بەرليندە ەلباسىنىڭ «تاۋەلسىزدىك ءداۋىرى» كىتابىنىڭ تۇساۋكەسەرى ءوتتى

ءىس شارانى قازاقستان رەسپۋبليكاسىنىڭ گەرمانيا فەدەراتيۆتىك رەسپۋبليكاسىنداعى توتەنشە جانە وكىلەتتى ەلشىلىگى مەن تۇڭعىش پرەزيدەنت – ۇلت كوشباسشىسى قورى  ۇيىمداستىردى. 

جيىندى قازاقستان رەسپۋبليكاسىنىڭ گەرمانيا فەدەراتيۆتىك رەسپۋبليكاسىنداعى توتەنشە جانە وكىلەتتى ەلشىسى ءنۇسىپوۆ بولات تۇرار ۇلى اشىپ بەردى. سونداي-اق ىس-شاراعا ۇلتتىق اكادەميالىق كىتاپحاناسىنىڭ باسشىسى ءۇمىتحان مۇڭالباەۆا داۋرەنبەكقىزى ارنايى قاتىستى.

بۇگىنگى ءىس-شارادا ەلباسى نۇرسۇلتان ءابىش ۇلى نازارباەۆتىڭ تاۋەلسىزدىك جىلدارىندا جاساعان ەڭبەگى جونىندە اڭگىمەلەر قوزعالدى. پرەزيدەنتىمىزدىڭ «تاۋەلسىزدىك ءداۋىرى» اتتى كىتابىنىڭ نەمىس تىلىندەگى نۇسقاسىنىڭ بەرليندە تانىستىرىلۋى – تاريحي دەرەك رەتىندەگى تاريحي ءارى قۇندى باسىلىمنىڭ قازاق ەلىنىڭ مارتەبەسىن ايقىنداپ بەرمەك. بۇل «رۋحاني جاڭعىرۋ» باعدارلاماسىمەن قاتار ەلباسىنىڭ « ۇلى دالاناىڭ جەتى قىرى» ماقالاسى اياسىندا جۇزەگە اسىرىلىپ جاتقان باستى مىندەتتەردىڭ ءبىرى سانالماق.  «تاۋەلسىزدىك ءداۋىرى» كىتابى شەتەلدىك قالىڭ وقىرمان قاۋىمدى قىزىقتىرار تۋىندىنىڭ ءبىرى بولادى دەگەن سەنىمدەمىز.

ءىس-شاراعا قاتىسقان گەرمانيانىڭ اتاقتى جۋرناليست-ساياساتتانۋشىسى ناگا مىرزا  دا كىتاپ جونىندە ءوز ويىن بىلايشا ءبىلدىردى:

- كىتاپ كوپ اقپاراتتارعا تولى. قازاقستان ەلىنىڭ بارلىق تاۋەلسىزدىك جىلدارىنداعى ءومىرىن باياندايدى. كىتاپتىڭ ءاربىر بەتىن اشقان سايىن جاڭا باستامالاردىڭ ايقىن جازىلعانىن بايقاۋعا بولادى. قازاقستان ەلىنىڭ ۇلتتىق جانە حالىقارالىق دەڭگەيدە جۇمىس جاساعانىن كورەمىز.  كىتاپتىڭ اتاۋىنىڭ ءوزى ەلباسىنىڭ ءداۋىرى, ياعني پرەزيدەنت ءداۋىرى, نازارباەۆ ءداۋىرى دەگەندى ايتىپ تۇر,- دەدى ول.

ءدال وسى كىتاپ 2017 جىلى جارىققا شىققان بولاتىن. تاريحي پۋبليتسيستيكا جانرىندا جازىلعان كىتاپ ەلىمىزدىڭ جاڭا تاريحى مەن ونىڭ ەرتەڭىنە دەگەن نىق سەنىمدىلىك پەن باسقان قادامىنىڭ ايقىن كورىنىسى. حالقىمىزدىڭ تاۋەلسىزدىك جىلدارىنداعى ءومىرى مەن تاريحى, ەگەمەندىك جولىندا ەڭبەك ەتىپ جۇرگەن پرەزيدەنتىمىزدىڭ جارقىن ىستەرىن پاش ەتەدى.

ايتا كەتەيىك, وسى ءىس-شارا اياسىندا ەلباسىنىڭ نەمىس تىلىنە اۋدارىلعان « ۇلى دالانىڭ جەتى قىرى» اتتى ماقالاسى دا تانىستىرىلدى.