باتىس قازاقستان وبلىسىنا جۇمىس ساپارىمەن كەلگەن پرەمەر-ءمينيستردىڭ ورىنباسارى اسقار جۇماعاليەۆ وڭىردە «تسيفرلى قازاقستان» باعدارلاماسى بويىنشا اتقارىلىپ جاتقان جۇمىستارمەن تانىستى.
اق جايىق وڭىرىندە وزىق تەحنولوگيانى ەنگىزۋ بويىنشا جەتىستىكتەر از ەمەس. ماسەلەن, ورال قالاسىنداعى جوعارى اگرارلىق-تەحنولوگيالىق كوللەدجىندە ءبىلىم سالاسىنا BIM تەحنولوگيانى ەنگىزۋ قولعا الىنعان. استاناداعى ەكسپو كورمەسىنەن باستالعان بۇل جوبا ورالدا جالعاسىن تاۋىپ, ەلىمىزدە تۇڭعىش رەت كوللەدجدە «BIM SPACE» ۆيرتۋالدى كورىنىس كابينەتى» اشىلدى. وسى ارقىلى شاكىرتتەر وزىق يننوۆاتسيانى وقۋ ۇدەرىسىندە كورىپ, پايدالانىپ, جەتىلدىرە الادى. «كوللەدج بىتىرۋشىلەرى باسەكەگە قابىلەتتى, جوعارى دەڭگەيلى مامان بولىپ شىعادى», دەيدى وقۋ ورنىنىڭ باسشىلارى. ءۆىم تەحنولوگياسى – جوبالاۋ-سالۋ-پايدالانۋدىڭ زاماناۋي ءتاسىلى. وبلىس اكىمى التاي كولگىنوۆ بيىل كوكتەمدە حەلسينكي قالاسىنا بارعاندا فينليانديا بيسنەس-حاب جانە «Collaprime Oy» كومپانياسىمەن ارادا ۇشجاقتى كەلىسىمشارت جاساسقان ەدى. سونىڭ ناتيجەسىندە وڭىردە فيندىك ءىت تەحنولوگيا باتىل ەنگىزىلە باستادى. كوللەدج ديرەكتورى سەرىك مۇحامبەتاليەۆتىڭ ايتۋىنشا, ستۋدەنتتەردى 3D جوباسىمەن وقىتاتىن قۇرىلعىلاردى ساتىپ الۋعا جانە كوللەدج وقىتۋشىلارىن وقىتۋعا 133 ميلليون تەڭگە قارجى جۇمسالعان.
پرەمەر-ءمينيستردىڭ ورىنباسارى بۇدان كەيىن اۋدانداردان ىرىكتەلىپ الىنعان 102 وقۋشى ءبىلىم الىپ جاتقان ءىت ليتسەيدىڭ دە جۇمىسىمەن تانىستى. زاماناۋي جاتاقحانامەن قامتىلعان, روبوت تەحنيكا, 3D مودەلدەۋ, باعدارلاما جاساۋ, ءىت-پارك كابينەتتەرى بار ليتسەي تۇلەكتەرى ينتەللەكتۋالى جوعارى, اشىق تا وزىق ويلى ماماندار بولىپ شىعادى.
بۇگىنگى تاڭدا وڭىردە «Smart City» تۇجىرىمداماسىنا سايكەس «قولجەتىمدى اكىمدىك», «Smart Uralsk» ورتالىعى, «مامانداندىرىلعان حقكو», «كوشى-قون حقكو» اشىلىپ, قالىپتى جۇمىس ىستەۋدە. سونداي-اق جەر قاتىناستارى سالاسىندا جەر رەسۋرستارىنىڭ بىرىڭعاي پورتالى اشىلىپ, «جەر ۋچاسكەسىن تاڭداۋ اكتىسىن بەكىتۋ» قىزمەتى اۆتوماتتاندىرىلدى. بۇرىن ازاماتتار تاڭداۋ اكتىسىن الۋ ءۇشىن 3 اي كۇتۋ كەرەك بولسا, قازىر بۇل قىزمەت 5-12 كۇن ارالىعىندا كورسەتىلەتىن بولدى. كەلەر جىلى 60, ال 2020 جىلى 33 ەلدى مەكەن ساپالى ينتەرنەت قىزمەتىمەن قامتىلاتىن بولادى, – دەيدى ءوڭىر باسشىسى التاي كولگىنوۆ.
ورال قالاسىنداعى مەديتسينالىق مەكەمەلەردىڭ دە قاعازسىز قارىم-قاتىناسقا كوشە باستاعانىنا ءبىراز ۋاقىت ءوتتى. ناتيجەلەرى وتە جاقسى. پرەمەر-ءمينيستردىڭ ورىنباسارى مۇنىڭ مىسالىن №3 ەمحانا جۇمىسىمەن تانىسا ءجۇرىپ كوردى. ماسەلەن, قازىردىڭ وزىندە ەمحانا كورسەتەتىن 121 ەسەپتىك قىزمەتتىڭ 108-ءى قاعازسىز اتقارىلادى.
پرەمەر-ءمينيستردىڭ ورىنباسارى وڭىردە قولدانىسقا ەنگىزىلگەلى جاتقان ەكى قاناتقاقتى جوبامەن تانىستى. ونىڭ ءبىرى «112» – بىرىڭعاي كەزەكشىلىك-ديسپەتچەرلىك قىزمەتى. بۇل قىزمەت وبلىستىق ءىىد جەدەل باسقارۋ ورتالىعى بازاسىندا قۇرىلعان. ال ەكىنشى «109» قىزمەتى – «Smart Uralsk» جوباسىنا كىرەتىن, ورال قالالىق كوممۋنالدىق جانە اپاتتىق قىزمەتتەردىڭ Call-ورتالىعى.
ساپاردىڭ ەكىنشى كۇنى «قاراشىعاناق پەتروليۋم وپەرەيتينگ» كومپانياسىنىڭ ورال قالاسىنداعى كەڭسەسىندە «باتىس قازاقستان وبلىسىنىڭ تسيفرلى تۇرلەنۋى» اتتى حالىقارالىق فورۋممەن جالعاستى. جيىندا اسىرەسە مۇناي-گاز سالاسىنا وزىق تەحنولوگيانى ەنگىزۋ ماسەلەسى تالقىلاندى.
قازبەك قۇتتىمۇرات ۇلى,
«ەگەمەن قازاقستان»