مەملەكەت باسشىسى VIII ازاماتتىق فورۋمعا قاتىسۋشى ۇكىمەتتىك ەمەس ۇيىمداردىڭ بايانداماسىن تىڭدادى.
«مەملەكەت پەن قوعام اراسىندا اشىق ديالوگ الاڭىن ورناتۋدىڭ قاجەت ەكەنىن مەن ءاربىر ءوز جولداۋىمدا ايتىپ كەلەمىن. ءبىزدىڭ باستى ماقساتىمىز – سانالى ازاماتتار مەن مارتەبەسى جوعارى دامىعان قوعام قۇرۋ. ەلىمىزدىڭ تۇراقتىلىعى ءۇشىن جۇمىلا ەڭبەك ەتسەك, بارلىق مىندەتتەردى جۇزەگە اسىرامىز. وركەندەگەن 30 ەلدىڭ قاتارىنا كىرۋ ماقساتى بارىمىزگە بىردەي. بۇل فورۋم ۇكىمەتتىك ەمەس ۇيىمدارعا سەرپىن بەرىپ ازاماتتىق قوعامنىڭ ودان ءارى دامۋىنا ۇلكەن جول سىلتەيدى دەپ سەنەمىن. بۇگىنگى باسقوسۋدا ناقتى جۇمىستار ايتىلدى. كوتەرىلگەن ءاربىر ماسەلە مۇقيات ساراپتالىپ, ۇكىمەتپەن, پارلامەنتپەن جانە ۇكىمەتتىك ەمەس ۇيىمدارمەن بىرگە ءتيىستى باعدارلامالار قابىلداۋ قاجەت», دەدى ەلباسى.
پرەزيدەنت ەڭ الدىمەن قايىرىمدىلىق سالاسىندا بەلسەندى قىزمەت ەتىپ جۇرگەن ۇيىمدار جۇمىسىنا توقتالدى.
«سوڭعى ۋاقىتتا كوپتەگەن كاسىپكەرلەر قايىرىمدىلىق جۇمىستارىمەن اينالىسىپ جاتقانى قۋانتادى. جەتىمدەر ءۇيى, قارتتار ءۇيى دەگەن سەكىلدى ماسەلەلەر مەنى قاتتى تولعاندىرادى. قازاقستاندا جەتىم بالالار ءۇيى بولماۋى ءتيىس. ءبىزدىڭ بالالارىمىز تانىمايتىن مۇحيتتىڭ ارعى جاعىنداعى ەلگە بارىپ, ەلگە بوتەن بولماۋى قاجەت. مۇسىلمان دىنىندە ايتىلعانداي, جەتىمگە قولىڭدى سوزساڭ, جۇماقتان ءبىر-اق شىعاسىڭ دەگەن. ءوزىنىڭ 1 نەمەسە 3 بالاسى بار ادام تاعى دا ءبىر بالانى بالالار ۇيىنەن اسىراپ السا, ول ادام تەك قانا جاقسىلىققا يە بولادى دەپ سانايمىن», دەدى نۇرسۇلتان نازارباەۆ.
مارجان تىلەۋبەك,
«ەگەمەن قازاقستان»