الماتى قالاسىندا اۋەسقوي بوكستان وتكەن «ءتورت ەلدىڭ ءتۋرنيرى» اتتى جولداستىق كەزدەسۋدە ەلىمىزدىڭ مەرەيى ۇستەم بولدى. قانشا جەردەن بۇل دودانى جولداستىق كەزدەسۋ دەپ اتاعانىمىزبەن, ماڭىزدىلىعى جونىنەن ءىرى حالىقارالىق تۋرنيرلەردەن كەم تۇسپەگەنى راس. جارىسقا قارسىلاستاردىڭ كىل جاقسى بوكسشىلارىن الىپ كەلگەندىگى وسى پىكىرىمىزدى قۋاتتاي تۇسپەك.
الماتى قالاسىندا اۋەسقوي بوكستان وتكەن «ءتورت ەلدىڭ ءتۋرنيرى» اتتى جولداستىق كەزدەسۋدە ەلىمىزدىڭ مەرەيى ۇستەم بولدى. قانشا جەردەن بۇل دودانى جولداستىق كەزدەسۋ دەپ اتاعانىمىزبەن, ماڭىزدىلىعى جونىنەن ءىرى حالىقارالىق تۋرنيرلەردەن كەم تۇسپەگەنى راس. جارىسقا قارسىلاستاردىڭ كىل جاقسى بوكسشىلارىن الىپ كەلگەندىگى وسى پىكىرىمىزدى قۋاتتاي تۇسپەك.
ءتۋرنيردىڭ العاشقى كەزدەسۋى رەسەي مەن ءۇندىستان قۇرامالارى اراسىندا ءوربىپ, ءۇندى ەلىنىڭ وكىلدەرى ءبىزدىڭ سولتۇستىكتەگى كورشىلەرىمىزگە ەش قارسىلىق كورسەتە الماعان ەدى. كەزدەسۋ 10:0 ەسەبىمەن رەسەي بوكسشىلارىنىڭ پايداسىنا شەشىلگەن. بۇل سايىسقا رەسەي مىقتى قۇراممەن كەلگەندىگىن بايقادىق. باپكەر نيكولاي حروموۆ الماتىعا بۇگىنگى تاڭداعى ەڭ مىقتى بوكسشىلارىن سايلاپ كەلىپتى. اتاپ ايتساق, ازەربايجان تۋماسى داۆيد ايراپەتيان – ءاىۆا رەيتينگىندە ءتورتىنشى ساتىدا تۇرعان شەبەر بوكسشى. سوڭعى الەم چەمپيوناتىندا قولا مەدالعا يە بولعان. ونىڭ الدىنداعى ميلاندا وتكەن دۇنيەجۇزىلىك بىرىنشىلىكتە كۇمىس القا تاعىنعانى تاعى بار. جاسى 28-گە تاياپ قالعان ايراپەتيان لوندون وليمپياداسىندا تسزوۋ شيمينمەن بىرگە ءبىزدىڭ ءبىرجان جاقىپوۆتىڭ (ەگەر ءبىرجان جولداماعا قول جەتكىزسە) ەڭ باستى قارسىلاسى بولماق. 52 كەلىدەگى رەسەيلىك ارميان ميشا الوياننىڭ دا سوڭعى كەزدەگى قارقىنى تىپتەن قاتتى. ەكى مارتە الەم چەمپيوناتىنا قاتىسقان 23 جاسار الويان اۋەلگىسىندە كۇمىس مەدالدى يەلەنسە, ەكىنشى الەم چەمپيوناتىندا التىن مەدال تاعىنىپ, بيىكتەن كورىنگەن بوكسشى. الويان ءاىۆا رەيتينگىندە كوش باستاپ تۇر. تالدىقورعاننىڭ تۋماسى, كەيىنىرەك رەسەي جەرىنە قونىس اۋدارعان سەرگەي ۆودوپيانوۆ (56 كگ) 2007 جىلعى چيكاگودا وتكەن دۇنيەجۇزىلىك دودادا نەبارى 20 جاسىندا الەم چەمپيونى اتانعان.
ەلدىڭ كۇتكەنى دە قازاقستان-رەسەي قۇرامالارىنىڭ اراسىنداعى كەزدەسۋ ەدى. «تورتتىك تۋرنيردە» فرانتسيا مەن ءۇندىستاندى بەت قاراتپاعانىمىزبەن, ورىس بوكسشىلارى ءبىزدىڭ ەجەلگى قارسىلاس ەكەنى بەلگىلى. سودان دا بولار, جەڭىل سالماقتاعى ءبىرجان جاقىپوۆ پەن الەم چەمپيونى ميشا الويان اراسىنداعى كەزدەسۋدى كوپ بولىپ كۇتتىك. الايدا, رەسەي قۇراماسى 49 كەلىدەگى ميشا الويان مەن 52 كەلىدەگى داۆيد ايرەپەتياندى جاراقات الۋلارىنا وراي, تۋرنيردەگى سوڭعى كەزدەسۋگە شىعارعان جوق. بۇل شەشىم ءبىزدىڭ پايدامىزعا شەشىلىپ, 2-0 ەسەبىمەن العا شىقتىق.
قازاقستان-رەسەي كەزدەسۋىن عاني جايلاۋوۆ پەن البەرت سەليموۆتىڭ جەكپە-جەگى اشتى. عاني بارىن سالا بوكستاسسا دا ءبىر ۇپاي ايىرماسىمەن سەليموۆتەن جەڭىلىپ قالدى. عانيدىڭ ءىزىن الا قانات ءابۋتالىپوۆ سەرگەي ۆودوپيانوۆپەن كەزدەسىپ, ول دا ورىس بوكشىسىنا جول بەردى.
