قاراعاندىنىڭ «ۆولشەبنايا سترانا» بالالار حورەوگرافيالىق ءانسامبلى تۇركيادا وتكەن «International Citrus Festival Mersin» حالىقارالىق فەستيۆالىنە قاتىستى. مەرسين قالاسىندا تۋ تىككەن بۇل ونەر مەرەكەسىندە الەمنىڭ 28 ەلىنەن كەلگەن ورەندەر باس قوسقان بولاتىن.
قۇرامى 26 ونەرپازدان تۇراتىن «ۆولشەبنايا سترانا» ۇجىمى بۇل ساپارعا بارۋ مۇمكىندىگىنە قاراعاندى قالالىق اكىمدىگىنىڭ قولداۋى ارقاسىندا يە بولدى.
فەستيۆال بارىسىندا ونەرلى جاستارىمىز مەرسين قالاسىنىڭ باستى كوشەلەرىندە وتكەن شەرۋدە قازاقستاننىڭ كوك بايراعىن الىپ ءجۇردى. جالپى «ۆولشەبنايا سترانا» ءانسامبلى ونەر مەرەكەسى اياسىندا قالاداعى باستى ءۇش الاڭدا وتكەن كونتسەرتتەرگە قاتىستى. ولار ساحنا تورىندە قازاقتىڭ ءتورت ءبيىن شەبەرلىكپەن ورىندادى.
ۇجىم مۇشەلەرىنىڭ ونەرى كورەرمەن مەن شەتەلدىك مامانداردىڭ كوڭىلىنەن شىعىپ, ولار كەلەسى جىلى مەكسيكا, بولگاريا, رۋمىنيا جانە تۇركيادا وتەتىن حالىقارالىق فەستيۆالدەرگە شاقىرتۋلار الدى.
قايرات ءابىلدا,
«ەگەمەن قازاقستان»
قاراعاندى