قوستانايدا وبلىس اكىمىنىڭ كۋبوگى ءۇشىن رەسپۋبليكالىق كتك ويىنى ءوتتى

«جاقىندا ماۋسىم ءبىتتى, فينالعا شىققاندار انىقتالدى. ال وبلىس اكىمىنىڭ كۋبوگى جىل بويى جۇرگەن «جايدارمان» ويىندارىنداعى تالانتتىلاردى, ۇزدىكتەردى كورسەتەتىن جارمەڭكە, ەسەپ-بەرۋ كونتسەرتى سەكىلدى. ەلىمىزدە كتك ويىندارىنىڭ ساپاسى ارتىپ, دامىپ كەلەدى. جايدارمانشىلار ساحناعا ازىلمەن الىپ شىققان ماسەلەلەر قوعامدا پىكىر قالىپتاستىرادى دەپ ويلايمىن» دەيدى رەسپۋبليكالىق تەلەجوبالاردىڭ اۆتورى, رەداكتور قاسيەت كارىم.

قوستانايدا وتكەن ويىندا جايدارمانشىلار جۇرتتىڭ كوكەيىندەگىنى ازىلمەن جەتكىزىپ, كۇلكىگە قارىق ەتتى. ويىن قورىتىندىسىندا ادىلقازىلار القاسى م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىنىڭ «جاڭا عاسىر» كومانداسىن ۇزدىك دەپ تاۋىپ, ولارعا ءبىرىنشى ورىن ءۇشىن 300 مىڭ تەڭگەنىڭ سەرتيفيكاتىن تابىس ەتتى. ەكىنشى ورىندى 200 مىڭ تەڭگە جۇلدەسىمەن «بورانقۇل» كومانداسى الدى. ءۇشىنشى ورىن پەتروپاۆلدان كەلگەن «5 جاڭالىق» كومانداسىنا بەرىلدى, جۇلدەسىنە 100 مىڭ تەڭگە تابىس ەتىلدى. ويىندا استانادان كەلگەن «ەۆرازيات» كومانداسىنىڭ مۇشەسى ايبار سەيداعالي «ەڭ ۇزدىك ويىنشى» اتانىپ, 50 مىڭ تەڭگە سىيلىعىن الدى.

ءبىر ايتا كەتەرلىگى, سوڭعى جىلدارى قوستاناي وبلىسىنىڭ كوماندالارى رەسپۋبليكالىق ليگالاردا, تەلەۆيزيالىق ويىنداردا ءوڭىر نامىسىن قورعاپ ءجۇر.

«بيىلعى قوستاناي اشىق ليگاسىنىڭ چەمپيونى «دارىن», جەرگىلىكتى «قۇرداستار» ەركىن قۇراماسى», سوكولوۆ-سارىباي كەن ءوندىرۋ بىرلەستىگىنىڭ قۇراماسى, ارقالىق پەداگوگيكا ينستيتۋتىنىڭ «ارۋ.كز» كوماندالارى رەسپۋبليكالىق ليگالارعا قاتىسىپ ءجۇر. ولاردىڭ قاتارىندا ستۋدەنتتەر دە, جۇمىسشىلار دا, ءار ءتۇرلى ماماندىقتاردىڭ وكىلدەرى بار. ولار شىعارماشىلىعىن دامىتىپ كەلەدى» دەيدى «جايدارلى جاستار» قوعامدىق قورىنىڭ ديرەكتورى مارعۇلان باكىر. سونىمەن قاتار «جايدارمان» رەسپۋبليكالىق ويىندارىنىڭ رەداكتورى قاسيەت كارىم دە قوستانايلىق كوماندالاردىڭ ونەرىنە جىلى لەبىز ءبىلدىردى.

«قوستانايدا بۇرىن تەلەۆيزيالىق ليگادا ويناعان كوماندالار بولا قويعان جوق ەدى. 2012 جىلدان باستاپ ولار ليگالاردا كورىنە باستادى. بۇگىندە تەلەۆيزيالىق ليگالاردا كورەرمەندەر قوستانايدان, ارقالىقتان, تورعايدان قاتىساتىن كوماندالاردى ءبىلىپ قالدى. جالپى قازاقستاننىڭ سولتۇستىك وڭىرلەرىندە ويىنشىلاردىڭ جاڭا تولقىنى ءوسىپ كەلەدى. سولاردان ءۇمىت كۇتەمىز. ولاردىڭ بارلىعى مەكتەپ قابىرعاسىندا ءجۇرىپ ويىنعا قاتىسا باستاعان, جاقسى وقىعان بالالار. قازىر ولاردان قۇرالعان كوماندالار شەبەرلىگى رەسپۋبليكالىق دەڭگەيگە جەتىپ قالدى. تەك قوستانايدا عانا ەمەس, جالپى قازاقستاننىڭ سولتۇستىك وڭىرىندە جايدارمان ويىنشىلارىنىڭ جاقسى مەكتەبى قالىپتاسىپ كەلەدى. ءبىز سوعان قۋانامىز» دەدى قاسيەت كارىم.

ءنازيرا جارىمبەت,

«ەگەمەن قازاقستان»

قوستاناي