ءا.قاستەەۆ اتىنداعى مەملەكەتتىك ونەر مۋزەيىندە بەلگىلى سۋرەتشى الەكسەي ۋتكيننىڭ «مەن وسىنداي ءار قيلىمىن» اتتى جەكە كورمەسى كورەرمەنگە جول تارتتى. ەكسپوزيتسياعا سۋرەتشىنىڭ 150-گە تارتا كەسكىندەمە, گرافيكا, اۆتورلىق پورترەتتىك تۋىندىلارى قويىلعان.
قازاقستان سۋرەتشىلەر وداعىنىڭ مۇشەسى الەكسەي ۋتكين سۋرەت الەمىندە وزىنە ءتان قولتاڭباسىن قالىپتاستىرعان ونەر يەسى. ول ۇزاق جىلدار بويى ءوزى وقىعان ساڭىراۋ بالالارعا ارنالعان مەكتەپتە سۋرەت پانىنەن ساباق بەردى. 1995 جىلى «ساڭىراۋ سۋرەتشىلەردىڭ قاۋىمداستىعى» بەيكوممەرتسيالىق بىرلەستىگىن قۇرىپ, تالاي دارىنداردىڭ قاناتتانۋىنا جول اشتى.
كورمەدەن دارىندى سۋرەتشىنىڭ سان ءتۇرلى ستيل مەن تەحنيكادا ورىندالعان كوپتەگەن جاڭا جۇمىستارىن كەزدەستىرۋگە بولادى. قىلقالام يەسىن باسقالاردان دارالاپ تۇراتىن كۇش – شىعارمالارداعى ەكپىندى ەموتسيا مەن جارقىن جىگەر. كارتينالاردىڭ ونە بويىنا ۇڭىلسەڭىز, فورما مەن ءتۇس, تەرەڭ مازمۇن, ۇتىمدى كومپوزيتسيالىق شەشىم سۋرەتشى ءۇشىن باستى ورىندا ەكەنىن انىق اڭعاراسىز. ءىشىنارا كاريكاتۋراعا جاقىن پورترەت-سۋرەتتەر دە كوزگە جىلى ۇشىرايدى.
«كوپتەگەن تۋىندىلارىنان الماتىنىڭ تاۋ بوكتەرلەرىنەن جايىلىپ جاتقان قالا پەيزاجدارىن كورەمىز. ول وسى قالانى جاڭا قىرىنان اشۋدان شارشامايدى جانە ونى ءوز تۋىندىلارىندا جىرلاۋدى توقتاتپايدى. شەبەردىڭ شىعارماشىلىق جولى ۆاشينگتونداعى «جول» كورمەسىن جانە قازاقستانداعى نيدەرلاندى كورولدىگى ەلشىلىگىنىڭ «قىزعالداق جانە ادام» كورمەسىن قوسا العاندا ونداعان كورمەلەر مەن ماراپاتتاردان تۇرادى», دەيدى كورمە جەتەكشىسى كلارا يساباەۆا.
ول كەيىپتەگەن شىعارماداعى تال-تەرەكتەن ساۋدىراعان ساپ-سارى جاپىراقتار كۇرەڭ كۇزدىڭ قۇشاعىنا تارتىپ كوڭىل تۇكپىرىندەگى ساعىنىش سەزىمدەرىن شىمشىلايدى; ول كەيىپتەگەن قىس كەلبەتى بايا-شايا تىرشىلىكتىڭ باتپاعىنان ارىلىپ, ومىرگە قارداي تازا كوڭىلمەن ۇڭىلۋگە شاقىرادى – ول كەيىپتەگەن كارتينالاردان الماتىنىڭ مەزگىل اۋەندەرى ەسەدى...
ارمان وكتيابر,
«ەگەمەن قازاقستان»
الماتى