اقتوبەدە قر تۇڭعىش پرەزيدەنتى كۇنىنە ارنالعان باستى مەرەكەلىك جيىن «ماڭگىلىگىن مانەرلەگەن ەلباسى» اتتى تاقىرىپپەن وتكىزىلدى. سالتاناتتى شاراعا جينالعان اقتوبە ايماعىنىڭ جۇرتشىلىعى, مەملەكەتتىك جانە ۇكىمەتتىك ەمەس ۇيىمدار مەن زيالى قاۋىم وكىلدەرى ەڭ الدىمەن ەلباسى تۋرالى تۇسىرىلگەن «دارابوزداردىڭ داراسى» اتتى بەينەفيلمدى كورىپ تاماشالادى. بۇدان كەيىن قولدارىنا مەملەكەتتىك ءرامىزدىڭ ءبىرى – تۋ كوتەرگەن جاس ساربازدار مەن پاتريوتتىق كلۋبتىڭ مۇشەلەرى ورتاعا شىعىپ اسكەري ساپپەن العا اتتادى.
1991 جىلى 1 جەلتوقسانى... بۇل ەگەمەن ەلىمىزدىڭ تاريحىندا ماڭگى ساقتالىپ ءارى ماڭگى جاتتالىپ قالاتىن ايرىقشا داتالاردىڭ ءبىرى. ويتكەنى ءدال وسى كۇنى ەلدىڭ تۇڭعىش پرەزيدەنتىن سايلاۋعا قاتىسقان قازاقستاندىقتاردىڭ 98 پايىزدان استامى ن.ءا.نازارباەۆتى قولداپ داۋىس بەردى. مىنە, سودان بەرى 27 جىل ءوتىپتى. قازىرگى تاڭدا قازاقستاننىڭ اتاق-داڭقى بۇكىل الەمگە جايىلدى. ەڭ باستىسى كوپ ەتنوستى جاس مەملەكەتتە بىرلىك پەن كەلىسىم, ىنتىماق پەن ىرىس, باق پەن بەرەكە قاعيداتتارى سالتانات قۇرا باستادى. بۇل وڭ نىشان مەن كورىنىس ەڭ الدىمەن مەملەكەت باسشىسى ن.ءا.نازارباەۆتىڭ ساليحالى سىرتقى جانە ىشكى ساياساتىنىڭ ارقاسى, - دەدى اقتوبەلىكتەردى تۇڭعىش پرەزيدەنت كۇنىمەن قۇتتىقتاپ ءسوز سويلەگەن اقتوبە وبلىسىنىڭ اكىمى بەردىبەك ساپارباەۆ.
بۇگىنگى كۇنى ەلىمىز الەمدەگى جوعارى دامىعان ەلۋ ەلدىڭ قاتارىنا كىرۋ باعىتىن ۇستانىپ وتىر. رەسپۋبليكاداعى جەتىستىكتەردىڭ ءبارى پرەزيدەنتتىڭ كۇن-ءتۇن دەمەي ءوز حالقىنىڭ الەۋمەتتىك تۇرمىس-دەڭگەيىن كوتەرۋ جولىنداعى توككەن تەرىنىڭ ارقاسى. ەلباسى ەلىن سۇيسە, ەلى ەلباسىن سۇيەدى. بارشا قازاقستاندىقتاردىڭ ءوز ەلباسىنا دەگەن ريزاشىلىعى, ىقىلاسى مەن العىسى قاشان دا شەكسىز. سونىڭ باستى ءبىر ايعاعى بارشا قازاقستاندىقتاردىڭ قولداۋى مەن 1 جەلتوقسان تۇڭعىش پرەزيدەنت كۇنى دەپ اتالعانى. وسىناۋ دارا داتا قازىرگى كۇنى ەلىمىزدە مەملەكەتتىك مەرەكە بولىپ جاريالاندى. مەرەكە قۇتتى بولسىن دەدى بۇدان ءارى ءوڭىر باسشىسى.
تۇڭعىش پرەزيدەنت كۇنى اياسىنداعى باسقوسۋ كەزىن ەل بايتاعى – استانانىڭ قالىپتاسۋى مەن دامۋىنا ەلەۋلى ۇلەس قوسقان اقتوبەلىكتەردىڭ ۇلكەن شوعىرىنا «استاناعا – 20 جىل» مەرەكەلىك مەدالى تابىس ەتىلدى. تۋعان ەلىنىڭ ءوسىپ وركەندەۋىنە سۇبەلى ۇلەسىن قوسىپ, مۇمكىندىگى شەكتەۋلى جاندار مەن جەتىم بالالارعا قامقورلىق پەن قولداۋ كورسەتە بىلگەن كاسىپكەرلەر مەن بەلگىلى ازاماتتار ءار ءتۇرلى اتالىمدار بويىنشا ماراپاتتارعا يە بولدى. شىرايى كىرگەن شارا كەزىندە مەملەكەتتىك رامىزدەر, تاۋەلسىزدىك جىلدارىنداعى جەتىستىكتەر جانە قازاقستاننىڭ وزگە مەملەكەتتەرمەن دوستىق قارىم-قاتىناستارى تۋرالى بەينەفيلمدەر كورسەتىلدى. بۇدان كەيىنگى كەزەكتە جاس انشىلەر «مەنىڭ ەلباسى» ءانىن اۋەلەتە شىرقادى. سونداي-اق مىڭ بۇرالا بيلەگەن بيشىلەردىڭ حورەوگرافيالىق قويىلىمى دا مەرەكەلىك شارانىڭ ءسانىن كەلتىرە ءتۇستى. باقىتتى ءسات, ءالى باقىتتى شاق دەپ وسىنى ايتىڭىز.
تەمىر قۇسايىن,
«ەگەمەن قازاقستان»
اقتوبە