الماتىلىق جاس ونەرپاز دانەليا تۋلەشوۆا مينسكىدە «Junior Eurovision 2018» فينالىندا ونەر كورسەتىپ, التىنشى ورىنعا تابان تىرەدى. بيىلعى بايقاۋدىڭ ەرەكشەلىگى سول, قازاقستان ءان فەستيۆالىنە العاش رەت قاتىسىپ وتىر.
قارشاداي قىز «وزىڭە سەن» كومپوزيتسياسىن قازاق جانە اعىلشىن تىلىندە ورىنداپ, جۇرتشىلىقتى ەرەكشە ءسۇيسىنتتى. قازىلار القاسى مەن كورەرمەندەر داۋسىنىڭ قورىتىندىسى بويىنشا دانەليا 171 ۇپايعا يە بولىپ, التىنشى ورىنعا تۇراقتادى. 2015 جىلى ءانشى پولينا گاگارينامەن جۇمىس ىستەگەن رەسەيلىك تانىمال رەجيسسەر الەكسەي گولۋبەۆ بۇل جولى دا رەجيسسەرلىك مۇراتىنا ادالدىق تانىتىپ, دانەليانىڭ كومپوزيتسيالىق قويىلىمى قايتالانباس مەرەكەگە اينالدى. بۇل رەتتە دانەليانىڭ پروديۋسسەرى جان مۇقانوۆ وتانداسىمىزدىڭ ءوز مىندەتىن مۇلتىكسىز ورىنداپ شىققانىن ايتادى.
«دانەليانىڭ تاڭداپ العان ءانى ساتسىزدەۋ شىقتى دەپ ايتىپ جاتقاندار بار. مەن ونىمەن كەلىسپەيمىن. بۇل تىكەلەي ەفير بولعاندىقتان كوڭىل-كۇيگە اسەر ەتپەي قويمايدى. دانەليانىڭ ورىنداۋى جارقىن, وتە ادەمى شىقتى دەپ بىلەمىن. قانشا دەگەنمەن الەمدەگى ەڭ تاڭداۋلى فەستيۆالدا بار مۇمكىندىگىمىزدى پايدالاندىق, جيىرما ەلدىڭ ىشىندە التىنشى ورىننان كورىنۋ جامان ەمەس. ەڭ باستىسى بەرەكەسى مەن بىرلىگىن كورسەتىپ داۋىس بەرگەن حالقىمىزعا العىسىمىز زور», دەيدى ول «ەگەمەن قازاقستان» تىلشىسىنە.
215 ۇپايمەن پولشا بايقاۋدىڭ بيىلعى جەڭىمپازى اتانسا, ودان كەيىنگى ورىندارعا فرانتسيا (203 ۇپاي) مەن اۋستراليا (201 ۇپاي) جايعاستى.
ايا ءومىرتاي,
«ەگەمەن قازاقستان»