64 كەلىدەگى دانيار ەلەۋسىنوۆ ەسىمى كوپكە بەلگىسىز رەسەيلىك الەكساندر سوليانيكوۆتەن شەبەرلىگىمەن دە, شارشى الاڭدى يگەرۋىمەن دە باسىم ءتۇستى. ازيا ويىندارىنىڭ چەمپيونى ەلەۋسىنوۆتىڭ جەڭىسى ەڭسەسى تۇسكەن جانكۇيەر قاۋىمدى ءبىر جەلپىنتىپ تاستادى.
ودان كەيىن شارشى الاڭعا ەكى ءدۇركىن الەم چەمپيونى, دۇنيەجۇزىلىك دودانىڭ كۇمىس جانە قولا ءجۇلدەگەرى سەرىك ساپيەۆ پەن رەسەيلىك اندرەي زامكوۆوي شىقتى. 2009 جىلى ميلاندا كەتكەن ەسەنى ءبىزدىڭ بوكسشى ەسەلەپ قايتاردى. زامكوۆويدىڭ مۇنداي دارمەنسىز كۇيىن باكۋدەگى الەم چەمپيوناتىندا دا كورگەن جوقپىز. 2009 جىلعى الەم چەمپيوناتىنىڭ كۇمىس جۇلدەگەرى زامكوۆوي ءساپيەۆتەن 14-4 ەسەبىمەن ويسىراي ۇتىلدى. ءبۇكىل جەكپە-جەك بويى زامكوۆويدى بۇرىشتان-بۇرىشقا قۋالاپ ءجۇرىپ ساباعان ءساپيەۆ وسىدان ءۇش جىل بۇرىنعى جەڭىلىسىنىڭ قارىمىن قايتاردى.
75 كگ سالماقتاعى دانابەك سۋجانوۆتىڭ دايىندىعى دا, تەحنيكالىق شەبەرلىگى دە زالعا جينالعان جانكۇيەردى قۋانتقان جوق. ءبىزدىڭ ءجىگىت تىم سىلبىر جۇدىرىقتاستى. ەۋروپا چەمپيونى, رەسەيلىك ماكسيم كوپتياكوۆ سۋجانوۆتى تىرپ ەتكىزبەدى دەسەك, ارتىق ايتقانىمىز ەمەس. رەسەيلىك بوكسشى ۇپاي سانىمەن جەڭىپ كەتتى. الەم چەمپيوناتىنىڭ كۇمىس جۇلدەگەرى ادىلبەك نيازىمبەتوۆ پەن 2009 جىلعى الەم چەمپيونى ەگور مەحونتسەۆ (81كگ) ايقاستى. كورەر كوزگە ناعىز تارتىستى وتكەن كەزدەسۋ بولعانىمەن, 13-11 ەسەبىمەن جەڭىس مەحونتسەۆتىڭ ۋىسىندا كەتتى.
قۇراماداعى جاس بوكسشىمىز الەكسەي سەۆاستيانوۆ رەسەيلىك ارتۋر بيتەربيەۆتەن وڭباي جەڭىلدى. ارتۋردىڭ باپكەرى شارشى الاڭعا ورامال لاقتىرماعاندا شاكىرتى نوكاۋت الاتىنى انىق ەدى. سوڭعى جۇپ, اسا اۋىر سالماقتاعى الىپتار يۆان دىچكو مەن ماگومەد وماروۆ اراسىنداعى كەزدەسۋ «تورتتىك تۋرنيردىڭ» نۇكتەسىن قويدى. بۇل جەكپە-جەكتىڭ الدىندا ءبىز رەسەيدەن 4-5 ەسەبىمەن ۇتىلىپ جاتقان ەدىك. ەۋروپا چەمپيونى وماروۆتى سوققىنىڭ استىنا الىپ ءجۇرىپ ءبىزدىڭ دىچكو 11-8 ەسەبىمەن قازاقستان قۇراماسىن جالپى ەسەپتەگى جەڭىلىستەن امان ساقتاپ قالدى.
قازاقستان-رەسەي: 5-5. ەسەپ تەڭ بولعانىمەن, ەسە جىبەرگەن تۇسىمىز كوپ. رەسەيدىڭ ەكى بوكسشىسى جەكپە-جەكتەن باس تارتپاعاندا, قورىتىندى ەسەپ باسقاشا بولار ما ەدى؟! جاسىرىپ قايتەمىز, قوس جەڭىستى رەسەي قۇراماسى بىزگە سىيعا تارتتى. ءبىزدىڭ قۇراماداعى ءۇش جىگىت قانا تازا جەڭدى. ولار دانيار ەلەۋسىنوۆ, سەرىك ساپيەۆ جانە يۆان دىچكو. جارتىلاي جەڭىل سالماقتاعى عاني جايلاۋوۆ پەن قانات ءابۋتالىپوۆ, 75 كگ سالماق دارەجەسىندەگى دانابەك سۋجانوۆ وليمپياداعا مىقتى دايىندىقپەن بارماسا, كۇنى ەرتەڭ ەل الدىندا جەرگە قاراپ قالۋىمىز مۇمكىن.
قانات ەسكەندىر,
الماتى.
سۋرەتتى تۇسىرگەن بەرسىنبەك سارسەنوۆ.