كەزدەسۋ بارىسىندا نۇرسۇلتان نازارباەۆ قازاقستان مەن رەسەيدىڭ ەاەو اياسىنداعى ءتيىمدى ىنتىماقتاستىعىن اتاپ ءوتتى.
— ءبىزدىڭ قارىم-قاتىناسىمىز دامىپ كەلەدى. تۋىنداعان ماسەلەلەر ەلدەرىمىزدىڭ ۇكىمەتتەرى دەڭگەيىندە شەشىلىپ جاتىر. سىزبەن بىرگە بايقوڭىر قالاسىن ودان ءارى دامىتۋ ماسەلەسىن تالقىلادىق. ءبىز قازىر 8 جىلعا ارنالعان ءتيىستى «جول كارتاسىن» ازىرلەدىك, — دەدى قازاقستان پرەزيدەنتى. سونداي-اق, مەملەكەت باسشىسى رەسپۋبليكامىزدىڭ ەاەو-عا تابىستى توراعالىق ەتكەنىن جانە بۇل كەزەڭدە وداقتىڭ كەدەن كودەكسى كەلىسىلىپ, قول قويۋعا دايىن بولعانىن ايتتى.
— وتىرىسقا قاتىساتىن مەملەكەتتەر باسشىلارى وسى قۇجاتتى قولدايدى دەپ ويلايمىن. ەۋرازيالىق ەكونوميكالىق وداق ەلدەرى اراسىندا تاۋار اينالىمى باسەڭدەدى, ول بيرجا باعامىنىڭ ءبىزدىڭ تاۋارلارعا دەگەن قاتىناسىنا بايلانىستى. بۇل رەتتە ساۋدانىڭ ناقتى كولەمى ساقتالۋدا, — دەدى نۇرسۇلتان نازارباەۆ.
قازاقستان پرەزيدەنتى رەسەي فەدەراتسياسىمەن اسكەري-تەحنيكالىق ىنتىماقتاستىقتى ودان ءارى دامىتۋعا نيەتتى ەكەنىمىزدى اتاپ ءوتتى. بۇدان بولەك, نۇرسۇلتان نازارباەۆ ۆ.پۋتينگە سيريا قاقتىعىسى جونىندە استانادا كەلىسسوزدەر وتكىزۋ ءۇشىن قازاقستان مۇمكىندىك بەرۋگە دايىن ەكەنىن ايتتى.
— قازاقستان — ينتەگراتسيالىق ۇدەرىستەرگە بەلسەنە اتسالىسىپ كەلە جاتقان ەل. تابىستى مەملەكەتتىڭ ينتەگراتسيالىق جوبالاردى بەلسەندى تۇردە جۇرگىزۋى ەۋرازيالىق ەكونوميكالىق وداقتىڭ بارلىق ەلدەرىنە پايداسىن تيگىزىپ وتىر, — دەدى ۆ. پۋتين.
ەكىجاقتى كەلىسسوزدەر قورىتىندىسى بويىنشا تومەندەگىدەي قۇجاتتارعا قول قويىلدى:
— «بايقوڭىر» كەشەنىندە ىنتىماقتاستىقتى ودان ءارى جالعاستىرۋ تۇجىرىمداماسى;
— بايقوڭىر قالاسىنىڭ مارتەبەسى جانە ونداعى اتقارۋشى وكىمەت ورگاندارىن قۇرۋ ءتارتىبى مەن ولاردىڭ مارتەبەسى تۋرالى مەملەكەتارالىق كەلىسىمگە وزگەرىستەر ەنگىزۋ تۋرالى 1995 جىلعى 23 جەلتوقسانداعى حاتتامانىڭ قازاقستان رەسپۋبليكاسىنىڭ مەملەكەتتىك ورگاندارىنىڭ تىزىمىنە قاتىستى بولىگى.