قازاقستانداعى ديپلوماتيالىق ميسسيالاردىڭ باسشىلارى Astana Hub IT-ستارتاپتارىنىڭ حالىقارالىق تەحنوپاركىندە بولدى. قوناقتارعا تەحنوپارك ينفراقۇرىلىمى مەن ونىڭ مۇمكىندىكتەرى, ستارتاپتاردى دامىتۋ جانە قولداۋ باعدارلامالارى مەن قۇرالدارى, سونداي-اق Hub-تىڭ العاشقى ناتيجەلەرى تانىستىرىلدى.
«جوعارى تەحنولوگيالار الەمدى كوز ىلەسپەس جىلدامدىقپەن وزگەرتىپ جاتىر. مەملەكەتتەردىڭ ەڭبەك نارىعىنداعى باسەكەگە قابىلەتتىلىگىنىڭ باستى كريتەريى – يننوۆاتسيا. وسى ورايدا ەلىمىزدە ۇلكەن جۇمىس اتقارىلۋدا. قازاقستاننىڭ يننوۆاتسيالىق الەۋەتى جوعارى جانە مۇمكىندىگىمىزدىڭ ءوز دەڭگەيىندە باعالانباي جاتقانىن دا بايقاپ وتىرمىز. ءبىزدىڭ ەلدە تالانتتى جانە جاسامپاز جاستار جەتكىلىكتى. قازاقستان – الەم بويىنشا ساۋاتتىلىق دەڭگەيى جوعارى مەملەكەتتەردىڭ ءبىرى. تاۋەلسىزدىك جىلدارىندا ءبىز باسەكەگە قابىلەتتى وقۋ ورىندارىن قۇردىق. ال بۇگىن وسى الەۋەتىمىزدى ناقتى وندىرىستە سىنايتىن ۋاقىت جەتتى», دەدى اقپارات جانە كوممۋنيكاتسيالار مينيسترلىگىنىڭ جاۋاپتى حاتشىسى جانات قوجاحمەتوۆ.
جاۋاپتى حاتشىنىڭ ايتۋىنشا, شىلدە ايىندا ەلدە ۆەنچۋرلى قارجىلاندىرۋ تۋرالى زاڭ قابىلدانىپ, شەتەلدىك جۇمىس كۇشى ءۇشىن ۆيزالىق جانە ەڭبەك رەجيمى بارىنشا وڭايلاتىلدى. «الداعى ۋاقىتتا Astana Hub قاتىسۋشىلارىنا سالىقتىق جەڭىلدىكتەر جاسالادى. جىل سوڭىنا دەيىن وسى باستامالاردىڭ بارلىعى زاڭدى كۇشىنە ەنەدى دەپ ۇمىتتەنەمىز», دەدى ج.قوجاحمەتوۆ.
قازىردىڭ وزىندە اقش پەن تمد ەلدەرىنىڭ يننوۆاتسيالىق ورتالىقتارىمەن ارىپتەستىك ورناتىپ ۇلگەرگەن حابتا 150-دەن استام توپ جۇمىس ىستەپ جاتىر. اقپارات جانە كوممۋنيكاتسيالار مينيسترلىگىنىڭ حابارلاۋىنشا, 2022 جىلعا دەيىن ستارتاپتار الاڭىنا تارتىلاتىن ينۆەستيتسيا كولەمىن 67 ملرد تەڭگەگە جەتكىزۋ جوسپارلانعان. بۇل ءوز كەزەگىندە وتاندىق ەكونوميكانى جاڭاشا تۇرلەندىرىپ, ەلدىڭ ەكسپورتتىق الەۋەتىن ارتتىرۋعا ىقپال ەتپەك.
شارانىڭ سوڭىندا شەتەلدىك ديپلوماتتار Astana Hub-تاعى ستارتاپشىلارمەن سۇحباتتاسىپ, الاڭنىڭ جۇمىسىمەن كەڭىنەن تانىستى. ءوز كەزەگىندە حاب وكىلدەرى تەك وتاندىق ەمەس, كەز كەلگەن شەتەلدىك IT-ستارتاپشىلاردىڭ استاناعا كەلىپ, ءوزىنىڭ يدەياسىن جۇزەگە اسىرا الاتىنىن, ول ءۇشىن حاب باسشىلىعى تەگىن كەڭسە مەن قۇرال جابدىقتان باستاپ ينۆەستور تابۋعا دەيىن كومەكتەسەتىنىن ايتتى.
باۋىرجان مۇقان,
«ەگەمەن قازاقستان»