«ەگەمەن قازاقستان» گازەتىنىڭ الماتى بولىمشەسىنىڭ تىلشىلەرى ەلىمىزدەگى قابىرعالى وقۋ وردالارىنىڭ ءبىرى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ ستۋدەنتتەرىمەن شەبەرلىك ساباعىن وتكىزدى. بولاشاق جۋرناليستەرمەن كەزدەسۋ ەل گازەتىنىڭ بۇگىنگى سانىندا جارىق كورگەن ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» ماقالاسىمەن ءدوپ كەلىپ وتىر.
عاسىرلىق تاريحى بار اعا باسىلىم ءاردايىم ءوز وقىرماندارىمەن تىعىز بايلانىستا. بۇل رەتتە ەلدىڭ ەرتەڭى سانالاتىن جاستاردى, اسىرەسە بولاشاق جۋرناليستەردى گازەتتىڭ تىنىس-تىرشىلىگىمەن تانىستىرۋدىڭ ماڭىزى زور. وسى ماقساتقا نەگىزدەلگەن كەزدەسۋدە جاس تىلشىلەر وزدەرىن قىزىقتىرعان ساۋالدارىن ورتاعا سالىپ, تولىمدى جاۋاپ الدى. الماتى تىلشىلەر قوسىنىنىڭ مەڭگەرۋشىسى نۇرعالي وراز جاس شاكىرتتەرگە قاسيەتتى ماماندىقتىڭ قىر-سىرى تۋرالى اڭگىمەلەدى. قۋانىشپەن ايتا كەتەر ءبىر جايت, جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى الداعى ۋاقىتتا فاكۋلتەت قابىرعاسىنان «ەگەمەن قازاقستان» گازەتى اتىنداعى اۋديتوريا اشىلۋى مۇمكىن ەكەندىگىن ايتتى.
سونداي-اق باسقوسۋ بارىسىندا كۇنى بۇگىن جۇرتشىلىققا جولدانعان ەلباسى ماقالاسىنىڭ ءمان-ماڭىزى تۋرالى دا ايتىلماي قالعان جوق. ماقالاداعى: «بۇل – تاريحقا دەگەن دۇرىس ۇستانىم. سول ارقىلى ءتۇپ تامىرىمىزدى بىلۋگە, ۇلتتىق تاريحىمىزعا تەرەڭ ءۇڭىلىپ, ونىڭ كۇرمەۋلى ءتۇيىنىن شەشۋگە مۇمكىندىك تۋادى.» «رۋحاني جاڭعىرۋ» جالپىۇلتتىق باعدارلاماسىنىڭ جاڭا كومپونەنتتەرى اتا-بابالارىمىزدىڭ كوپ عاسىرلىق مۇراسىنىڭ تسيفرلىق وركەنيەت جاعدايىندا تۇسىنىكتى ءارى سۇرانىسقا يە بولۋىن قامتاماسىز ەتە وتىرىپ, ونى جاڭعىرتۋعا مۇمكىندىك بەرەدى» - دەگەن جولدار تاريح پەن تانىمعا قاتىستى تالاي سىردى اڭعارتادى. كەلەر جىلى 100 جىلدىق مەرەيتويىن تويلايتىن گازەتتىڭ تىلشىلەرى جاس تىلشىلەرمەن شەبەرلىك ساباعىن وتكىزۋى, ەلباسىنىڭ وسى ماقالاسىنداعى ويلارمەن استاسىپ جاتقانداي بولدى.
ساپارباي پارمانقۇل,
«ەگەمەن قازاقستان»
الماتى