ۇلتتىق ونەردىڭ شەجىرەسىندە شەرۋ باستاعان تانىمال تۇلعالاردىڭ اراسىنان عازيزا جۇبانوۆانى دا تابۋعا بولادى. «جاقسىدان جاقسى تۋادى, جاقسىنىڭ جولىن قۋادى» دەگەن وسى. قازاقستان جانە كسرو حالىق ءارتىسى, قازكسر مەملەكەتتىك سىيلىعىنىڭ لاۋرەاتى, پروفەسسور عازيزا جۇبانوۆانىڭ وسى بەينەسىمەن قاۋىشا وتىرىپ, ونىڭ ۇلتتىق زاماناۋي مۋزىكامىزدىڭ نەگىزىن قالاۋشى احمەت جۇبانوۆتىڭ قىزى ەكەندىگىن اتتاپ وتە المايمىز.
اكە تالانتى جۇققان قىز تالانتىن بارلىق جانردا تانىتقان شىعارماشىلىق دياپازونى كەڭ كومپوزيتور رەتىندە عانا ەمەس, الماس سەركەباەۆ, تولەگەن مۇحامەدجانوۆ, قۋات شىلدەباەۆ, اقتوتى رايىمقۇلوۆا سىندى ساڭلاق شاكىرتتەرىمەن دە ەستە قالادى. مۋزىكا سالاسىندا ۇلتتىق كادرلار لەگىن دايارلاپ قانا قويماي, جۇبانوۆانىڭ ىقپالىمەن مۋزىكالىق مەكتەپتەر قۇرىلعانىن, فولكلور مەن كومپوزيتورلىق شىعارماشىلىق ماسەلەلەرى بويىنشا ديسسەرتاتسيالار قورعالا باستاعانىن اتاپ ءوتۋ پارىز.
ونەرتانۋشىلار عازيزا احمەتقىزىنىڭ مۋزىكالىق ويلاۋ جۇيەسىنىڭ بىرتۇتاستىعىن, ۆوكالدى ورىنداۋدان اسپاپتى ورىنداۋعا اۋىسۋ, سەزىم كورنەكىلىگىن, تاقىرىپتىق ماتەريالدىڭ اشىقتىعىن, ۇلتتىق بوياۋ, اۋقىمدىلىق, ەپيكالىق كەڭدىك پەن مۋزىكالىق وبرازداردىڭ قاراما-قايشىلىقتى مىنەزدەرىن بىرىكتىرە الاتىنىن مويىنداعان.
سونىمەن بۇل سۋرەت قالاي ءتۇسىرىلىپ ەدى؟
– عازيزا احمەتقىزى 1975-1987 جىلدار ارالىعىندا الماتى كونسەرۆاتورياسىندا (قازىرگى قازاق ۇلتتىق كونسەرۆاتورياسى) رەكتور بولدى. 80-ءشى جىلداردىڭ باسى بولۋ كەرەك, كازتاگ ءفوتوتىلشىسى رەتىندە كونسەرۆاتوريا رەكتورىن سۋرەتكە ءتۇسىرىپ كەلۋگە تاپسىرما الدىم. ول كىسىنى قولعا ءتۇسىرۋ وتە قيىن بولدى. قابىلداۋ بولمەسىندە كوپ كۇتۋگە تۋرا كەلدى. قاربالاس جۇمىستارىنىڭ اراسىندا رەتىن تۋىپ, ارنايى تاپسىرمامەن كەلگەنىمدى ايتىپ ەدىم, رەكتور كازتاگ سياقتى ساليقالى اگەنتتىك ءۇشىن فوتوعا تۇسۋگە مۇلدە دايىن ەمەستىگىن, ماكياجسىز وتىرعانىن, شاشىن جوندەمەگەنىن, تاعىسىن تاعىنى ايتىپ ءۇزىلدى-كەسىلدى قارسى بولدى. بىراق ازداپ بولسا دا سويلەسە باستادىق. سالدەن كەيىن ول كىسى ءجىبىپ, «جارايدى» وسى كۇيىمدە ءتۇسىرىپ كور, دەپ رۇقساتىن بەردى. ال مەن دە وتەۋىنە الدىمەن وسى سۋرەتتى وزىنە كورسەتىپ الۋعا كەلىسىمىن الدىم.
كوپ كۇتتىرمەي قاعازعا باسىلعان كادردى وزىنە الىپ كەلگەنىمدە, كەرىسىنشە تابيعي قالپىندا وتىرعان وسى سۋرەتى عازيزا احمەتقىزىنا وتە ۇنادى. اراعا ازداعان ۋاقىت سالىپ, سۋرەت ورتالىق باسىلىمداردىڭ بىرىندە جاريالاندى, – دەيدى فوتو اۆتورى يۋري بەككەر.
ايناش ەسالي,
«ەگەمەن قازاقستان»
الماتى