تۇركىستان وبلىسىنىڭ قازىعۇرت اۋدانىندا جەمىستەر مەن كوكونىستەردى وڭدەۋگە باسىمدىق بەرىلۋدە. بۇل ورايدا قۇنى – 50 ملن. تەڭگەلىك «Unifrutti gold» جشس-ءنىڭ ديەتالىق پيۋرەلەر شىعارۋ جوباسى جۇزەگە اسىرىلدى.
اۋدان كولەمىندە بۇگىنگى تاڭدا جۇمىس ىستەپ تۇرعان 18 كاسىپورىن بار. اعىمداعى جىلدىڭ 10 ايىندا وڭىردەگى ونەركاسىپ كاسىپورىندارىندا 5 ملرد. 633 ملن. تەڭگەنىڭ ءونىمى ءوندىرىلىپ, وتكەن جىلدىڭ ءتيىستى كەزەڭىمەن سالىستىرعاندا ناقتى كولەم يندەكسى 103,9 پايىز بولعان. تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە قازىعۇرت اۋدانىنىڭ اكىمى تولەگەن تەلعاراەۆ ونەركاسىپ ءونىم كولەمىنىڭ جىل سايىن ارتۋىنا يندۋستريالدىق ايماقتىڭ ۇلەسى مول ەكەنىن اتاپ ءوتتى. بۇگىنگى تاڭدا جالپى اۋماعى - 13 گەكتار «قازىعۇرت» يندۋستريالدىق ايماعىندا 1,9 ملرد. تەڭگە بولاتىن 7 جوباعا جەر تەلىمى بەرىلگەن. 2016-2017 جىلدارى 3 جوبا ىسكە اسىرىلسا, 2018 جىلى 589 ملن. تەڭگەلىك تابيعي شىرىن سۋسىن وندىرەتىن «كورىك شق» جشس-ءى جۇمىسىن باستادى. جۇزەگە اسىرىلعان جوبانىڭ تاعى ءبىرى – قۇنى 85 ملن. تەڭگە «قازىعۇرت اينا» جشس-ءنىڭ سۇيىق شىنى ءوندىرىسى. ال 3 جوبانى 2019 جىلى ىسكە قوسۋ جوسپارلانعان. سونداي-اق الداعى جىلى يندۋستريالدى ايماقتا ىسكە قوسىلاتىن جوبالاردىڭ اراسىندا جالپى قۇنى 602,7 ملن. تەڭگەنى قۇرايتىن قۇرعاق ءسۇت جانە سارى ماي وندىرەتىن «اسىل باستاۋ KZ» جشس-ءى, قۇنى 125 ملن. تەڭگەلىك «اق-نيەت 5» وك-ءنىڭ «تەمىر بەتون ونىمدەرى» جوباسى جانە قۇنى 112,7 ملن. تەڭگە «كن ەكسپورت 777» جشس-ڭ «جيھاز شىعارۋ» جوباسى بار.
اۋداندا 94 شاعىن جوبا ىسكە قوسىلىپ, 405 ادام تۇراقتى جۇمىسپەن قامتىلعان. بۇدان وزگە, شاعىن جانە ورتا كاسىپكەرلەر سانى 8226-عا جەتىپ, 114,6 پايىزعا وسكەن. كاسىپكەرلىك سالاسىن دامىتۋ ماقساتىندا قارجى ۇيىمدارىنان 2018 جىلدىڭ 10 ايىندا 4565 تۇلعاعا 2414,8 ملن. تەڭگە نەسيە بەرىلگەن.
عالىمجان ەلشىباي,
«ەگەمەن قازاقستان»
تۇركىستان وبلىسى