«كوپۇلتتى جانە كوپكونفەسسيونالدى ەلىمىزدىڭ الەۋمەتتىك-ساياسي جاعدايىنىڭ تۇراقتى بولۋىنىڭ ماڭىزدى فاكتورى – قوعامدا عاسىرلار بويى قالىپتاسقان ىنتىماقتاستىق پەن رۋحانيلىق, تولەرانتتىلىق ەكەنى بارىمىزگە بەلگىلى. تاريحقا شولۋ جاسار بولساق, حح عاسىردىڭ باسىندا ساياسي رەپرەسسياعا ۇشىراعانداردى, سونداي-اق بۇرىنعى كەڭەس وداعىنىڭ بارلىق رەسپۋبليكالارىنان تىڭ جانە تىڭايعان جەرلەردى يگەرۋگە كەلگەن كوپتەگەن ۇلتتاردى ۇلى قازاق دالاسى تۋعان جەرىندەي قارسى الىپ, باۋىرىنا باسقانى بارشاعا ءمالىم. ولاردىڭ ءوسىپ-ونىۋنە, ءبىلىم الىپ, ەڭبەك ەتۋىنە بارلىق جاعداي جاسالىپ, ناتيجەسىندە ءاربىر وتباسى, جەكە تۇلعا رەتىندە ءوزىن قالىپتاستىرا الدى».
بۇل – قر قوعامدىق دامۋ مينيسترلىگى قوعامدىق كەلىسىم كوميتەتىنىڭ توراعاسى قايسار جاناحانوۆتىڭ «قازاقستاننىڭ وركەنيەتارالىق جانە كونفەسسياارالىق ديالوگقا قوسقان ۇلەسى» تاقىرىبىندا وتكەن كونفەرەنتسيادا جاساعان بايانداماسىنان ءۇزىندى.
-ءبىزدىڭ ەلىمىز ۇلتتىنا, ۇستاناتىن دىنىنە قاراي ەشكىمدى بولمەدى. ءاربىر ۇلت پەن ەتنيكالىق توپتىڭ ءتىلى, ءدىلى, مادەنيەتى قۇرمەتتەلدى. بۇل كەز كەلگەن داعدارىستى ەڭسەرىپ, ەلدىڭ ەكونوميكاسىن قارقىندى دامىتا وتىرىپ, ازاماتتاردىڭ ءال-اۋقاتىن جاقسارتۋعا جاعداي جاسايتىنى انىق. ەلىمىزدە قالىپتاسقان وسىنداي ۇردىستەردىڭ ارقاسىندا ءبىز الەمدىك ارەنادا بەيبىتشىلىك پەن كەلىسىمىنىڭ, دوستىق پەن بىرلىكتىڭ «قازاقستاندىق ۇلگىسىن» قالىپتاستىرا بىلدىك,-دەگەن كوميتەت توراعاسى ارى قاراي:
-ەندىگى ءبىزدىڭ ماقساتىمىز – وسى ۇلتارالىق جانە كونفەسسياارالىق كەلىسىمدى ءسىز بەن ءبىز بولىپ ودان ءارى نىعايتۋ جانە ورنىقتىرۋ. سەبەبى, ءبىز ءوز تاجىريبەمىزدە ءدىني جانە ەتنيكالىق الۋاندىلىققا قاراماستان, سىندارلى ديالوگ پەن ءوزارا تۇسىنىستىك دەموكراتيالىق مەملەكەتتىڭ ۇلتتىق بايلىعى بولا الاتىنىن دالەلدەي بىلدىك,-دەپ ءسوزىن جالعادى.
سونىمەن قاتار, ق.جاناحانوۆ 3 جىل سايىن استانا تورىندە ءوتىپ تۇراتىن الەمدىك جانە ءداستۇرلى دىندەر كوشباسشىلارىنىڭ سەزى تۋرالى دا تىلگە تيەك ەتتى.
-مەملەكەتتىك ورگاندار مەن ءدىني بىرلەستىك وكىلدەرىنىڭ اراسىنداعى جىلدار بويىنا سوزىلعان ىنتىماقتاستىق پەن دوستىق قارىم-قاتىناستى ەرەكشە اتاپ وتكىم كەلەدى. بۇل – قازىرگى تاڭداعى ازاماتتىق قوعامنىڭ جانە ەل ۇكىمەتىنىڭ الەمدىك جانە ءداستۇرلى دىندەر قۇندىلىقتارىن قايتا جاڭعىرتۋعا باعىتتالعان قىزمەتىنىڭ ناتيجەسى. ونىڭ بىردەن ءبىر دالەلى – بيىلعى جىلدىڭ باستى وقيعالارىنىڭ ءبىرى بولعان الەمدىك جانە ءداستۇرلى دىندەر ليدەرلەرىنىڭ VI سەزى.
الەمدىك جانە ءداستۇرلى دىندەر ليدەرلەرىنىڭ سەزى ديالوگتى, تولەرانتتىلىقتى, ىنتىماقتاستىقتى قولدايدى. الايدا, سەز ءدىندى ساياساتتاندىرۋعا, راديكالدى كۇشتەردىڭ كەيبىر ەلدەر مەن قوعامدار اراسىندا دىندەگى قۇندىلىقتار مەن نانىمداردى تەرىس پيعىلدا پايدالانۋعا قارسى تۇرۋدى كوزدەيدى. ءبىرىنشى سەزدەن باستاپ, 15 جىل ىشىندە التى دىنارالىق سامميتكە قاتىسقان قاتىسۋشىلار – رۋحاني كوشباسشىلار, بارلىق مادەني جانە ءدىني قاۋىمداستىقتار مەن حالىقتار اراسىنداعى بەيبىت قاتار ءومىر ءسۇرۋدى قامتاماسىز ەتۋدە ءوزارا تۇسىنىستىك پەن قۇرمەتتىڭ, ديالوگتىڭ ىقپالى كۇشتى ەكەنىن كورسەتىپ بەردى,-دەيدى قوعامدىق كەلىسىم كوميتەتىنىڭ توراعاسى.