استانادا قازاقستان حالقى اسسامبلەياسىنىڭ «مىڭ بالا» رەسپۋبليكالىق مادەني-اعارتۋشىلىق جوباسىنىڭ جەڭىمپازدارىن ماراپاتتاۋ ءراسىمى ءوتتى. سالتاناتتى شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, پارلامەنت ءماجىلىسىنىڭ دەپۋتاتتارى, شىعارماشىلىق جانە عىلىمي زيالى قاۋىم وكىلدەرى, ەتنواعارتۋ كەشەندەرىنىڭ ادىسكەرلەرى جانە جاستار ۇيىمدارىنىڭ بەلسەندىلەرى قاتىستى.
سالتاناتتى ءىس-شارا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكونىڭ قۇتتىقتاۋ سوزىمەن اشىلدى.
– «مىڭ بالا» جوباسى 2015 جىلدان بەرى قازاقستان حالقى اسسامبلەياسىنىڭ باستاماسىمەن «قازاقتانۋ» جالپىۇلتتىق جوباسى اياسىندا ۇيىمداستىرىلىپ كەلەدى. بۇگىندە بۇل جوبا ءارتۇرلى ۇلت وكىلدەرىنىڭ جاستارىنا قازاق حالقىنىڭ ءداستۇرىن, مادەنيەتىن جانە ءتىلىن ۇيرەتۋگە ارنالعان جاقسى باستاماعا اينالدى. مەملەكەتتىك ءتىل – بۇل جوعارى جەتىستىكتەرگە ۇمتىلاتىن, تابىستى مانسابىن قۇراتىن جاستارعا ارنالعان «الەۋمەتتىك ليفت», – دەدى ول.
جوباعا قاتىسۋشىلاردىڭ سانى جىل سايىن ارتىپ كەلەدى. 2017 جىلى بايقاۋعا 252 مىڭ بالا قاتىسقان بولسا, بيىل 271 مىڭ وقۋشى قاتىستى. ۇمىتكەرلەر بايقاۋ تالاپتارىنا سايكەس ەسسە, شىعارما, ديكتانت جازۋ جانە شەشەندىك شەبەرلىكتەرىن كورسەتۋ بويىنشا جارىسقا ءتۇستى. ماراپاتتاۋ سالتاناتىنا ەلىمىزدىڭ بارلىق وڭىرىنەن 48 وقۋشى مەن وقىتۋشى كەلدى.
لەونيد پروكوپەنكو جوبا جەڭىمپازدارىنىڭ اراسىندا قازاقستاننىڭ بولاشاق مينيسترلەرى, اكىمدەرى, جۋرناليستەرى, ديپلوماتتارى مەن دارىگەرلەرى بار ەكەنىنە سەنىم ءبىلدىردى.
– سىزدەردىڭ بۇگىنگى جوباداعى تابىستارىڭىز – بۇل بۇكىل قازاقستاننىڭ تابىسى. قازاق ءتىلى مەن تۋعان جەرگە دەگەن ىقىلاستارىڭىز ءۇشىن شىن جۇرەكتەن العىسىمدى بىلدىرگىم كەلەدى, – دەدى اسسامبلەيا توراعاسىنىڭ ورىنباسارى.
ۇزدىك ەسسە, بەينەروليكتەر اۆتورلارىنا قازاقستان حالقى اسسامبلەياسىنىڭ ماراپاتتارى مەن ەستەلىك سىيلىقتارى سالتاناتتى تۇردە تابىستالدى. «اسىل ءسوز» مەكتەبى نوميناتسياسى بويىنشا – 18, «ەركىن سويلە» – بەينەروليكتەر ەستافەتاسى» نوميناتسياسى بويىنشا – 13, ء«تىل مەكتەبى» نوميناتسياسى بويىنشا 16 جەڭىمپاز ماراپاتتالدى.
مارجان تىلەۋبەك,
«ەگەمەن قازاقستان»