىلەتىنىن جەتكىزدى.
عالىمجان ەلشىباي,
«ەگەمەن قازاقستان»
تۇركىستان وبلىسى