پارلامەنت سەناتىنىڭ توراعاسى قاسىم-جومارت توقاەۆ قارا تەڭىز-كاسپي ءوڭىرى ەلدەرىنىڭ زاڭگەرلەر قاۋىمداستىعىنىڭ توراعاسى يلگام راگيموۆ جانە ءبىر توپ قازاقستاندىق جانە رەسەيلىك زاڭگەر-عالىمدارمەن كەزدەسۋ وتكىزدى.
ق.توقاەۆ قازاقستان رەسپۋبليكاسى تۇڭعىش پرەزيدەنتى كۇنىنىڭ قارساڭىندا وتكىزگەن بۇل كەزدەسۋ كەزدەيسوق ەمەس ەكەنىن ايتا كەلىپ, ەلباسى نۇرسۇلتان نازارباەۆ ەۋرازيا كەڭىستىگىندە كوپشىلىككە مويىندالعان ينتەگراتسيالىق ۇدەرىستەردى قالىپتاستىرۋشىسى ءارى ساۋلەتشىسى ەكەنىن ەرەكشە اتاپ ءوتتى.
قۇقىقتىق رەفورمالار, سوت جۇيەسى مەن قۇقىق قورعاۋ ورگاندارىنداعى وزگەرىستەرگە توقتالعان سەنات توراعاسى ەلباسىنىڭ «100 ناقتى قادام» ۇلت جوسپارى تۋرالى باستاماسى اياسىندا قازاقستان قىلمىستىق, قىلمىستىق-پروتسەستىك جانە ازاماتتىق-پروتسەستىك زاڭناماسىن جاڭارتىلعانىن حاباردار ەتتى.
ق.توقاەۆتى ايتۋىنشا, سونىمەن قاتار زاڭنامانى ودان ءارى جەتىلدىرۋدى جانە بۇرىنعى تاسىلدەردى قايتا قاراۋدى قاجەت ەتەتىن كۇردەلى ماسەلەلەر بار. «پارلامەنت دەپۋتاتتارىنىڭ جانە زاڭگەر-عالىمداردىڭ باستى ماقساتى – حالىقتىڭ سوت جۇيەسىنە جانە جالپى مەملەكەتكە دەگەن سەنىمىن ارتتىرۋ. ءبىزدىڭ الدىمىزدا قىلمىستىق جانە قىلمىستىق-پروتسەستىك زاڭنامانىڭ لوگيكالىق ءوزارا بايلانىسى مەن بىرىزدىلىگىن قامتاماسىز ەتۋ مىندەتى تۇر», - دەدى سەنات توراعاسى.
ق.توقاەۆ قىلمىس دەڭگەيىن بارىنشا ازايتۋ زاڭناما مەن قۇقىق قولدانۋدى جەتىلدىرۋگە عانا بايلانىستى ەمەس, سونداي-اق دۇنيەتانىم مەن ادامگەرشىلىك ماسەلەلەرىن شەشۋگە دە بايلانىستى ەكەنىن ايتتى. وسىعان بايلانىستى, ونىڭ پىكىرىنشە, كورنەكتى زاڭگەر-عالىم ي.راگيموۆتىڭ «قىلمىس پەن جازانىڭ فيلوسوفياسى» اتتى كىتابى زور ىقىلاس تۋعىزادى.
«اۆتور ادامگەرشىلىكتىڭ ىرگەلى كاتەگوريالارىنىڭ ۇستانىمدارى تۇرعىسىندا زاڭ جۇزىندە جانە عىلىمدا دا زاڭ شىعارۋدىڭ نەگىزىندە بولۋى ءتيىس قىلمىس ماسەلەسىن ناقتى تالدادى», - دەدى سەنات توراعاسى كىتاپتى تالقىماستان بۇرىن.
ءسوز العان ي.راگيموۆ كەزدەسۋگە قاتىسۋشىلارعا مونوگرافياسىنىڭ مازمۇنى تۋرالى ايتىپ, ونىڭ قازاق تىلىندەگى نۇسقاسىن ۇسىندى.
تالقىلاۋعا پارلامەنت سەناتى توراعاسىنىڭ ورىنباسارى بەكتاس بەكنازاروۆ, سەناتور دۋلات قۇستاۋلەتوۆ, ي.ا.بۋنين اتىنداعى ەلەتسك مەملەكەتتىك ۋنيۆەرسيتەتىنىڭ پروفەسسورى يۋري گوليك, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلوسوفيا كافەدراسىنىڭ مەڭگەرۋشىسى عاريفوللا ەسىم, رەسەي فەدەراتسياسىنىڭ ەڭبەك سىڭىرگەن عىلىم قايراتكەرى الەكساندر كوروبەەۆ, «قازاقستاننىڭ زاڭگەرلەر كەڭەسى» رقق توراعاسى سەرىك اقىلباي مەن تانىمال قۇقىقتانۋشى ەسبەرگەن الاۋحانوۆ قاتىستى.
سەنات توراعاسى كەزدەسۋدى قورىتىندىلاي كەلىپ, ەلدەرىمىزدىڭ زاڭگەر-عالىمدارىنىڭ ىنتىماقتاستىعى تابىستى ءارى جۇيەلى بولاتىندىعىنا, ال زەرتتەۋ قورىتىندىلارى زاڭنامانى جەتىلدىرۋ جۇمىسىنا دەمەۋ بولاتىندىعىنا سەنىم ءبىلدىردى.