زاماناۋي تالاپتارعا ساي جابدىقتالعان «Digital URPAQ» پيونەرلەر سارايى ءوز جۇمىسىن باستاپ, اتا-انالاردىڭ جانە بالالاردىڭ قاتىسۋىمەن اشىق ەسىك كۇنى ۇيىمداستىرىلدى.
سالتاناتتى راسىمدە سويلەگەن سوزىندە ايماق باسشىسى قۇمار اقساقالوۆ ەلىمىزدە بالاماسى جوق نىساننىڭ باعا جەتپەس ماڭىزدىلىعىن اتاپ ءوتتى.
– ورتالىق – ەلباسى ن.نازارباەۆتىڭ سولتۇستىكقازاقستاندىق جاڭا بۋىنعا جاساعان تاماشا تارتۋى. بۇگىنگى كۇن ۇردىستەرىنە تولىق جاۋاپ بەرەدى, الەمدەگى ەڭ وزىق IT-تەحنولوگيالار پايدالانىلادى. ءبىلىم بەرۋ, روبوتتەحنيكا, بيوتەحنولوگيا, مەحاترونيكا, ەكوبيولوگيا, كوركەمونەر, مادەنيەت, شىعارماشىلىق, ويىن-ساۋىق ۇيىرمەلەرى مەن عىلىمي بىرلەستىكتەر جۇمىس ىستەيدى. 87 ۇيىرمەگە 1800 وقۋشى مەن ستۋدەنت ءبىر مەزگىلدە قاتىسىپ, سۇيىكتى ىستەرىمەن الاڭسىز اينالىسا الادى, – دەدى قۇمار ىرگەباي ۇلى.
مۇندا «تسيفرلى قازاقستان» باعدارلاماسى اياسىندا قابىلەتتى, تالانتتى جاستاردىڭ قوسىمشا ءبىلىم الىپ, ينتەللەكتۋالدى دامۋ مۇمكىندىكتەرىن جەتىلدىرۋدىڭ سان قىرلى جولدارى قاراستىرىلعان. ماسەلەن, عىلىمي-زەرتتەۋ كەشەنىنە اكۆاپونيكا, گيدروپونيكا, ۆەرميفەرما ءتارىزدى جۇيەلەر كىرەدى. مۇندا سۋ جانۋارلارىنىڭ قالدىقتارىن وسىمدىك شارۋاشىلىعىندا كادەگە جاراتۋ تەحنولوگياسى قولدانىلادى. ءداندى داقىلداردىڭ ءوسۋىن جەدەلدەتەتىن فيتوپرەپاراتتاردى سىناقتان وتكىزىپ, ودان ءارى جەتىلدىرۋگە بولادى. ەكولوگيالىق تازا ونىمدەر الۋ, وسىمدىكتەردى توپىراقسىز ءوسىرۋدىڭ تاجىريبە الاڭدارى مەن زەرتحانالىق تالداۋلار پانگە, عىلىمعا دەگەن قىزىعۋشىلىقتى ارتتىرارى ءسوزسىز. ەلەكترونيكا, ەلەكتر تەحنيكاسى, گالوگرافيا سىندى ۇيىرمەلەرگە ون جاستان اسقان كەز كەلگەن بالا جازىلا الادى. قاجەتتى اقپاراتتار LED-ەكراندار جانە بەينەقابىرعالار ارقىلى قامتاماسىز ەتىلەدى.
وسىندا «تاسقىن» دەپ اتاپ كەتكەن «تەسپيان» ەسىمدى درامالىق اكتەر روبوت بالالاردىڭ تسيفرلى تەحنولوگيالاردى مەڭگەرۋىنە كومەك قولىن سوزۋعا ءازىر. ول 17 تىلدە سويلەي الادى. ءان دە سالادى, «قارا جورعانى» دا بيلەپ بەرەدى, كلاسسيكالىق شىعارمالاردان ءۇزىندى دە وقيدى. روبوتتى بريتاندىق عالىمدار قۇراستىرعان.
15 مىڭ شارشى مەتر اۋماقتا ورنالاسقان پيونەرلەر سارايىن تولىققاندى جابدىقتاۋعا 2 ميلليارد تەڭگە جۇمسالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى