قاراشانىڭ 29-ى كۇنى بولعان بۇرقاسىننان كەيىن «الماتى-ەكاتەرينبۋرگ» اۆتوجولىنىڭ تەمىرتاۋ قالاسىنان اقمولا وبلىسىنىڭ شەكاراسىنا دەيىنگى بولىگى جابىلىپ, قوزعالىس شەكتەتىلگەن بولاتىن.
كەشكى ساعات 21.00-ءدىڭ شاماسىندا جەرگىلىكتى توتەنشە جاعدايلار قىزمەتىنە وساكاروۆكا كەنتىنىڭ ماڭىندا 49 جولاۋشىسى, ونىڭ ىشىندە 27 بالا بار اۆتوبۋستىڭ توقتاپ قالعانى تۋرالى سۋىت حابار كەلىپ ءتۇستى.
قار قۇرساۋىندا قالعاندار قاراعاندى وبلىسىنىڭ دولينكا كەنتىندەگى ساياسي قۋعىن-سۇرگىن قۇرباندارىنا ارنالعان مۇراجايدى بەتكە العان اقمولا وبلىسىنداعى ارشالى كەنتىنىڭ وقۋشىلارى بولىپ شىقتى. ولارعا كومەككە توتەنشە جاعدايلار باسقارماسى جانە وساكاروۆ اۋدانى اكىمدىگىنىڭ قىزمەتكەرلەرى كەلگەن. قۇتقارۋشىلار اۆتوبۋس جولاۋشىلارىن ۇيلەرىنە پويىزعا مىنگىزىپ قايتاردى.
سونداي-اق, بۇل كۇنى وساكاروۆ اۋدانىندا كولىكتەرى بۇزىلىپ, قار باسقان جولدا قالىپ قويعان تاعى 6 ادام قۇتقارىلدى.
قايرات ءابىلدا,
«ەگەمەن قازاقستان»
قاراعاندى وبلىسى