استانادا قازاقستان رەسپۋبليكاسى تۇڭعىش پرەزيدەنتى – ەلباسىنىڭ كىتاپحاناسى مەن قورىنىڭ بۇقارالىق اقپارات قۇرالدارى قىزمەتكەرلەرىنە ارنالعان جىل سايىنعى «قازاقستان تاۋەلسىزدىگى جانە ەلباسى» بايقاۋىنىڭ جەڭىمپازدارى ماراپاتتالدى. نازارباەۆ ورتالىعىندا وتكەن ماراپاتتاۋ راسىمىنە پارلامەنت سەناتىنىڭ دەپۋتاتى, ەلباسى قورىنىڭ ديرەكتورى داريعا نازارباەۆا, ەلباسى كىتاپحاناسى ديرەكتورىنىڭ مىندەتىن اتقارۋشى ماحمۇد قاسىمبەكوۆ, سونداي-اق بايقاۋ كوميسسياسىنىڭ مۇشەلەرى, بەلگىلى ساياسات جانە قوعام قايراتكەرلەرى, باق وكىلدەرى قاتىستى.
سالتاناتتى جيىندا قۇتتىقتاۋ ءسوز العان ەلباسى قورىنىڭ ديرەكتورى د.نازارباەۆا: «ەلىمىزدىڭ ۇلىق مەرەكەسى قارساڭىندا جۇزدەسىپ وتىرمىز. بارشاڭىزدى قۇتتىقتايمىن! 27 جىل ىشىندە ەلىمىزبەن بىرگە ۇلتتىق جۋرناليستيكامىز دا ءبىراز سىننان ءوتتى. قازىرگى تاڭدا قوعام جۋرناليستەرگە ۇلكەن سەنىممەن قارايدى. بۇل – زور جەتىستىك ءارى جاۋاپكەرشىلىك», دەي كەلە, جەڭىمپازدارعا شىعارماشىلىق تابىس تىلەدى.
ۇيىمداستىرۋشىلاردىڭ مالىمەتىنشە, «ۇزدىك تەلەۆيزيالىق ماتەريال», «ۇزدىك راديوماتەريال», «گازەتتەر مەن جۋرنالدارداعى ۇزدىك ماقالا», «عالامتور باق-تاعى ۇزدىك جاريالانىم» اتالىمدارى بويىنشا جاريالاناتىن بايقاۋ بيىل ەلوردانىڭ 20 جىلدىعىنا ارنالعان «ەل جۇرەگى – استانا» نوميناتسياسىمەن تولىققان. جىل وتكەن سايىن قوعامدا اتالعان شارانىڭ تانىمالدىلىعى ارتىپ, قاتىسۋشىلار قاتارى ۇلعايىپ كەلەدى.
بىلتىر 447 جۇمىس جولدانسا, بيىل 120-دان اسا باق-تان 564 جۇمىس قابىلدانعان. د.نازارباەۆا كەلىپ تۇسكەن جۇمىستاردىڭ سانى عانا ەمەس, ساپاسى دا ارتقانىن اتاپ ءوتتى. وسى جىلعى جۇمىستار ەگەمەن ەلىمىزدىڭ جەتىستىكتەرىن جەتكىزۋدەگى تەرەڭ مازمۇن, كوركەمدىك شەبەرلىك تۇرعىسىنان ەرەكشەلەندى. سونىمەن قاتار جوباعا شەتەلدىك جۋرناليستەر دە قىزىعۋشىلىق تانىتقان. وسىعان وراي, بايقاۋعا حالىقارالىق دارەجە بەرىلىپ, كەلەسى جىلى «شەتەلدىك باق-تاعى ۇزدىك جۇمىس» جاڭا نوميناتسياسى قوسىلماق.
بايقاۋ قورىتىندىسى بويىنشا تەلەارنا, سايت, راديو تىلشىلەرىمەن بىرگە, «ەگەمەن قازاقستان» گازەتى ساياسات جانە قۇقىق ءبولىمىنىڭ مەڭگەرۋشىسى جولدىباي بازار جۇلدەلى ءىىى ورىندى يەلەندى. سونداي-اق ارىپتەسىمىز – «كازاحستانسكايا پراۆدا» گازەتىنىڭ قىزمەتكەرى اناستاسيا پريلەپسكايا دا جەڭىمپازدار قاتارىنان تابىلدى.
بيىل ءۇشىنشى جىل ۇيىمداستىرىلىپ جاتقان سايىستا جۇلدە العان جەڭىمپازدارعا 200 000, 500 000, 1 000 000 تەڭگەدەن سىياقى, ديپلوم مەن توسبەلگى تابىستالدى.
ايدانا شوتبايقىزى,
«ەگەمەن قازاقستان»