قازاقستان رەسپۋبليكاسى ۇكىمەتىنىڭ قاۋلىسى
2018 جىلعى 7 جەلتوقسان №811 استانا, ۇكىمەت ءۇيى
مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردىڭ مولشەرىن 2019 جىلعى 1 قاڭتاردان باستاپ ارتتىرۋ تۋرالى
«مىندەتتى الەۋمەتتىك ساقتاندىرۋ تۋرالى» 2003 جىلعى 25 ساۋىردەگى قازاقستان رەسپۋبليكاسى زاڭىنىڭ 8-1-بابىنىڭ 4) تارماقشاسىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى:
1. 2019 جىلعى 1 قاڭتارعا دەيىن مەملەكەتتىك الەۋمەتتىك ساقتاندىرۋ قورىنان ەڭبەك ەتۋ قابىلەتىنەن ايىرىلۋ جانە اسىراۋشىسىنان ايىرىلۋ جاعدايلارىنا تاعايىندالعان الەۋمەتتىك تولەمدەردىڭ مولشەرىن 2019 جىلعى 1 قاڭتاردان باستاپ الاتىن الەۋمەتتىك تولەمدەردىڭ مولشەرىنەن بەس پايىزعا ارتتىرۋ جۇرگىزىلسىن.
2. وسى قاۋلى 2019 جىلعى 1 قاڭتاردان باستاپ قولدانىسقا ەنگىزىلەدى جانە رەسمي جاريالانۋعا ءتيىس.
قازاقستان رەسپۋبليكاسىنىڭ
پرەمەر-ءمينيسترى ب.ساعىنتاەۆ
قازاقستان رەسپۋبليكاسى ۇكىمەتىنىڭ قاۋلىسى
2018 جىلعى 7 جەلتوقسان №817 استانا, ۇكىمەت ءۇيى
«قازاقستان رەسپۋبليكاسى اۋماعىندا ۋاقىت ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 جىلعى 23 قاراشاداعى №1749 قاۋلىسىنا وزگەرىس پەن تولىقتىرۋ ەنگىزۋ تۋرالى
قازاقستان رەسپۋبليكاسىنىڭ ۇكىمەتى قاۋلى ەتەدى:
1. «قازاقستان رەسپۋبليكاسى اۋماعىندا ۋاقىت ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 جىلعى 23 قاراشاداعى №1749 قاۋلىسىنا (قازاقستان رەسپۋبليكاسىنىڭ ءپۇاج-ى, 2000 ج., №49-50, 575-قۇجات) مىناداي وزگەرىس پەن تولىقتىرۋ ەنگىزىلسىن:
3-تارماق مىناداي رەداكتسيادا جازىلسىن:
«3. قازاقستان رەسپۋبليكاسىنىڭ اۋماعى 4-ءشى جانە 5-ءشى ساعاتتىق بەلدەۋلەردە ورنالاسادى دەپ بەلگىلەنسىن. رەسپۋبليكانىڭ اكىمشىلىك-اۋماقتىق قۇرىلىسىنا سايكەس ساعاتتىق بەلدەۋلەردىڭ شەكاراسى اقتوبە وبلىسى مەن قوستاناي وبلىسىنىڭ, اقتوبە وبلىسى مەن قاراعاندى وبلىسىنىڭ, قىزىلوردا وبلىسى مەن قاراعاندى وبلىسىنىڭ, قىزىلوردا وبلىسى مەن تۇركىستان وبلىسىنىڭ اراسىندا وتەدى.»;
مىناداي مازمۇنداعى 3-1-تارماقپەن تولىقتىرىلسىن:
«3-1. قىزىلوردا وبلىسىنىڭ اكىمدىگى 2018 جىلعى 20 جەلتوقساننان 21 جەلتوقسانعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعات ارتقا اۋىستىرسىن.».
2. قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى قىزىلوردا وبلىسىنىڭ اكىمدىگىمەن بىرلەسىپ, وسى قاۋلى كۇشىنە ەنگەن كەزدەن باستاپ حالىقتى قازاقستان رەسپۋبليكاسىنىڭ اۋماعىندا ۋاقىت ەسەپتەۋ ءتارتىبى تۋرالى حاباردار ەتسىن.
3. وسى قاۋلى قول قويىلعان كۇنىنەن باستاپ قولدانىسقا ەنگىزىلەدى جانە رەسمي جاريالانۋعا ءتيىس.
قازاقستان رەسپۋبليكاسىنىڭ
پرەمەر-ءمينيسترى ب.ساعىنتاەۆ