وسىدان جەتى جىل بۇرىن قاراشانىڭ قارا سۋىعىندا جامبىل جۇرتشىلىعىن عانا ەمەس, بۇكىل قوعامدى ءدۇر سىلكىندىرگەن وقيعا ورىن العان بولاتىن. تاراز كوشەلەرىندە بەيبىت تۇرعىنداردىڭ تىنىشتىعىن بۇزىپ, وق اتقان لاڭكەستى قۇرىقتاۋ كەزىندە جەرگىلىكتى پوليتسيا قىزمەتكەرلەرى ەرلىكپەن قازا تاپتى. بۇگىندە بەيبىت كۇننىڭ باتىرلارىن جىل سايىن ەسكە الىپ, ولاردىڭ رۋحىنا تاعزىم ەتۋ داستۇرگە اينالعان. عازيز بايتاسوۆ, پولات ايانقۇلوۆ, جاقسىبەك بايسەيىتوۆ سياقتى ازاماتتاردىڭ ەرلىگى ەشقاشان ۇمىتىلمايدى.
قالا ورتالىعىنداعى «جەلتوقسان» سكۆەرىنىڭ ماڭىنداعى حالىق قاھارمانى عازيز بايتاسوۆتىڭ ءبيۋستى ماڭىنا جامبىل وبلىستىق پوليتسيا دەپارتامەنتىنىڭ قىزمەتكەرلەرى جانە باتىردىڭ تۋىستارى جينالىپ, ەسكە الۋ شاراسىن وتكىزدى. جيىندا دەپارتامەنت باستىعى, پوليتسيا پولكوۆنيگى ارمان ورازاليەۆ ءسوز الىپ, ەرلىكتىڭ ەشقاشان ۇمىتىلمايتىنىن, سىن ساعاتتا قازا تاپقان ازاماتتاردىڭ ەسىمى ءاردايىم حالىق جادىندا ەكەنىن ايتتى. ء«بىز تاۋەلسىز وتانىمىزعا ادال قىزمەت ەتكەن ەرجۇرەك جىگىتتەرىمىزدى جوعالتتىق. لاڭكەس قولىنان قازا تاپقان جامبىلدىق پوليتسەيلەر عازيز بايتاسوۆ, پولات ايانقۇلوۆ, جاقسىبەك بايسەيىتوۆ قيىن ساتتە حالىق مۇددەسىن بارىنەن جوعارى قوياتىن ناعىز باتىل, وتانسۇيگىش ازاماتتار ەدى. ولاردىڭ ەرلىگى – وتان الدىنداعى قىزمەت ەتۋدىڭ ناعىز ۇلگىسى», دەدى ول.
سونىمەن قاتار حالىق قاھارمانىن ەسكە الۋ شاراسىندا وبلىستىق مەكتەپ وليمپيادالارىن جانە مەكتەپتەن تىس ءىس-شارالاردى وتكىزەتىن ورتالىقتىڭ جاسوسپىرىمدەردەن قۇرالعان «پوليتسيا اكادەمياسىنىڭ» مۇشەلەرى انت قابىلدادى. ءوز كەزەگىندە پوليتسيا كاپيتانى عازيز بايتاسوۆتىڭ جارى گۇلميرا تاجيەۆا ء«اردايىم عازيزدى ەلى ۇمىتپاي ەسكە الىپ, ەرلىگىنە تاعزىم ەتۋدە. ۇلدارى ءوسىپ كەلە جاتىر. ۇلكەن ۇلى اكە جولىن جالعاستىرىپ, جوعارى وقۋ ورنىندا زاڭ فاكۋلتەتىندە وقىپ ءجۇر. بولاشاعىمىز قاشاندا جارقىن بولسىن», دەي كەلە باتىر ۇلدىڭ رۋحىنا تاعزىم ەتكەن كوپشىلىككە العىسىن ءبىلدىردى.
قاپيادا قازا تاپقان بەيبىت كۇننىڭ باتىرلارى رۋحىنا ارناپ ارمان ورازاليەۆ باستاعان جامبىلدىق پوليتسەيلەر عازيز بايتاسوۆتىڭ بيۋستىنە گۇل شوقتارىن قويدى. ەرلىك ەلدىكپەن بىرگە ماڭگى جاساي بەرەتىنىن ەسكە سالدى.
حاميت ەسامان,
«ەگەمەن قازاقستان»
جامبىل وبلىسى